Kronekele wo sangula 29:1-30
29 Hi kulandzela, hosi Dhavhidha i no byela a bandla gontlhe, aku: “A n’wana wa mina, Solomoni, loyi Nungungulu a mu hlawulileko,+ wa ha hi muswa niku a nga na wutlhari*+ kuveni a ntiro wa hombe, hakuva a tempeli* leyi a hi ya munhu kanilezvi ya Jehovha Nungungulu.+
2 Ndzi ti karatile hi ntamu wa mina wontlhe ndzi longiselela a yindlu ya Nungungulu wa mina. Ndzi longisele a ouro yi to maha mitiro ya ouro, ni prata yi to maha mitiro ya prata, ni kobre yi to maha mitiro ya kobre, ni tisimbi ti to maha mitiro ya tisimbi,+ ni mapulango+ ma to maha mitiro ya mapulango, ni maribye ya onikisi, ni maribye lawa ma to nameketelwa lomu ka argamasa, ni zviribyana zva mivalavala zvo sasekisa hi zvona, ni tontlhe tixaka ta maribye ya lisima, ni maribye yo tala ya alabhasteri.
3 A ku tsika lezvo, kota lezvi ndzi randzako a yindlu ya Nungungulu wa mina,+ ndza nyikela kambe ni tshomba ya mina+ ya ouro ni prata ka yindlu ya Nungungulu wa mina kasi ku engetela zvontlhe lezvi ndzi longiseleleko a yindlu yo basa,
4 zvin’we ni 3000 wa titalenta* ta ouro ya le Ofira,+ ni 7000 wa titalenta ta prata yi hlutilweko kasi ku nameketela lomu makhurisini ya tiyindlu,
5 ni ouro yi to maha mitiro ya ouro, ni prata yi to maha mitiro ya prata, ni zva mitiro yontlhe yi to mahiwa hi vameseri. Makunu himani nyamutlha a ti nyikelako kasi ku neha cinyikiwo ka Jehovha ke?”+
6 Hikwalaho, a tihosana ta tiyindlu ta vapapayi, ni tihosana ta tixaka ta ka Izrayeli, ni varangeli va mitlawa ya 1000 wa vanhu ni ya 100 wa vanhu,+ ni varangeli va mabhindzu ya hosi+ va no ti nyikela hi kuzvirandza.
7 Kasi ku vhunetela ntiro wa yindlu ya Nungungulu wa lisine, va no nyikela a 5000 wa titalenta* ta ouro, ni 10 000 wa tidharike,* ni 10 000 wa titalenta ta prata, ni 18 000 wa titalenta ta kobre, ni 100 000 wa titalenta ta tisimbi.
8 Ni wihi loyi a nga hi ni maribye ya lisima i no ma nyikela tshombeni ya yindlu ya Jehovha, yi nga wonelelwa hi Jehiyeli,+ a muGerxoni.+
9 A vanhu va no tsaka hi ku nyikela a minyikelo leyo ya kuzvirandza, hakuva va wa nyikela a minyikelo ya kuzvirandza ka Jehovha hi mbilu yontlhe.+ Hosi Dhavhidha yenawu i no tsaka nguvhu.
10 Andzhako ka lezvo, Dhavhidha i no dhumisa Jehovha mahlweni ka bandla gontlhe. Dhavhidha i te: “Ngha u dhumiswa, O Jehovha, Nungungulu wa Izrayeli, a papayi wa hina, kusukela kupindzukeni kala kupindzuka.
11 A wukulu,+ ni ntamu,+ ni kusaseka, ni kungangamela, ni wudzundzo,+ zvi lumba wena, Jehovha, hakuva zvontlhe lezvi zvi nga le matilweni ni laha misaveni zva wena.+ A mufumo wa wena Jehovha.+ Hi wena u ti tlakusako kota hloko hehla ka zvontlhe.
12 A titshomba ni kungangamela zvita hi ka wena+ niku u fumela zvilo zvontlhe.+ Canjeni ga wena ku na ni ntamu+ ni wunhenha,+ niku a canja ga wena ga zvi kota ku kulisa+ ni ku nyika ntamu ka vontlhe.+
13 Makunu, Nungungulu wa hina, ha ku bonga ni ku dhumisa a vito ga wena go saseka.
14 “Hambulezvo, ndzova mina mani, niku a vanhu va mina vova vamani ko kala hi yima hi nyikela a minyikelo ya kuzvirandza yo kota leyi? Hakuva zvontlhe zvita hi ka wena, ni lezvi hi ku nyikileko zvita hi canjeni ga wena.
15 Hakuva hi valuveli ni vahlavha mahlweni ka wena, a ku khwatsi hi vontlhe a vakokwani va hina.+ Hakuva a masiku ya hina laha misaveni ma fana ni ndzhuti+ — a ku na kutsumba.
