Kronekele wo sangula 12:1-40
-
Lava va nga seketela wuhosi ga Dhavhidha (1-40)
12 Lava hi vavanuna lava va ngaya ka Dhavhidha le Ziklagi+ a cikhati leci a nga kala a nga fambafambi hi kutlhatlheka hi kota ya Sawule,+ a n’wana wa Kixi; va wa hi cikari ka masochwa ya tinhenha lawa ma nga kari ma mu seketela yimpini.+
2 Va wa hlomile mawura niku va wa zvi kota ku tirisa a woko ga cinene ni ga cibhabha+ kasi ku hoxela maribye+ kutani ku phanda mipaxa. Va wa hi vamakabye va Sawule, va lixaka la ka Bhenjamini.+
3 A hloko ku wa hi Ahiyezere, zvin’we na Jowaxi, a vana va Xemaa, a muGibheyate;+ na Jeziyeli na Pelete, a vana va Azmavhete;+ na Bheraka; na Jehu, a muAnatote;
4 na Ixmaya, a muGibheyoni,+ a nga hi musochwa wa nhenha cikari ka lava va 30,+ na a hi murangeli wabye; na Jeremiya; na Jahaziyeli; na Johanani; na Jozabhadha, a muGedherate;
5 na Eluzayi; na Jerimote; na Bheyaliya; na Xemariya; na Xefatiya, a muHarifa;
6 na Elkana, na Ixiya, na Azareli, na Joyezera, na Jaxobheyamu, a vana va Kora;+
7 na Joyela zvin’we na Zebhadhiya, a vana va Jerohamu, wa le Gedhora.
8 A vavanuna vo kari va ka Gadhi va no ya ti patsa na Dhavhidha khokholeni ga le ciwuleni.+ Va wa hi masochwa ya tinhenha, a masochwa ma gondzisilweko khwatsi a kulwa. Va wa tshama na va longile a zvitlhangu zva hombe ni matlhari. A tinghohe tabye ti wa fana ni ta tinghala niku va wa tsutsuma nguvhu a ku khwatsi timhuti hehla ka zvitsunga.
9 Ezeri i wa hi yena hloko; Obhadhiya i wa hi wa wumbiri; Eliyabhe i wa hi wa wunharu;
10 Mixmana i wa hi wa wumune; Jeremiya i wa hi wa wutlhanu;
11 Atayi i wa hi wa wu 6; Eliyeli i wa hi wa wu 7;
12 Johanani i wa hi wa wu 8; Elzabhadha i wa hi wa wu 9;
13 Jeremiya i wa hi wa wu 10; na Makbhanayi i wa hi wa wu 11.
14 Lava va wa hi va ka Gadhi,+ a varangeli va butho. Loyi wa mutsongwani i wa ringana ni 100, niku loyi wa hombe i wa ringana ni 1000.+
15 A vavanuna lava hi lava va nga tlhatuka a Jordhani hi hweti yo sangula, a cikhati leci a talako a tlhela a hlata. Va no hlongola vontlhe lava va nga hanya mindzhelelweni, le mutsuwuka-gambo ni le mupela-gambo.
16 A vavanuna vo kari va ka Bhenjamini ni va ka Judha vonawu va noya ka Dhavhidha khokholeni gakwe.+
17 Dhavhidha i no huma a va khinga, aku kabye: “Loku muta ka mina hi kurula kasi ku ta ndzi vhuna, a mbilu ya mina yi ta bohana na n’wina. Kanilezvi loku mu tela ku ta ndzi tokometa ka valala va mina a mandla ya mina na ma nga gohangi nchumu, a Nungungulu wa vakokwani va hina i wa zvi wone a lamula.”+
18 Makunu a moya wu nota hehla ka* Amasayi,+ a hloko ya lava va 30, aku:
“Hina hi va wena, Dhavhidha, niku hi zvin’we na wena, n’wana wa Jese!+
A kurula, a kurula a kuve na wena, a kurula a kuve ni lava va ku vhunetelako,Hakuva a Nungungulu wa wena wa ku vhunetela.”+
Hikwalaho, Dhavhidha i no va amukela a va yimisa kota tihloko ta masochwa.
19 A vavanuna vo kari va ka Manase vonawu va noya va ya ti patsa na Dhavhidha a cikhati leci a nga huma ni vaFilistiya kasi va yalwa na Sawule. Kanilezvi a nga vhunangi a vaFilistiya, hakuva andzhako ka loku a tihosi ta vaFilistiya+ ti bhulisene, ti no mu tlhelisa, tiku: “I ta ti patsa ni hosi yakwe Sawule, a veka tihloko ta hina mhangweni.”+
20 Lava kuve vavanuna va ka Manase, lava va nga ti patsa naye a cikhati leci a ngaya Ziklagi:+ Adna, na Jozabhadha, na Jedhiyayeli, na Mikayeli, na Jozabhadha, na Elihu, na Ziletayi, a varangeli va mitlawa ya 1000 wa vanhu ya va ka Manase.+
21 Va no vhuna Dhavhidha a kulwa ni butho ga vaphangi hakuva vontlhe va wa hi vavanuna va ntamu ni vo tiya hlanha,+ niku va nova varangeli va butho.
