Kronekele wo sangula 27:1-34
-
Tihosana leti ti nga kari ti maha a ntiro wa hosi (1-34)
27 Xungetano hi ntsengo wa vaIzrayeli — a tihloko ta tiyindlu ta vapapayi, ni varangeli va mitlawa ya 1000 wa vanhu ni ya 100 wa vanhu,+ ni malandza yabye lawa ma nga tirela hosi+ timhakeni tontlhe ti yelanako ni mitlawa leyi yi nga nghena ni ku huma hweti ni hweti ka tihweti tontlhe ta lembe — a ntlawa ni ntlawa wu wa hi ni 24 000 wa vavanuna.
2 A murangeli wa ntlawa wo sangula, wa hweti yo sangula, ku wa hi Jaxobheyamu,+ a n’wana wa Zabdhiyeli, niku ka ntlawa wakwe ku wa hi ni 24 000 wa vavanuna.
3 Ka vana va Perezi,+ yena i wa hi hloko ya varangeli vontlhe va mitlawa leyi yi nga avelwe ku tira ka hweti yo sangula.
4 A murangeli wa ntlawa wa hweti ya wumbiri ku wa hi Dhodhayi,+ a muAhohe,+ ni ntlawa wakwe. Mitloti i wa hi murangeli niku ka ntlawa wakwe ku wa hi ni 24 000 wa vavanuna.
5 A murangeli wa ntlawa wa wunharu, lowu wu nga avelwe ku tira hi hweti ya wunharu, ku wa hi Bhenaya,+ a n’wana wa Jehoyadha,+ a hosana ya vapristi, niku ka ntlawa wakwe ku wa hi ni 24 000 wa vavanuna.
6 Bhenaya loyi, i wa hi mun’we wa 30 wa masochwa lawa ya tinhenha tlhelo murangeli wa wona; niku a ntlawa wakwe wu wa rangelwa hi Amizadhabha, a n’wana wakwe.
7 A murangeli wa wumune, wa hweti ya wumune, ku wa hi Asaheli,+ a makabye wa Jowabe,+ niku andzhako kakwe ku wa landzela Zebhadhiya, a n’wana wakwe niku ka ntlawa wakwe ku wa hi ni 24 000 wa vavanuna.
8 A murangeli wa wutlhanu, wa hweti ya wutlhanu, ku wa hi Xamhuta, a muIzrahiya, niku ka ntlawa wakwe ku wa hi ni 24 000 wa vavanuna.
9 A murangeli wa wu 6, wa hweti ya wu 6, ku wa hi Ira,+ a n’wana wa Ikexa, a muTekowa,+ niku ka ntlawa wakwe ku wa hi ni 24 000 wa vavanuna.
10 A murangeli wa wu 7, wa hweti ya wu 7, ku wa hi Helezi,+ a muPeloni, wa va ka Efrayime, niku ka ntlawa wakwe ku wa hi ni 24 000 wa vavanuna.
11 A murangeli wa wu 8, wa hweti ya wu 8, ku wa hi Sibhekayi,+ a muHuxate, wa ngango wa ka Zera,+ niku ka ntlawa wakwe ku wa hi ni 24 000 wa vavanuna.
12 A murangeli wa wu 9, wa hweti ya wu 9, ku wa hi Abhiyezeri,+ a muAnatote,+ wa va ka Bhenjamini, niku ka ntlawa wakwe ku wa hi ni 24 000 wa vavanuna.
13 A murangeli wa wu 10, wa hweti ya wu 10, ku wa hi Maharayi,+ a muNetofate, wa ngango wa ka Zera,+ niku ka ntlawa wakwe ku wa hi ni 24 000 wa vavanuna.
14 A murangeli wa wu 11, wa hweti ya wu 11, ku wa hi Bhenaya,+ a muPiratoni, wa vana va Efrayime, niku ka ntlawa wakwe ku wa hi ni 24 000 wa vavanuna.
15 A murangeli wa wu 12, wa hweti ya wu 12, ku wa hi Heldhayi, a muNetofate, wa ngango wa Otniyeli, niku ka ntlawa wakwe ku wa hi ni 24 000 wa vavanuna.