16 O Jehovha, Nungungulu wa hina, a tshomba yontlhe leyi hi yi longiseleko kasi ku ku akela yindlu ya vito ga wena go basa yita hi canjeni ga wena niku yontlhe yi lumba wena.
17 O Nungungulu wa mina, ndza zvi tiva khwatsi lezvaku wena wa hlola mbilu+ niku u xalaliswa hi kutsumbeka.*+ Ndzi nyikele zvontlhe zvilo lezvi hi kuzvirandza hi kululama* ka mbilu ya mina niku ndza nengela hi ku wona a vanhu va wena lava va nga laha na va nyikela ka wena a minyikelo ya kuzvirandza.
18 O Jehovha, Nungungulu wa Abrahama, ni wa Isaka, ni wa Izrayeli, a vakokwani va hina, hlayisa a kuxuva loku ni maalakanyo lawa timbilwini ta vanhu va wena kala kupindzuka, u kongomisa a timbilu tabye ka wena.+
19 Mu nyike a mbilu yo mbhelela+ a n’wana wa mina, Solomoni, kasi a hlayisa a zvileletelo zva wena,+ ni zvikhumbuxeto zva wena, ni milayo ya wena ni ku maha zvontlhe a zvilo lezvi ni ku aka tempeli* leyi ndzi yi longiseleleko.”+
20 Hi kulandzela, Dhavhidha i no byela a bandla gontlhe, aku: “Makunu dhumisani Jehovha, a Nungungulu wa n’wina.” Ni bandla gontlhe gi no dhumisa Jehovha, a Nungungulu wa vakokwani vabye, gi korama ni ku khizama mahlweni ka Jehovha ni ka hosi.
21 Ka siku gi nga landzela, va no simama ku maha miphahlo ka Jehovha ni ku nyikela ka Jehovha a minyikelo ya kuhiswa:+ 1000 wa zvidhunana zva tihomu, ni 1000 wa tiyivhu ta vamatsune, ni 1000 wa tiyivhana ta vamatsune, ni minyikelo ya kona ya zvakunwa.+ Va no maha miphahlo yo tala, va mahela a Izrayeli yentlhe.+
22 Ka siku lego, va no simama kuga ni kunwa mahlweni ka Jehovha na va tsakile nguvhu.+ Hi khati ga wumbiri, va no yimisa Solomoni, a n’wana wa Dhavhidha, kota hosi va tlhela va mu tota mahlweni ka Jehovha kota murangeli,+ na Zadhoki yenawu kota mupristi.+
23 Solomoni i no tshama citshan’wini ca wuhosi ca Jehovha+ kota hosi cikhundleni ca Dhavhidha, a papayi wakwe. I no humelela niku a vaIzrayeli vontlhe va wa mu ingisa.
24 Tontlhe a tihosana,+ ni masochwa lawa ya tinhenha+ a ku patsa ni vontlhe a vana va hosi Dhavhidha+ va no ti koramisa mahlweni ka hosi Solomoni.
25 Jehovha i no mu tlakusa nguvhu Solomoni mahlweni ka Izrayeli yentlhe a tlhela a mu nyika wudzundzo mufun’weni wakwe ga ku ku wa nga seva ni hosi le Izrayeli yi tshukileko yiva nago.+
26 Hikwalaho, Dhavhidha, a n’wana wa Jese, i no fumela Izrayeli yentlhe,
27 niku a masiku ya kufuma kakwe hehla ka Izrayeli ma nova 40 wa malembe. Le Hebroni i no fuma a 7 wa malembe,+ le Jerusalema a fuma a 33 wa malembe.+
28 I nofa na a khosahele nguvhu,+ na a tsakile hi lezvi a nga hanyile nguvhu* ni lezvi a nga hi ni titshomba ni wudzundzo; Solomoni, a n’wana wakwe, i no maha hosi cikhundleni cakwe.+
29 A matimu ya hosi Dhavhidha, kusukela kusanguleni kala magumo, ma tsalilwe ka mitsalo ya Samuweli, a muwoni, na muphrofeti Natani,+ na Gadhi,+ a muwoni,
30 zvin’we ni matimu ya wuhosi gakwe gontlhe, ni wunhenha gakwe, ni lezvi zvi nga humelela cikhatini cakwe na zvi khumba yena, ni vaIzrayeli, ni yontlhe mifumo leyi yi nga va randzele.
Mitlhamuselo ya lahasi
^ Kutani: “a nga se tiyela”.
^ Kutani: “khokhola; palácio”.
^ Kutani: “kululama”.
^ Kutani: “kutsumbeka”.
^ Kutani: “khokhola; palácio”.
^ Hi kukongoma: “na a xure hi masiku”.