Tihosi to sangula 20:1-43
20 Makunu Bhen-Hadhadhe,+ a hosi ya Siriya,+ i no hlengeleta a butho gakwe gontlhe zvin’we ni tihosi tin’wani ta 32, ni mahaxi yabye, ni tikareta. I no kandziha a ya randzela+ a Samariya+ alwa nago.
2 I no rumela a zvirun’wa dhoropeni, ka Ahabhi,+ a hosi ya Izrayeli, aku kakwe: “Bhen-Hadhadhe i ngalo:
3 ‘A prata ya wena ni ouro ya wena zva mina, zvin’we ni vasati va wena lava vo saseka ni vana va wena.’”
4 A hosi ya Izrayeli yi no hlamula, yiku: “Hosi yanga, hi kuya hi gezu ga wena, mina ndzi wa wena ni zvontlhe zvi ndzi lumbako.”+
5 Hi ndzhako ka cikhati, a zvirun’wa zvi no tlhela, zvi yaku: “Bhen-Hadhadhe i ngalo: ‘Ndzi ku rumelele a mahungu lawa yaku: “U ta ndzi nyika a prata ya wena, ni ouro ya wena, ni vasati va wena, ni vana va wena.”
6 Kanilezvi a mandziko, hi cikhati caleci, ndzi ta ku rumelela a malandza ya mina ma ta secha khwatsi lomu ndlwini ya wena ni lomu tindlwini ta malandza ya wena niku ma ta teka zvontlhe zvilo zva wena zva lisima ma wuya nazvo.’”
7 A hosi ya Izrayeli yi no vitanisa a madhota wontlhe ya tiko, yiku: “Zvi hloleni, mu zvi wona lezvaku a wanuna loyi i bhejile ku neha a khombo hakuva i lavile ku ndzi mu nyika a vasati va mina, ni vana va mina, ni prata ya mina, ni ouro ya mina niku a ndzi mu alelangi nchumu.”
8 Makunu a madhota wontlhe ni vanhu vontlhe va te ngalo kakwe: “U nga mu ingisi, ne u nga vhumeli.”
9 Hikwalaho, i no byela a zvirun’wa zva Bhen-Hadhadhe, aku: “Byelani a hosi ya mina, muku: ‘Zvontlhe lezvi u nga ranga u zvi lava ka nandza ga wena ndzi ta maha, kanilezvi lezvi zvin’wani a ndzi vhumeli.’” Zvalezvo a zvirun’wa zvi no suka zvi famba zvi tlhelisa a mhaka ka hosi.
10 Bhen-Hadhadhe i no mu rumelela a mahungu, yaku: “A vanungungulu va wa ndzi tsayise va tlhela va engeta loku kuva ni ntshuri Samariya wo enela ku nyika a canja ka mun’we ni mun’wani wa lava va ndzi landzelako!”
11 A hosi ya Izrayeli yi no hlamula, yiku: “Mu byeleni, muku: ‘Loyi a hlomako a matlhari yakwe ya yimpi ngha a nga bhumisi a ku khwatsi hi loyi a tlhatlhako.’”+
12 Zvalezvi Bhen-Hadhadhe a ngazwa a hlamulo lowu, laha yena ni tihosi tin’wani va nga kari vanwa matendeni* yabye, i no byela a malandza yakwe, aku: “Hlomani kasi kulwa!” Hikwalaho, va no hloma kasi va dhumela a dhoropa.
13 Kanilezvi a muphrofeti wo kari i no tshinelela Ahabhi,+ a hosi ya Izrayeli, aku: “Jehovha i ngalo: ‘Wa ci wona a citshungu contlhe leci ca hombe ke? Nyamutlha ndzi ta ci nyikela canjeni ga wena; makunu u ta zvi tiva lezvaku hi mina Jehovha.’”+
14 Ahabhi i no wutisa, aku: “U ta tirisa mani?” Yena aku: “Jehovha i ngalo: ‘Ndzi ta tirisa a malandza ya tihosana ta maprovhinsia.’” Ahabhi a wutisa, aku: “Himani a to sangula yimpi?” A muphrofeti aku: “Hi wena!”
15 Ahabhi i no hlayela a malandza ya tihosana ta maprovhinsia, a kuma 232 wa wona; andzhako ka lezvo, i no hlaya a vaIzrayeli vontlhe, a kuma 7000 wa vavanuna.
