Kronekele wo sangula 17:1-27
17 Zvalezvi Dhavhidha a nga sangula ku tshama lomu ndlwini* yakwe, i no byela muphrofeti Natani,+ aku: “Hi nga wona, mina ndzi tshama lomu ndlwini ya misedhare+ kuveni a arke* ga civhumelwano ca Jehovha gi lomu tendeni.”+
2 Natani i no hlamula Dhavhidha, aku: “Maha ni cihi ci nga mbilwini ya wena, hakuva a Nungungulu wa lisine i zvin’we na wena.”
3 Ka wusiku galego, a mhaka ya Nungungulu yi nota ka Natani, yi taku:
4 “Famba u ya byela a nandza ga mina Dhavhidha, uku: ‘Jehovha i ngalo: “A hi wena u to ndzi akela yindlu ya ku ndzi tshama ka yona.+
5 Hakuva a ndzi se tshama lomu ndlwini kusukela a siku legi ndzi nga humesa a vaIzrayeli Gibhite, kanilezvi ndzi wa famba hi tenda ni tenda ni hi tabhernakeli ni tabhernakeli.*+
6 Ka cikhati contlhe leci ndzi nga fambafamba ni vaIzrayeli vontlhe, ndzi wa tshukile ndzi wutisa ka mun’we wa valamuli va ka Izrayeli lava ndzi va yimisileko kasi va risa vanhu va mina, ndziku: ‘Hikuyini mu nga kala ku ndzi akela a yindlu ya misedhare ke?’”’
7 “Makunu byela a nandza ga mina Dhavhidha, uku: ‘Jehovha wa mabutho i ngalo: “Ndzi ku tekile lomu wuriselweni na u risa ntlhambi kasi u tava murangeli wa vanhu va mina, a vaIzrayeli.+
8 Ndzi tava na wena ni kwihi lomu u toya kona,+ ndzi tlhela ndzi lovisa* valala va wena vontlhe mahlweni ka wena;+ ndzi ta ku maha uva ni vito gi dhumileko a ku fana ni vito ga vanhu va dhumileko va laha misaveni.+
9 Ndzi ta hlawula wutshamu ga ku veka a vanhu va mina, a vaIzrayeli. Va ta tshama ka gona niku va nga ta ha dzukisiwa kambe; a vanhu va kubiha va nga ta ha va xanisa kambe a ku khwatsi hi kale,+
10 kusukela a siku legi ndzi nga yimisa a valamuli hehla ka vanhu va mina, a vaIzrayeli.+ Ndzi ta hlula a valala va wena vontlhe.+ Ahandle ka lezvo, ndza ku byela, ndziku: ‘Jehovha i ta ku akela yindlu.’
11 “‘“Laha a masiku ya wena ma to mbhela, u yava zvin’we ni vakokwani va wena, ndzi ta vhuxa a pswalo* wa wena, a mun’we wa vana va wena,+ ndzi yimisa a wuhosi gakwe gi tiya.+
12 Hi yena a to ndzi akela yindlu+ niku ndzi ta yimisa citshamu cakwe ca wuhosi ci tiya kala kupindzuka.+
13 Ndzi tava papayi wakwe, na yena i tava n’wana wa mina.+ Ndzi nga ta susa a lirandzo la mina li nga mbheliko kakwe+ a ku khwatsi hi lezvi ndzi li susileko ka loyi a fumileko mahlweni ka wena.+
14 Ndzi ta mu yimisa ndlwini ya mina ni mufun’weni wa mina kala kupindzuka;+ ni citshamu cakwe ca wuhosi ci ta tshama kala kupindzuka.”’”+
15 Natani i no hlawutela Dhavhidha a timhaka leti tontlhe ni muwoniso lowu wontlhe.
16 Zvalezvo hosi Dhavhidha i no nghena a tshama mahlweni ka Jehovha, aku: “O, Jehovha Nungungulu, ndzova mina mani? Kona a yindlu ya mina yova yini, ko kala u ndzi chiketa laha?+
17 A ku tsika zvontlhe lezvi u ndzi maheleko, O Nungungulu, wena u tlhela u wula lezvaku a yindlu ya nandza ga wena yi ta simama kala ka cikhati ca le kule ca ha tako;+ u ndzi wonisile ku khwatsi hi loku ndzi hi munhu a faneleko ku tlakusiwa,* O Jehovha Nungungulu.
18 A nandza ga wena Dhavhidha ga ha ta ku byela yini hi wudzundzo legi u ndzi nyikileko ke? Wena wa gi tiva khwatsi a nandza ga wena.+
19 O Jehovha, hi kota ya nandza ga wena ni kurandza ka mbilu ya wena, u mahile a zvilo zvontlhe lezvi zva hombe hi ku tivekisa a wukulu ga wena.+
20 O Jehovha, a ku na mun’wani wo fana na wena+ niku a ku na Nungungulu ahandle ka wena;+ zvontlhe lezvi hi zvi zwileko hi tindleve ta hina zvi tiyisa a mhaka leyi.
21 Hi gihi gin’wani tiko laha misaveni gi fanako ni vanhu va wena, a vaIzrayeli ke?+ A Nungungulu wa lisine i no va tlhatlhisa kota vanhu vakwe.+ U ti mahele vito hi mitiro ya wena ya hombe ni yo hlamalisa,+ u hlongola a matiko mahlweni ka vanhu va wena+ lava u va tlhatlhisileko Gibhite.
22 U mahile a vanhu va wena, a vaIzrayeli, vava vanhu va wena kala kupindzuka;+ wena, Jehovha, uve Nungungulu wabye.+
23 Makunu, Jehovha, a zvitsumbiso lezvi u zvi mahileko xungetano hi nandza ga wena ni yindlu ya gona zvi wave zva lisine kala kupindzuka, niku maha kota lezvi u tsumbisileko.+
24 A vito ga wena gi wa simame gi tlhela gi tlakusiwa+ kala kupindzuka, kasi a vanhu vaku: ‘Jehovha wa mabutho, a Nungungulu wa Izrayeli, i Nungungulu ka Izrayeli’; a yindlu ya nandza ga wena Dhavhidha yi wa yimisiwe yi tiya mahlweni ka wena.+
25 Hakuva wena, Nungungulu wa mina, u tivisile a nandza ga wena lezvaku u na ni kungo ga ku gi akela yindlu. Hi cigelo leco, a nandza ga wena ga tiya a ku khongela ka wena.
26 O Jehovha, wena u Nungungulu wa lisine, niku u tsumbisile a zvilo lezvi zva zvinene xungetano hi nandza ga wena.
27 Hikwalaho, zvi wa ku tsakise a ku katekisa a yindlu ya nandza ga wena niku yi wa simame kala kupindzuka mahlweni ka wena, hakuva wena, Jehovha, u yi katekisile niku u ta yi katekisa kala kupindzuka.”
Mitlhamuselo ya lahasi
^ Kutani: “palácio”.
^ Kuzvilava zvi wula ku: “ndzi wa suka hi ka wutshamu legi a tenda gi nga gwimbilwe ka gona ndziya ka gin’wani, ni ka wutshamu legi va nga tshama ka gona ndziya ka gin’wani”.
^ Hi kukongoma: “tsema”.
^ Hi kukongoma: “mbewu”.
^ Kutani: “wanuna wa ciyimo ca le hehla”.