22 Siku ni siku, a vanhu va wa simama kuya ka Dhavhidha+ va ya mu vhunetela kala a wugovelo gakwe gi maha ga hombe a ku fana ni legi ga Nungungulu.+
23 Lowu i ntsengo wa tihloko ta lava va nga hlomile a kulwa yimpi, lava va ngaya ka Dhavhidha le Hebroni+ kasi va ya mu yimisa kota hosi cikhundleni ca Sawule, hi kuya hi lezvi Jehovha a wulileko.+
24 A vavanuna va ka Judha, lava va nga hi ni zvitlhangu zva hombe ni matlhari na va hlomile a kulwa yimpi, va wa hi 6800.
25 A vavanuna va ntamu ni vo tiya hlanha va butho, va lixaka la ka Simeyoni, va wa hi 7100.
26 Ka va ka Levhi va wa hi 4600.
27 Jehoyadha+ i wa hi murangeli wa vana va Aroni,+ niku i wa hi zvin’we ni 3700 wa vavanuna,
28 zvin’we na Zadhoki,+ a jaha ga ntamu ni go tiya hlanha, ni 22 wa varangeli va le ndlwini ya vapapayi vakwe.
29 Ka va ka Bhenjamini, a vamakabye va Sawule,+ ku wa hi ni 3000 wa vavanuna, lava a kutala kabye a kale va nga wonelela zva yindlu ya Sawule.
30 Ka va ka Efrayime ku wa hi ni 20 800 wa vavanuna va ntamu, vo tiya hlanha ni va nduma tindlwini ta vapapayi vabye.
31 Ka khihlanya ga lixaka la ka Manase ku wa hi ni 18 000 wa vavanuna lava va nga hlawulilwe hi mavito a ku ta yimisa Dhavhidha kota hosi.
32 Ka lixaka la ka Isakari ku wa hi ni 200 wa tihloko, lava va nga zwisisa a zvikhati ni ku tiva lezvi Izrayeli a nga fanele ku maha. Hi vona va nga kari va rangela a vamakabye vabye vontlhe.
33 Ka va ka Zebhuloni ku wa hi ni 50 000 wa vavanuna va nga ringana kuya yimpini ni ku zvi kota ku ya fola kasi kulwa yimpi na va hi ni matlhari ya tixaka tontlhe. Vontlhe va wa seketela Dhavhidha hi kutsumbeka.*
34 Ka va ka Naftali ku wa hi ni 1000 wa varangeli, na va hi ni 37 000 wa vavanuna va nga hi ni zvitlhangu zva hombe ni matlhari.
35 Ka va ka Dhani, lava va nga zvi kota ku ya fola kasi kulwa yimpi va wa hi 28 600.
36 Ka va ka Axeri, lava va nga ringana kuya yimpini ni ku zvi kota ku ya fola kasi kulwa yimpi va wa hi 40 000.
37 Hi le tlhatuko wa Jordhani,+ ka va ka Rubheni, ni ka va ka Gadhi, ni ka khihlanya ga lixaka la ka Manase, ku wa hi ni 120 000 wa masochwa ma nga hi ni matlhari ya yimpi ya tixaka tontlhe.
38 Vontlhe a vavanuna lava va wa hi valwi va yimpi, lava va nga hi ni hlanha wa kulwa. Va noya Hebroni hi mbilu yabye yontlhe kasi ku ya yimisa Dhavhidha kota hosi ya Izrayeli yentlhe, niku a vaIzrayeli vontlhe lava van’wani vonawu va wa bohene ka kuxuva kabye* ka ku yimisa Dhavhidha kota hosi.+
39 Va no tshama leyo na Dhavhidha a masiku manharu, na vaga ni kunwa, hakuva a vamakabye vabye va wa va longiselele.
40 Ahandle ka lezvo, lava va nga hanya kusuhani navo, hambu ni lava va nga hanya kule, vo kota Isakari, na Zebhuloni, na Naftali, va no tisa a timbongola, ni makameli, ni mamula, ni tihomu na ti rwele a zvakuga: mapa, ni tibholu* ta makuwu ni ta mauvha yo woma, ni vhinyo, ni mafura. Va no tisa ni tihomu ni tiyivhu to tala, hakuva ku wa hi ni litsako le Izrayeli.
Mitlhamuselo ya lahasi
^ Hi kukongoma: “wu no ambexa”.
^ Kutani: “Vontlhe lava va nga seketela Dhavhidha va wa nga hi na timbilu timbiri”.
^ Kutani: “va wa hi va mbilu yin’we”.
^ Kutani: “zvikhekhetselo”.