16 Va no huma ni hlikanhi, laha Bhen-Hadhadhe a nga kari anwa a popiwa lomu matendeni* zvin’we ni 32 wa tihosi leti ti nga kari ti mu vhunetela.
17 Laha a malandza ya tihosana ta maprovhinsia ma nga huma lahandle, Bhen-Hadhadhe i no tekela ku rumela zvirun’wa. Zvi no mu byela ku: “Ku tile vavanuna hi le Samariya.”
18 Bhen-Hadhadhe aku: “Loku vata hi kurula, va khomeni na va ha hanya; ni loku va tela kulwa, va khomeni kambe na va ha hanya.”
19 A cikhati leci a malandza ya tihosana ta maprovhinsia ni mabutho lawa ma nga va landzela va nga huma lomu dhoropeni,
20 a mun’we ni mun’wani i no hlasela nala wakwe. A vaSiriya va no tsutsuma,+ a vaIzrayeli va va hlongolisela; kanilezvi Bhen-Hadhadhe, a hosi ya Siriya, i no huluka hi haxi, na a hi ni vakhileli vo kari va mahaxi.
21 A hosi ya Izrayeli yi no huma yi hihirita a mahaxi ni tikareta, yi dayela a vaSiriya vo tala.
22 Andzhako ka lezvo, a muphrofeti+ i no tshinela ka hosi ya Izrayeli, aku: “Famba u ya hloma u tiya, u pimisa hi lezvi u to maha,+ hakuva kusanguleni ka lembe* gi tako a hosi ya Siriya yi tata yi ta ku dhumela.”+
23 Makunu a malandza ya hosi ya Siriya ma no byela hosi, maku: “A Nungungulu wabye i Nungungulu wa zvitsunga. Hi caleco ci nga va maha va hi hlula. Kanilezvi loku hilwa navo laha livaleni hi ta va hlula.
24 A cin’wani kambe, maha lezvi: Susa a tihosi tontlhe+ zvikhundleni zva tona u ti vhaleta hi vagovhernadhori,
25 u gumesa u hlengeleta a butho go fana ni legi u gi luzileko, ni mahaxi yo fana ni lawa u nga hi nawo, ni tikareta to fana ni leti u nga hi nato. Hi talwa navo laha livaleni, niku hakunene hi ta va hlula.” Hikwalaho, i no ingisa a wusungukati gabye, a maha zvalezvo.
26 Kusanguleni ka lembe,* Bhen-Hadhadhe i no hlengeleta a vaSiriya a kandziha aya Afeka+ a yalwa na Izrayeli.
27 A vanhu va ka Izrayeli vonawu va no hlengeletwa, va nyikiwa timbuva va huma va va khinga. Laha a vanhu va ka Izrayeli va nga govile mahlweni kabye, va wa ku khwatsi mitlhambi yimbiri ya yitsongwani ya timbuti, kuveni a vaSiriya va wa tatile a tiko gontlhe.+
28 Makunu a munhu wa Nungungulu wa lisine i no tshinela ka hosi ya ka Izrayeli, aku: “Jehovha i ngalo: ‘Kota lezvi a vaSiriya va ngaku: “Jehovha i Nungungulu wa zvitsunga, a hi Nungungulu wa matshamu ya tivala,” ndzi ta nyikela contlhe a citshungu leci ca hombe canjeni ga wena,+ niku u ta zvi tiva lezvaku hakunene hi mina Jehovha.’”+
29 Va no gova va cuwukana, va mbheta 7 wa masiku. Hi siku ga wu 7 a yimpi yi no sangula. A vanhu va ka Izrayeli va no daya 100 000 wa masochwa yo famba hi minenge ya Siriya hi siku gin’we.
30 Lava van’wani va no tsutsuma vaya Afeka+ va ya nghena dhoropeni. Kanilezvi a khurisi gi no wela a 27 000 wa vavanuna lavo va nga sele. Bhen-Hadhadhe yenawu i no tsutsuma a nghena lomu dhoropeni a ya fihlala lomu kwartwini ya lomu cikari.
31 Hikwalaho, a malandza yakwe ma te ngalo kakwe: “Hi zwile lezvaku a tihosi ta yindlu ya ka Izrayeli tihosi ta wuxinji.* A hi boheni tisakwa zviwunwini zva hina ni tingoti tihlokweni ta hina hi huma hiya ka hosi ya Izrayeli. Kuzvilava i ta ku tsika u* hanya.”+
32 Hikwalaho, va no boha tisakwa zviwunwini zvabye ni tingoti tihlokweni tabye, vaya ka hosi ya Izrayeli va yaku: “A nandza ga wena Bhen-Hadhadhe i ngalo: ‘Ndzi tsike ndzi* hanya.’” Yena a hlamula, aku: “Kasi wa ha hanya? Phela makabye wa mina.”