16 Lava va wa hi varangeli va tixaka ta ka Izrayeli: Ka va ka Rubheni, a murangeli ku wa hi Eliyezeri, a n’wana wa Zikri; ka va ka Simeyoni ku wa hi Xefatiya, a n’wana wa Maaka;
17 ka va ka Levhi ku wa hi Haxabhiya, a n’wana wa Kemuweli; ka va ka Aroni ku wa hi Zadhoki;
18 ka va ka Judha ku wa hi Elihu,+ a mun’we wa vamakabye va Dhavhidha; ka va ka Isakari ku wa hi Omri, a n’wana wa Mikayeli;
19 ka va ka Zebhuloni ku wa hi Ixmaya, a n’wana wa Obhadhiya; ka va ka Naftali ku wa hi Jerimote, a n’wana wa Azriyeli;
20 ka va ka Efrayime ku wa hi Hoxeya, a n’wana wa Azaziya; ka khihlanya ga lixaka la ka Manase ku wa hi Joyeli, a n’wana wa Pedhaya;
21 ka khihlanya ga lixaka la ka Manase, tikweni ga Gileyadhe, ku wa hi Idho, a n’wana wa Zakariya; ka va ka Bhenjamini ku wa hi Jaasiyeli, a n’wana wa Abneri;+
22 ka va ka Dhani ku wa hi Azareli, a n’wana wa Jerohamu. Leti ti wa hi tihosana ta tixaka ta ka Izrayeli.
23 Dhavhidha a nga hlayangi lava va nga hi hasi ka 20 wa malembe, hakuva Jehovha i wa tsumbisile lezvaku i ta andzisa va ka Izrayeli va talisa ku khwatsi tinyeleti ta matilo.+
24 Jowabe, a n’wana wa Zeruya, i wa sangulile ku hlaya, kanilezvi a nga mbhetangi. Hi kota ya kuhlaya loko, a zanga ya Nungungulu yi nota hehla ka Izrayeli,*+ niku a ntsengo wabye a wu tsaliwangi bhukwini ga matimu ya cikhatini ca hosi Dhavhidha.
25 Loyi a nga wonelela a titshomba ta hosi+ ku wa hi Azmavhete, a n’wana wa Adhiyeli. Jonatani, a n’wana wa Uziya, i wa wonelela a tiyindlu ta titshomba le masin’wini, ni madhoropeni, ni zvidhoropaneni, ni lomu tikhokholeni.*
26 Loyi a nga wonelela a varimi va masimu ku wa hi Ezri, a n’wana wa Kelubhe.
27 Ximeyi, a muRamate, i wa wonelela a zvivhina;* loyi a nga wonelela a mihandzu ya zvivhina kasi ku maha vhinyo ku wa hi Zabdhi, a muXifma.
28 Loyi a nga wonelela a miolivha ni mikuwu+ le Xefela+ ku wa hi Bhaali-Hanani, a muGedhera; loyi a nga wonelela a kumahiwa ka mafura ku wa hi Jowaxi.
29 Loyi a nga wonelela a tihomu leti ti nga gela Xaroni+ ku wa hi Xitrayi, a muXaroni. Xafate, a n’wana wa Adlayi, i wa wonelela a tihomu leti ti nga hi nkoveni.
30 Loyi a nga wonelela a makameli ku wa hi Obhile, wa lixaka la ka Ixmayeli; loyi a nga wonelela a timbongola leti ta mikati ku wa hi Jehedheya, a muMeronote.
31 Loyi a nga wonelela mitlhambi ku wa hi Jazizi, a muHagri. Vontlhe lava va wa hi vahlayisi va tshomba ya hosi Dhavhidha.
32 Jonatani,+ a n’wana wa makabye wa Dhavhidha, i wa hi wanuna wa kuzwisisa. I wa tira kota sungukati tlhelo matsalani. Jehiyeli, a n’wana wa Hakmoni, i wa hi muhlayisi wa vana va hosi.+
33 Ahitofeli+ i wa hi sungukati ga hosi. Huxayi,+ a muArke, i wa hi munghana wa hosi.
34 Andzhako ka Ahitofeli ku wa landzela Jehoyadha, a n’wana wa Bhenaya,+ na Abhiyatari.+ Jowabe+ i wa hi murangeli wa butho ga hosi.
Mitlhamuselo ya lahasi
^ Hi kukongoma: “a zanga yi wa hi hehla ka Izrayeli”.
^ Kutani: “torres”.
^ A zvivhina masimu ya tisinya leti ti pswalako mauvha.
