Kronekele wo sangula 26:1-32
26 A mitlawa ya vagadhi va tinyangwa+ hi leyi: Ka va ka Kora, ku wa hi na Mexelemiya,+ a n’wana wa Kore, wa vana va Asafa.
2 A vana va Mexelemiya ku wa hi Zakariya, a matewula; na Jedhiyayeli, a wa wumbiri; na Zebhadhiya, a wa wunharu; na Jataniyeli, a wa wumune;
3 na Elami, a wa wutlhanu; na Jehohanani, a wa wu 6; na Eliyehowenayi, a wa wu 7.
4 Obhed-Edhomi i nova ni vana: Xemaya, a matewula; na Jehozabhadha, a wa wumbiri; na Jowa, a wa wunharu; na Sakare, a wa wumune; na Netaneli, a wa wutlhanu;
5 na Amiyeli, a wa wu 6; na Isakari, a wa wu 7; na Pewuletayi, a wa wu 8; hakuva Nungungulu i wa mu katekisile.
6 Xemaya, a n’wana wakwe, i nova ni vana va nga hi tihosana ta tiyindlu ta vapapayi vabye, hakuva va wa hi vavanuna va ntamu, va nga hi ni wutlhari ga ku tira.
7 A vana va Xemaya ku wa hi Otni, na Rafayeli, na Obhedhi, na Elzabhadha. A vamakabye vakwe, Elihu na Semakiya, vonawu va wa hi ni wutlhari ga ku tira.
8 Vontlhe lava va wa hi vana va Obhed-Edhomi; vona, ni vana vabye, ni vamakabye vabye va wa hi vavanuna va nga hi ni wutlhari ga ku tira, na va ringanelwa hi ku tira; 62 va nga lumba Obhed-Edhomi.
9 Mexelemiya+ i wa hi ni vana ni vamakabye, 18 wa vavanuna va nga hi ni wutlhari ga ku tira.
10 Hosa, wa vana va Merari, ive ni vana. Ximri i wa hi yena hloko, hakuva hambu lezvi a nga kala a nga hi matewula, a papayi wakwe i no mu yimisa kota hloko;
11 na Hilkiya, a wa wumbiri; na Tibhaliya, a wa wunharu; na Zakariya, a wa wumune. Vontlhe a vana va Hosa ni vamakabye vakwe va wa hi 13.
12 A tihloko ta mitlawa leyi ya vagadhi va tinyangwa ti wa hi ni mitiro ti nga fanele ku yi tatisa ntirweni wa yindlu ya Jehovha a ku khwatsi hi vamakabye vabye.
13 Hikwalaho, va noba tihlolo+ cikari ka tiyindlu ta vapapayi, leti ta titsongwani ni leti ta hombe, kasi va tiva ku himani a to tira ka nyangwa ni nyangwa.
14 A hlolo ya tlhelo ga mutsuwuka-gambo yi no khoma Xelemiya. Hi kulandzela, va noba tihlolo va bela Zakariya, a n’wana wakwe, a sungukati go tlhariha, a se nyikiwa a tlhelo ga n’walungu.*
15 Obhed-Edhomi i no kuma a tlhelo ga dzonga,* niku a vana vakwe+ va no nyikiwa ntiro wa ku hlayisa a yindlu ya titshomba.
16 Xupima na Hosa+ va no kuma a tlhelo ga mupela-gambo, kusuhani ni Nyangwa ya Xaleketa, hi laha ndleleni leyi yi kandzihako. A ntlawa wun’we wa vagadhi wu wa hi tlhelweni ga wun’wani.
17 Ku wa hi ni 6 wa vaLevhi hi tlhelo ga mutsuwuka-gambo, niku siku ni siku ku wa hi ni mune wa vaLevhi hi tlhelo ga n’walungu ni mune hi tlhelo ga dzonga. Lomu tindlwini ta titshomba+ va wa tshama hi vambiri-vambiri.
18 Laha ligumbagumbeni, hi tlhelo ga mupela-gambo, ku wa hi ni mune wa vagadhi hi le ndleleni+ ni vambiri laha ligumbagumbeni.
