Samuweli wo sangula 2:1-36
2 Makunu Hana i no khongela, aku:
“A mbilu ya mina yi tsakela Jehovha;+A limhondzo* la mina li tlakusilwe hi Jehovha.
A nomu wa mina wu ahlamele a valala va mina,Hakuva ndza tsakela mitiro ya wena ya kuhanyisa.
2 I hava a basileko ku fana na Jehovha,A ku na mun’wani ahandle ka wena.+A ku na ribye go fana ni Nungungulu wa hina.+
3 Mu nga ha wulawuli hi ndlela ya matshandza,Hambu a magezu ya ku ti kulisa ma nga humi minon’wini ya n’wina.+Hakuva Jehovha i Nungungulu a tivako zvontlhe;Wa hlola a mitiro yontlhe hi kululama.
4 A mawura ya tinhenha ma tshoveletelwa,Kanilezvi lava va rerekileko* va nyikiwa ntamu.+
5 Lava va nga xurile va fanele ku tira kasi va kuma pawa,Kanilezvi lava va ngazwa ndlala a va ha yizwi kambe.+
A ngon’wa yi pswele a 7 wa vana,+Kanilezvi loyi a nga hi ni vana vo tala i wunile.
6 Jehovha wa daya, niku wa hlayisa wutomi;*Wa releta vanhu Cilahleni,* niku wa va tlakusa.+
7 Jehovha wa vanga wusiwana, niku wa ganyisa;+Wa koramisa, niku wa tlakusa.+
8 Wa humesa munhu wa nyalidede lomu ntshurini,A tlakusa cisiwana hi lomu nhulweni ya khuma,*+Kasi a va tshamisa ni tihosana,A va nyika citshamu ca ku dzundzeka.
A zviseketelo zva misava zvi lumba Jehovha,+Niku i veka misava hehla ka zvona.
9 Wa hlayisa a mikondzo ya lava va tsumbekako kakwe,+Kanilezvi a vakubiha va ta miyetiwa lomu munyameni,+Hakuva a munhu a nga hluli hi ntamu wa yena n’winyi.+
10 Jehovha i ta lovisa lava va lwako naye;*+I ta dzindza hehla kabye na a hi matilweni.+
Jehovha i ta lamula kala magemeta-musi ya misava,+A nyika ntamu a hosi yakwe+A tlhela a tlakusa a limhondzo* la a totilweko wakwe.”+
11 Andzhako ka lezvo, Elkana i no tlhela mutini wakwe le Rama, kanilezvi a mufanyana i no sala a maha nandza ga* Jehovha+ mahlweni ka mupristi Eli.
12 A vana va Eli va wa bihile+ niku va wa nga hi na mhaka na Jehovha.
13 Ka zvilo lezvi a vapristi va nga fanele ku nyikiwa hi vanhu, a vana va Eli va wa maha lezvi:+ Loku a munhu a maha muphahlo, a nyama na ya ha vila, ku wata a nandza ga mupristi na gi welele garfo ga matino manharu,
14 gi ta gi peta lomu ka mbita, kutani lomu ka mbita ya zvikhomo zvimbiri, kutani lomu ka bhota, kutani lomu ka mbita ya cikhomo cin’we. Ni cihi ci nga tsawuliwa hi garfu ci wa tekiwa hi mupristi. Hi zvalezvo va nga kari va maha ka vontlhe a vaIzrayeli va ngaya le Xilo.
15 Hambu loku a munhu a nga se hisa a mafura ya muphahlo wakwe,+ a nandza ga mupristi gi wata kakwe, gi taku: “Mu nyike nyama a mupristi kasi a woca. A nga ta vhumela ku u mu nyika a nyama yo bhikiwa, ntsena ya yimbisi.”
16 Loku a munhu loye aku: “Va tsike va ranga hi ku hisa a mafura,+ u ta gumesa u teka ni yihi nyama u* yi lavako”, a nandza ga mupristi gi waku: “Ahihi, hatlisa u ndzi nyika zvezvi. Loku u nga ndzi nyiki ndzi taya hi ku wutla!”
17 Hikwalaho, a ciwonho ca malandza lawo ci nova ca hombe mahlweni ka Jehovha,+ hakuva a vavanuna lavo va wa nga hi na cichavo hi munyikelo wa Jehovha.
18 Samuweli i wa tira+ mahlweni ka Jehovha na a bohile efodhe ya wukene,*+ hambu lezvi a nga hi mufanyana.
19 A mamani wakwe kambe i wa mu rungela cinghanjwana co kala mawoko a mu fambela naco lembe ni lembe a cikhati leci a nga kandziha ni nuna wakwe va ya nyikela muphahlo wa lembe ni lembe.+
20 Eli i no katekisa Elkana ni sati wakwe, aku: “Jehovha i wa ku nyike n’wana hi wasati loyi, wutshan’wini ga loyi a nga nyikelwa* ka Jehovha.”+ Andzhako ka lezvo, va no tlhela kaya.
21 Jehovha i no alakanya Hana, kasi a zvi kota ku xura nyimba;+ i no pswala vafana vanharu ni vanhanyana vambiri. Mufana Samuweli i no simama ku kula mahlweni ka Jehovha.+
22 Eli i wa khosahele nguvhu, kanilezvi i wa zvi zwile zvontlhe lezvi a vana vakwe va nga kari va maha+ ka vontlhe a vaIzrayeli, ni lezvaku va wa etlela ni vavasati lava va nga tira laha nyangweni ya tenda ga mutlhangano.+
23 Eli i wa tala ku va byela lezvi: “Hikuyini mu simamako ku maha zvilo lezvi? A zvilo lezvi ndzi zvi zwako ni vanhu vontlhe hi n’wina zvi bihile.
