Kronekele wo sangula 5:1-26
5 Lava i vana va Rubheni,+ a matewula ya Izrayeli. I wa hi matewula, kanilezvi hi kota ya lezvi a nga nyenyezisa a mubhedhi wa papayi wakwe,+ a fanelo yakwe ya wutewula yi no nyikelwa ka vana va Josefa,+ a n’wana wa Izrayeli. Hikwalaho, a nga vangi ka xaxameto wa lava va tsalelweko kota lava va nga ni fanelo ya wutewula.
2 Hambu lezvi Judha+ a nga hi wa hombe ka vamakabye vakwe, ni lezvi ku humileko hi ka yena loyi a nga wa tava murangeli,+ a fanelo ya wutewula yi no lumba Josefa.
3 A vana va Rubheni, a matewula ya Izrayeli, kuve Hanoke, na Palu, na Hezroni, na Karmi.+
4 A vana va Joyeli kuve Xemaya, a n’wana wakwe; Goge, a n’wana wakwe; Ximeyi, a n’wana wakwe;
5 Mika, a n’wana wakwe; Reyaya, a n’wana wakwe; Bhaali, a n’wana wakwe;
6 na Bheera, a n’wana wakwe, loyi Tilgate-Pilnesera,+ a hosi ya Asiriya, a nga mu yisa wukhumbini. I wa hi hosana ya va ka Rubheni.
7 A vamakabye vakwe hi mingango yabye, lomu ka xaxameto wa lava va tsalelweko hi tixaka tabye kuve Jeyeli, a hloko, na Zakariya,
8 na Bhela, a n’wana wa Azaza, a n’wana wa Xema, a n’wana wa Joyeli loyi a nga hanya Arowera+ kala Nebho ni Bhaali-Meyoni.+
9 Hi tlhelo ga mutsuwuka-gambo, i wa akile kala le ci sangulelako kona a ciwula leci ci nga le Congweni wa Eufrate,+ hakuva a mitlhambi yakwe yi wa tele tikweni ga Gileyadhe.+
10 Masikwini ya hosi Sawule, va nolwa ni vaHagri va va hlula. Hikwalaho, va no tshama lomu matendeni yabye tikweni gontlhe ga le mutsuwuka-gambo wa Gileyadhe.
11 Makunu a va ka Gadhi va wa akile tikweni ga Bhaxani kala Saleka, kusuhani navo.+
12 Le Bhaxani, Joyeli i wa hi yena hloko; a wa wumbiri ku wa hi Xafami; ku wa hi na Janayi na Xafate kambe.
13 A vamakabye vabye lava va nga lumba a tiyindlu ta vapapayi vabye kuve Mikayeli, na Mexulamu, na Xebha, na Jorayi, na Jakani, na Ziya, na Ebheri. Vontlhe va wa hi 7.
14 Lava vave vana va Abhihayili, a n’wana wa Huri, a n’wana wa Jarowa, a n’wana wa Gileyadhe, a n’wana wa Mikayeli, a n’wana wa Jexixayi, a n’wana wa Jahdho, a n’wana wa Bhuzi.
15 Ahi, a n’wana wa Abdhiyeli, a n’wana wa Guni, i wa hi hloko ya yindlu ya vapapayi vabye.
16 Va wa hanya Gileyadhe,+ ni Bhaxani+ ni lomu zvidhoropaneni zva kona, zvin’we ni ka wuriselo gontlhe ga le Xaroni kala mimbhinganweni ya kona.
17 Vontlhe va no tsalelwa hi kuya hi tixaka tabye masikwini ya Jothamu,+ a hosi ya ka Judha, ni masikwini ya Jerobhowamu,*+ a hosi ya ka Izrayeli.
18 A butho ga va ka Rubheni, ni va ka Gadhi, ni khihlanya ga va ka Manase gi wa hi ni 44 760 wa masochwa ya tinhenha, lava va nga zvi kota khwatsi a ku khoma zvitlhangu ni zvipadha, na va hlomile mawura* niku va wa gondzisilwe kulwa yimpi.
19 Va nolwa yimpi ni vaHagri,+ na Jeture, na Nafixe,+ na Nodhabha.
20 Kota lezvi va nga kombela ku vhuniwa hi Nungungulu yimpini leyo va tlhela va mu tsumba, i no hlamula mikhongelo yabye a va vhuna. Hikwalaho, a vaHagri ni vontlhe lava va nga hi zvin’we navo va no nyikelwa canjeni gabye.+
21 Va no teka mitlhambi yabye — 50 000 wa makameli, ni 250 000 wa tiyivhu, ni 2000 wa timbongola — zvin’we ni 100 000 wa vanhu.*
22 Ku delwe vanhu vo tala hakuva a yimpi yi wa lwiwa hi Nungungulu wa lisine.+ Va no sala va tshama tikweni gabye kala ka cikhati leci va nga yisiwa wukhumbini.+
23 A khihlanya ga vana va ka Manase+ gi wa tshama kusukela Bhaxani kala Bhaali-Hermoni, ni le Senira, ni le Citsungeni ca Hermoni.+ Va wa tele nguvhu.
24 Leti tive tihloko ta tiyindlu ta vapapayi vabye: Efera, na Ixi, na Eliyeli, na Azriyeli, na Jeremiya, na Hodhavhiya, na Jahdhiyeli; va wa hi masochwa ya tinhenha ni ya nduma, na va hi tihosana ta tiyindlu ta vapapayi vabye.
25 Kanilezvi a va tsumbekangi ka Nungungulu wa vakokwani vabye. Va no maha wubhayi ni vanungungulu va vamatiko,+ lava Nungungulu a nga va lovisile mahlweni kabye.
26 Hikwalaho, Nungungulu wa Izrayeli i no vhuxa a moya wa Pule, a hosi ya Asiriya+ (ku nga Tilgate-Pilnesera,+ a hosi ya Asiriya), laha ka kuza a teka a va ka Rubheni, ni va ka Gadhi, ni khihlanya ga va ka Manase a va yisa le Hala, ni le Habhora, ni le Hara, ni le congweni wa Gozani,+ lomu va akileko kona kala ni nyamutlha lezvi.
Mitlhamuselo ya lahasi
^ Ku nga Jerobhowamu wa wumbiri.
^ Hi kukongoma: “va kandzihela a wura”.
^ Kutani: “mihefemulo ya vanhu”.
