Kronekele wo sangula 19:1-19
19 Hi ndzhako ka cikhati, Nahaxi, a hosi ya vaAmoni, i nofa; a n’wana wakwe i nova hosi cikhundleni cakwe.+
2 Makunu Dhavhidha i te: “Ndzi ta mu kombisa lirandzo li nga mbheliko+ Hanuna, a n’wana wa Nahaxi, hakuva a papayi wakwe i ndzi kombisile lirandzo li nga mbheliko.” Hikwalaho, Dhavhidha i no rumela zvirun’wa kasi zvi ya mu chavelela hi lezvi a nga felwe hi papayi wakwe. Kanilezvi laha a malandza ya Dhavhidha ma nga chikela tikweni ga vaAmoni+ kasi ku chavelela Hanuna,
3 a tihosana ta vaAmoni ti no byela Hanuna, tiku: “U alakanya lezvaku Dhavhidha o dzundza papayi wa wena hi ku rumela vanhu va ta ku chavelela ke? A wu zvi woni ku a malandza yakwe ma tela ku ta hlola ni ku piyara tiko ma tlhela ma ku hahlula ke?”
4 Hikwalaho, Hanuna i no khoma malandza ya Dhavhidha a ma tsema malevhu+ a tlhela a tsema tinguwo tabye hi laha cikari ti gama hi lomu tinyongeni ta wona, a gumesa a ma hlongola.
5 A cikhati leci Dhavhidha a nga byeliwa lezvi zvi nga ma humelela, i no tekela ku rumela vavanuna va ma khinga, hakuva ma wa mahilwe zvilo zva tingana nguvhu. A hosi yi te ngalo kabye: “Tshamani Jeriko+ kala a malevhu ya n’wina ma kula, hi kona mu to wuya.”
6 Hi kufamba ka cikhati, a vaAmoni va no wona lezvaku va byalile livengo cikari kabye na Dhavhidha. Hikwalaho, Hanuna ni vaAmoni va no rumela a 1000 wa titalenta* ta prata kasi ku lugara tikareta ni ku thola vakhileli va mahaxi le Mezopotamia,* ni Aramu-Maaka, ni Zobha.+
7 Hikwalaho, va no lugara a 32 000 wa tikareta va tlhela va thola a hosi ya Maaka ni vanhu va yona. Andzhako ka lezvo, va noya va ya gova mahlweni ka Medhebha.+ A vaAmoni va no huma lomu madhoropeni yabye va ya hlengeletana kasi kulwa yimpi.
8 Laha Dhavhidha a ngazwa lezvo, i no rumela Jowabe+ ni butho gontlhe zvin’we ni masochwa yakwe ya ntamu nguvhu.+
9 A vaAmoni va no huma va fola laha nyangweni ya dhoropa kasi kulwa, lezvo a tihosi leti ti nga tile na ti yimile toce laha libalangeni.
10 A cikhati leci Jowabe a nga wona lezvaku a masochwa ya valala ma mu tela hi phambeni ni ndzhako, i no hlawula a masochwa yo kari lawa ya tinhenha ya vaIzrayeli a ma folisa kasi malwa ni vaSiriya.+
11 A vavanuna lava van’wani i no va nyikela canjeni ga makabye wakwe Abhixayi+ kasi a va folisa valwa ni vaAmoni.
12 Hi kulandzela i te ngalo: “Loku a vaSiriya+ va ndzi peza, tana u ta ndzi tlhatlhisa; kanilezvi loku a vaAmoni va ku peza, ndzi tata ndzi ta ku tlhatlhisa.
13 Hi fanele kuva ni ntamu ni ku tiya hlanha+ hi lwela vanhu va hina ni madhoropa ya Nungungulu wa hina; Jehovha i ta maha lezvi zvi nga zvinene mahlweni kakwe.”
14 Jowabe ni vavanuna vakwe va noya mahlweni kasi va yalwa ni vaSiriya, niku a vaSiriya va no tsutsuma mahlweni kakwe.+
15 A cikhati leci a vaAmoni va nga wona lezvaku a vaSiriya va tsutsumile, vonawu va no tsutsuma Abhixayi, a makabye wa Jowabe, va nghena dhoropeni. Andzhako ka lezvo, Jowabe i no tlhela Jerusalema.
16 Laha a vaSiriya va nga wona lezvaku va hlulilwe hi vaIzrayeli, va no rumela a zvirun’wa zvi ya vitana a vaSiriya va le tlhatuko wa Congo*+ lava va nga rangelwa hi Xofake, a murangeli wa butho ga Hadhadhezera.+
17 A cikhati leci Dhavhidha a nga byeliwa a mahungu lawo, i no tekela ku hlengeleta a vaIzrayeli vontlhe a tlhatuka Jordhani a va yela na a longile kulwa navo. Dhavhidha i no huma a khinga vaSiriya, niku va nolwa naye.+
18 Kanilezvi a vaSiriya va no tsutsuma a vaIzrayeli. Dhavhidha i no daya a 7000 wa vafambisi va tikareta ta yimpi ni 40 000 wa masochwa ya vaSiriya ya ku famba hi minenge; i no daya Xofake, a murangeli wa butho.
19 A cikhati leci a malandza ya Hadhadhezera ma nga wona lezvaku ma hlulilwe hi Izrayeli,+ ma no tekela ku maha kurula na Dhavhidha, ma fumelwa hi yena;+ Siriya a nga ha zvi lavangi kambe a ku vhuna a vaAmoni.