24 Vana vanga, a mahungu lawa ndzi ma zwako na ma hangalaka cikari ka vanhu va Jehovha a hi manene.
25 Loku a munhu a wonhela a mun’wani munhu, a mun’wani a nga mu khongelela ka Jehovha;* kanilezvi loku a munhu a wonhela Jehovha,+ himani a to mu khongelela ke?” Kanilezvi a va ingisangi a papayi wabye, hakuva Jehovha i wa bohile ku va daya.+
26 Ka cikhati caleco, mufana Samuweli i no simama ku kula, a tsakelwa hi Jehovha ni vanhu.+
27 Ku nota a munhu wa Nungungulu ka Eli, a taku: “Jehovha i ngalo: ‘Kasi a ndzi wonekangi ka yindlu ya papayi wa wena a cikhati leci va nga hi tikhumbi le Gibhite, ndlwini ya Faro ke?+
28 Ndzi no hlawula yena cikari ka tixaka tontlhe ta ka Izrayeli+ kasi ava mupristi wa mina a tlhela a kandziha laha alatini ga mina+ a maha miphahlo, ni ku hisa libani,* a boha efodhe mahlweni ka mina; a yindlu ya kokwani wa wena ndzi yi nyikile a minyikelo yontlhe ya kuhiswa yi mahiwako hi vaIzrayeli.*+
29 Makunu hikuyini mu kanyisako* a muphahlo wa mina ni munyikelo wa mina lezvi ndzi leleteleko lezvaku zvi nyikelwa wutshan’wini ga mina ke?+ Hikuyini u simamako u dzundza nguvhu a vana va wena a ku hundza mina, mu kulukelana hi nyama yo nona ya minyikelo yontlhe ya vanhu va mina va ka Izrayeli ke?+
30 “‘Hikwalaho, a mhaka ya Jehovha, a Nungungulu wa Izrayeli, yi ngalo: “Kunene ndzi wulile lezvaku a yindlu ya wena ni yindlu ya kokwani wa wena contlhe cikhati yi wa ta famba mahlweni ka mina.”+ Kanilezvi makunu Jehovha i ngalo: “Zvi nga ta ha tira, hakuva ndzi ta dzundza lava va ndzi dzundzako,+ kanilezvi lava va ndzi kanyisako va ta chepetiwa.”
31 A masiku mata laha ndzi to tsema a ntamu* wa wena ni wa yindlu ya papayi wa wena kasi ku ngavi ni munhu lomu ndlwini ya wena a to hanya kala a kumba.+
32 Wena u ta wona a nala lomu ndlwini ya mina ka zvontlhe zvazvinene zvi to mahiwa lomu Izrayeli,+ niku ku nga ta ha tshuka kuva ni munhu wo kumba lomu ndlwini ya wena.
33 Loyi ndzi to kala ku mu susa laha alatini ga mina, na a hi wa yindlu ya wena, i ta maha ku a matihlo ya wena ma nga ha woni a tlhela a ku vangela* a hlomulo wa hombe, kanilezvi a kutala ka vanhu va yindlu ya wena va ta dawa hi cipadha ca vanhu.+
34 Lezvi zvi to humelela a vana va wena va vambiri, Hofeni na Finiyasi, zvi tava cikombiso ka wena: Hi wumbiri gabye va tafa siku gin’we.+
35 Andzhako ka lezvo, ndzi ta ti vhuxela a mupristi wo tsumbeka,+ loyi a to maha lezvi zvi laviwako hi mbilu ya mina.* Ndzi ta mu akela yindlu ya kala kupindzuka, a famba mahlweni ka a totilweko wa mina kala kupindzuka.
36 Loyi a to sala wa yindlu ya wena i tata a ta khizamela a mupristi wa mina a kombela ntiro kasi a hakhelwa hi mali ni pawa, aku: “Ndzi kombela a ntiro wa wupristi kasi ndzi kumanyana pawa yoga.”’”+
Mitlhamuselo ya lahasi
^ Kutani: “ntamu”. Wona Tlhamuselo wa magezu ya Bhibhiliya.
^ Kutani: “khunguvanyekileko”.
^ Kutani: “wa vhuxa”.
^ Kutani: “Xeyole”, ku nga cilahla ca vanhu vontlhe. Wona Tlhamuselo wa magezu ya Bhibhiliya.
^ Zvi nga maha na zvi wula ku: “taleni ga chaka”.
^ Zvi nga maha na zvi wula ku: “Lava va holovako na Jehovha va ta rurumela”.
^ Kutani: “ntamu”. Wona Tlhamuselo wa magezu ya Bhibhiliya.
^ Kutani: “a tirela”.
^ Kutani: “leyi a muhefemulo wa wena wu”.
^ Kutani: “linho”.
^ Hi kukongoma: “lombisiwa”.
^ Zvi nga maha na zvi wula ku: “Nungungulu i ta mu lamulela”.
^ Hi kukongoma: “vana va Izrayeli”.
^ Zvi nga maha na zvi wula ku: “ni ku tuvikisa musi wa muphahlo”.
^ Hi kukongoma: “khavetelako”.
^ Hi kukongoma: “a woko”.
^ Kutani: “a vangela muhefemulo wa wena”.
^ Kutani: “zvi to ngha zvi hi mbilwini ya mina ni muhefemulweni wa mina”.