33 A vavanuna lavo va no zvi wona kota cikombiso ca zvilo zva zvinene. Na va landza magezu yakwe, va te: “Bhen-Hadhadhe makabye wa wena.” Yena aku: “Fambani mu ya mu teka.” Andzhako ka lezvo, Bhen-Hadhadhe i no huma ata kakwe. Ahabhi i no mu khilelisa lomu kareteni.
34 Makunu Bhen-Hadhadhe i te ngalo kakwe: “Ndzi ta tlhelisa a madhoropa lawa a papayi wa mina a nga teka ka papayi wa wena, niku u nga ti mahela a mamerkadho* Dhamasku, a ku khwatsi hi lezvi a papayi wa mina a nga maha le Samariya.”
Ahabhi i no hlamula, aku: “Loku hi maha civhumelwano, ndzi ta ku tsika u famba.”
Hikwalaho, va no maha civhumelwano, a mu tsika a famba.
35 Na a rumiwa hi Jehovha, a mun’we wa vana va vaphrofeti*+ i no byela a munghana wakwe, aku: “Ndzibe.” Kanilezvi inaloye i no ala ku muba.
36 Hikwalaho, i te ngalo kakwe: “Kota lezvi u nga kala ku ingisa a gezu ga Jehovha, zvalezvi u to hambana na mina, u ta dawa hi nghala.” Andzhako ka loku a hambene naye, i no kumana ni nghala yi mu daya.
37 I no kuma mun’wani munhu, aku: “Ndzibe.” A wanuna loye i no muba a mu bayisa.
38 Makunu a muphrofeti i no famba a ya rindzela a hosi laha ndleleni. I no ti fihla, a ti vhala matihlo hi nguwo.
39 Laha a hosi yi nga kari yi hundza, i no yi kanyulukela, aku: “A nandza ga wena gi wa hi lomu cikari ka yimpi. Makunu ku nota a wanuna ni munhu, a taku: ‘Hlayisa a munhu loyi. Loku o tshuka a n’walala, u ta riha a wutomi gakwe hi legi ga wena,*+ kutani u hakhela hi talenta* ya prata.’
40 Laha a nandza ga wena gi nga ha khomekile hi ku maha leci ni leciyani, a munhu loye i no tsutsuma.” A hosi ya Izrayeli yiku kakwe: “U ta lamulisiwa zvezvo; u yi tsemile ha wece a mhaka leyi.”
41 Zvalezvo a muphrofeti i no susa a nguwo yi nga hi matihlweni yakwe, a hosi ya Izrayeli yi zvi pola lezvaku mun’we wa vaphrofeti.+
42 A muphrofeti i te ngalo kakwe: “Jehovha i ngalo: ‘Kota lezvi u nga tsika munhu loyi ndzi nga wula ku mu lovise a huluka canjeni ga wena,+ a wutomi ga wena gi ta vhaleta a wutomi gakwe,*+ ni vanhu va wena va ta vhaleta a vanhu vakwe.’”+
43 Zvalezvo a hosi ya Izrayeli yi no famba mutini wa yona Samariya,+ na yi tsan’wile yi tlhela yi mbhela ntamu.
Mitlhamuselo ya lahasi
^ Kutani: “michacheni”.
^ Kutani: “michacheni”.
^ Ku nga cikhati ca kusangula ka nguva ya cimumu.
^ Ku nga cikhati ca kusangula ka nguva ya cimumu.
^ Kutani: “tihosi ti nga ni lirandzo li nga mbheliko”.
^ Kutani: “a muhefemulo wa wena wu”.
^ Kutani: “Tsika muhefemulo wa mina wu”.
^ Kutani: “a maruwa”.
^ “A vana va vaphrofeti” zvi nga maha na ku wuliwa a cikola ca ku gondzisa a vaphrofeti kutani ntlawa wa vaphrofeti.
^ Kutani: “a muhefemulo wa wena wu ta vhaleta a muhefemulo wakwe”.
^ Kutani: “a muhefemulo wa wena wu ta vhaleta a muhefemulo wakwe”.
