Kronekele wo sangula 23:1-32
23 Laha Dhavhidha a nga khosahele, a wutomi gakwe na gi hi kusuhani ni kumbhela,* i no yimisa a n’wana wakwe Solomoni kota hosi ya Izrayeli.+
2 Andzhako ka lezvo, i no hlengeleta a tihosana tontlhe ta Izrayeli, ni vapristi,+ ni vaLevhi.+
3 Ku no hlayiwa a vaLevhi va kusukela ka 30 wa malembe kuya hehla.+ A ntsengo wabye, a ntsengo wontlhe wu hlayilweko, hi mun’we mun’we, wuve 38 000.
4 Cikari kabye, a 24 000 va wa tira kota vawoneleli va kuakiwa ka yindlu ya Jehovha, a 6000 va wa hi tihosana ni valamuli,+
5 a 4000 va wa hi vagadhi va tinyangwa,+ ni 4000 va wa dhumisa+ Jehovha hi zvibya lezvi Dhavhidha a nga te: “Ndzi zvi mahele ku dhumisa hi zvona.”
6 Dhavhidha i no va xaxameta* hi mitlawa,+ hi kuya hi vana va Levhi: Gerxoni, na Kohate, na Merari.+
7 Ka va ka Gerxoni ku wa hi na Ladhani na Ximeyi.
8 A vana va Ladhani ku wa hi Jehiyeli, a murangeli, na Zetamu, na Joyeli,+ vanharu.
9 A vana va Ximeyi ku wa hi Xelomote, na Haziyeli na Harani, vanharu. Leti ti wa hi tihloko ta tiyindlu ta vapapayi ta ka Ladhani.
10 A vana va Ximeyi ku wa hi Jahate, na Zina,* na Jewuxa, na Bheriya. Lava va mune va wa hi vana va Ximeyi.
11 Jahate i wa hi yena hloko, ku landzela Ziza. Kanilezvi, kota lezvi Jewuxa na Bheriya va nga hi hava vana vo tala va vafana, va no hlayiwa kota yindlu yin’we ya vapapayi yi nga maha ntiro wun’we.
12 A vana va Kohate ku wa hi Amramu, na Izhare,+ na Hebroni, na Uziyeli,+ mune.
13 A vana va Amramu ku wa hi Aroni+ na Mosi.+ Kanilezvi Aroni ni vana vakwe va no hambanisiwa ni van’wani kala kupindzuka+ kasi va basisa a Wutshamu go Basabasa, ni ku nyikela miphahlo mahlweni ka Jehovha, va mu tirela ni ku wula zvikatekiso vitweni Gakwe contlhe cikhati.+
14 Xungetano hi Mosi, a munhu wa Nungungulu wa lisine, a vana vakwe va no hlayiwa kota va lixaka la vaLevhi.
15 A vana va Mosi ku wa hi Gerxomi+ na Eliyezeri.+
16 Ka vana va Gerxomi, Xebhuweli+ i wa hi yena hloko.
17 Ka vana va Eliyezeri, Rehabhiya+ i wa hi yena hloko. Eliyezeri a nga vangi ni van’wani vana va vafana, kanilezvi Rehabhiya i wa hi ni vana vo tala nguvhu va vafana.
18 Ka vana va Izhare,+ Xelomite+ i wa hi yena hloko.
19 A vana va Hebroni ku wa hi Jeriya, a hloko, na Amariya, a wa wumbiri, na Jahaziyeli, a wa wunharu, na Jekameyamu,+ a wa wumune.
20 A vana va Uziyeli+ ku wa hi Mika, a hloko; na Ixiya, a wa wumbiri.
21 A vana va Merari ku wa hi Mali na Muxi.+ A vana va Mali ku wa hi Eleyazari na Kixi.
22 Eleyazari i nofa na a nga hi na vana va vafana, i wova ni vanhanyana ntsena. Hikwalaho, a vana va Kixi, va nga vamakabye vabye, va no va teka vava vasati vabye.
23 A vana va Muxi ku wa hi Mali, na Edhera, na Jeremote, vanharu.
24 Lava va wa hi vana va Levhi hi ku xaxameta hi tiyindlu ta vapapayi vabye, hi tihloko ta tiyindlu ta vapapayi. Va no tsalelwa, va hlayiwa va tlhela va xaxametwa hi mavito yabye. Hi vona va nga kari va maha mitiro ya yindlu ya Jehovha niku va wa sukela ka 20 wa malembe kuya hehla.
25 Hakuva Dhavhidha i wa te: “Jehovha, a Nungungulu wa Izrayeli, i va nyikile kuhumula a vanhu vakwe+ niku i ta tshama Jerusalema kala kupindzuka.+
26 A ku tsika lezvo, a vaLevhi zvi nga ta lava ku va rwala a tabhernakeli kutani zvigotso zva ntiro wa gona.”+
27 A vaLevhi va kusukela ka 20 wa malembe kuya hehla va no hlayiwa hi ku landza zvileletelo zva Dhavhidha zvo gumesa.
28 A ntiro wabye ku wa hi ku vhunetela a vana va Aroni+ ka mitiro ya yindlu ya Jehovha, ni ku hlayisa a mitsendzele,+ ni tisala to gela ka tona, ni ku basisa zvilo zvontlhe zvo basa, ni ku maha ni cihi ci nga laveka ntirweni wa yindlu ya Nungungulu wa lisine.
29 Va wa vhunetela ka tipawa ta munyikelo,+ ni ka mapa ma sililweko khwatsi ya munyikelo wa tindzhoho, ni ka tipawa ta zviphamana ti nga hiko na comelo,+ ni ka tipawa to wociwa, ni ka mapa ma vhuvilweko na ma patsilwe ni mafura,+ ni ka tontlhe tipimo ta ku pima kutala ni kukula.
30 Va wa fanele ku yima, mixo ni mixo,+ va bonga ni ku dhumisa Jehovha va tlhela va maha zvezvo ni gambo.+
31 Va wa vhunetela ni ka cihi cikhati ku nga nyikelwa a miphahlo ya kuhiswa mahlweni ka Jehovha hi masabhadho,+ ni ka tihweti tiswa,+ ni ka zvikhati zva mibuzo+ hi ku landza a ntsengo lowu wu nga laveka hi kuya hi nayo wa kona; va wa maha lezvo mahlweni ka Jehovha hi kukhandzakanya.
32 Va wa khatalela kambe a mitiro yabye tendeni ga mutlhangano, ni wutshan’wini go basa, va tlhela va vhunetela a vamakabye vabye, a vana va Aroni, ntirweni wa yindlu ya Jehovha.
Mitlhamuselo ya lahasi
^ Hi kukongoma: “khosahele na a tele hi masiku”.
^ Kutani: “avanyisela”.
^ Ka vs. 11 i vitaniwa ku hi Ziza.