19 Leyi yive mitlawa ya vagadhi va tinyangwa ya vana va Kora ni vana va Merari.
20 Ka vaLevhi, Ahija i wa hi muhlayisi wa titshomba ta yindlu ya Nungungulu wa lisine ni wa titshomba ta zvilo zvi basisilweko.*+
21 A vana va Ladhani: ka vana va muGerxoni, loyi a humileko hi ka Ladhani, lava va nga hi tihloko ta tiyindlu ta vapapayi ta Ladhani, a muGerxoni, ku wa hi Jehiyeli,+
22 ni vana va Jehiyeli ku wa hi Zetamu ni makabye wakwe Joyeli. Vona va wa hi vahlayisi va titshomba ta yindlu ya Jehovha.+
23 Ka va ka Amramu, ni ka va ka Izhare, ni ka va ka Hebroni, ni ka va ka Uziyeli,+
24 Xebhuweli, a n’wana wa Gerxomi, a n’wana wa Mosi, i wa hi murangeli wa vahlayisi va tiyindlu ta titshomba.
25 Xungetano hi vamakabye vakwe va humako hi ka Eliyezeri,+ ku wa hi na Rehabhiya,+ a n’wana wakwe; na Jexaya, n’wana wakwe; na Joramu, a n’wana wakwe; na Zikri, a n’wana wakwe, na Xelomote, a n’wana wakwe.
26 Xelomote loyi, ni vamakabye vakwe, hi vona va nga kari va wonelela a titshomba tontlhe ta zvilo zvi basisilweko,+ lezvi Hosi Dhavhidha,+ ni tihloko ta tiyindlu ta vapapayi,+ ni varangeli va mitlawa ya 1000 wa vanhu ni ya 100 wa vanhu, ni varangeli va butho va nga zvi basisile.
27 A zvilo zvo kari zva le yimpini+ ni zva muphango+ va no zvi basisa kasi ku hlayisa hi zvona a yindlu ya Jehovha.
28 Ahandle ka lezvo, ku wa hi ni zvontlhe lezvi Samuweli, a muwoni,+ na Sawule, a n’wana wa Kixi, na Abneri,+ a n’wana wa Neri, na Jowabe,+ a n’wana wa Zeruya+ va nga zvi basisile. Ni cihi leci a munhu a nga ci basisa ci wa hlayisiwa hi Xelomite* ni vamakabye vakwe.
29 Ka va ka Izhare,+ Kenaniya ni vana vakwe va wa yimiselwe ku maha yin’wani mitiro ya le handle kota tihosana ni valamuli+ va Izrayeli.
30 Ka va ka Hebroni,+ Haxabhiya ni vamakabye vakwe, 1700 wa vavanuna va nga hi ni wutlhari ga ku tira, va wa wonelela Izrayeli cipandzeni ca mupela-gambo wa Jordhani ka mitiro yontlhe ya Jehovha ni ya hosi.
31 Ka va ka Hebroni, Jerija+ i wa hi hloko ya va ka Hebroni hi kuya hi pswalo wa yindlu ya vapapayi vabye. Hi lembe ga wu 40 ga kufuma ka Dhavhidha,+ va no hloliwa ku kumiwa cikari kabye a vavanuna va ntamu, va nga hi ni wutlhari ga ku tira le Jazera+ tikweni ga Gileyadhe.
32 A vamakabye vakwe va wa hi 2700 wa vavanuna va nga hi ni wutlhari ga ku tira tlhelo tihloko ta tiyindlu ta vapapayi. Hikwalaho, hosi Dhavhidha i no va yimisa hehla ka va ka Rubheni, ni va ka Gadhi, ni khihlanya ga lixaka la ka Manase timhakeni tontlhe ti yelanako ni Nungungulu wa lisine ni hosi.
Mitlhamuselo ya lahasi
^ Kutani: “norte”.
^ Kutani: “sul”.
^ Kutani: “zvilo zvi nyikelweko”.
^ Ka vs. 25 ni 26 i vitaniwa ku hi Xelomote.
