Papilo go sangula ka Va Le Korinte 11:1-34
11 Mahani vapimanyisi va mina, a ku khwatsi hi lezvi mina ndzi nga mupimanyisi wa Kristu.+
2 Ndza mu dzundza hakuva ma ndzi alakanya zvilweni zvontlhe niku ma namarela ka mikhuwo kota lezvi ndzi nga mu nyikisa zvona.
3 Kanilezvi ndzi lava ku mu zvi tiva lezvaku a hloko ya wanuna mun’we ni mun’wani hi Kristu;+ a hloko ya wasati wanuna;+ ni hloko ya Kristu hi Nungungulu.+
4 Ni wihi wanuna loyi a khongelako kutani ku phrofeta na a fenengetile hloko i wisa tingana a hloko yakwe;
5 kanilezvi a wasati mun’we ni mun’wani loyi a khongelako kutani ku phrofeta+ na a nga fenengetangi hloko yakwe i wisa tingana a hloko yakwe, hakuva zvi fana ni loku a no halula misisi.
6 Hakuva loku a wasati a nga fenengeti hloko yakwe, i fanele ku tsema misisi; kanilezvi loku zvi wisa tingana ka wasati a ku tsema misisi kutani ku halula, i wa fenengete hloko yakwe.
7 Hakuva a wanuna a nga faneli ku fenengeta hloko yakwe, kota lezvi a nga mufananiso ni wudzundzo ga Nungungulu,+ kanilezvi a wasati wudzundzo ga wanuna.
8 Hakuva a wanuna a nga tangi hi ka wasati, kanilezvi a wasati i tile hi ka wanuna.+
9 Ahandle ka lezvo, a wanuna a nga vangelwangi wasati, kanilezvi kuve wasati a nga vangelwa wanuna.+
10 Hi cigelo leco, a wasati i fanele kuva ni cikombiso hlokweni yakwe ca lezvaku i fumelwe, hi kota ya tingilozi.+
11 Ahandle ka lezvo, a Hosini, a ku na wasati na ku nga hi na wanuna, ne a ku na wanuna na ku nga hi na wasati.
12 Hakuva kota lezvi a wasati a tako hi ka wanuna,+ hi zvalezvo kambe ni wanuna i huma hi ka wasati; kanilezvi a zvilo zvontlhe zvita hi ka Nungungulu.+
13 Lamulani ha n’wece: Zva fanela ku a wasati a khongela ka Nungungulu na a nga fenengetangi a hloko yakwe ke?
14 Xana a ntumbuluko ha woce a wu mu gondzisi lezvaku a kuva ni misisi yo leha tingana ka wanuna,
15 kanilezvi loku a wasati a hi ni misisi yo leha, wudzundzo kakwe ke? Hakuva i nyikilwe misisi kasi yiva cifenengeto ca hloko.
16 Hambulezvo, loku a wokari a lava ku kaneta mukhuwo lowu, a seketela wun’wani, hina a hi na wun’wani, ne a mabandla ya Nungungulu a ma nawo.
17 Kanilezvi a ndzi mu dzundzi, laha ndzi mu nyikako a zvileletelo lezvi, hakuva a mu tlhanganeli ku vhuneka kanilezvi mu tlhanganela ku hohlotana basi.
18 Hakuva, a co ranga, ndzizwa lezvaku a cikhati leci mu tlhanganako kota bandla, ku na ni kuhambana cikari ka n’wina; niku hi tlhelo go kari ndza kholwa ku lezvo lisine.
19 Hakuva hakunene ku tava ni mitlawa cikari ka n’wina,+ kasi lava va amukelekako cikari ka n’wina va woneka kubaseni.
20 Laha mu tlhanganako wutshan’wini gin’we, a mu tlhanganeli kuga a Cilalelo ca Hosi.+
21 Hakuva laha mu gako, a mun’we ni mun’wani i ranga hi ku lalela zvakwe, hikwalaho ku maheka lezvaku a mun’we izwa ndlala kanilezvi a mun’wani i popilwe.
22 Mo kala mu nga hi na miti ya ku gela ka yona ni ku nwela ka yona ke? Kutani mo chepeta a bandla ga Nungungulu ni ku va wisa tingana lava va nga hava nchumu ke? Makunu ndzi ta mu byela yini? Ndzi mu dzundza? Mhakeni leyi, a ndzi mu dzundzi.
23 Hakuva ndzi amukele hi ka Hosi zvalezvi minawu ndzi nga mu byela, zvaku: Hosi Jesu, ka wusiku+ legi a nga lava ku tokometwa hi gona, i no teka pawa,
24 niku andzhako ka ku bonga, i no yi khema, aku: “A pawa leyi yi yimela a miri wa mina,+ lowu wu to nyikelwa hi kota ya n’wina. Simamani ku maha lezvi kasi mu ndzi alakanya hi zvona.”+
25 I no maha zvalezvo kambe hi kopo,+ andzhako ka loku va lalele, aku: “A kopo leyi yi yimela a civhumelwano ciswa+ ci tiyiswako hi nkhata wa mina.+ Simamani ku maha lezvi, ni ka cihi cikhati mu nwako, kasi mu ndzi alakanya hi zvona.”+
26 Hakuva ni ka cihi cikhati mu gako a pawa leyi ni kunwa a kopo leyi, mo huwelela a kufa ka Hosi, kala yita.
27 Hikwalaho, ni wihi loyi a gako a pawa kutani kunwa kopo ya Hosi na zvi nga mu ringani, i tava ni nandzu mhakeni ya miri ni nkhata wa Hosi.
28 A munhu i wa sangule hi ku ti hlola a tiva ku zva mu ringana ke,+ ntsena andzhako ka lezvo hi kona a toga a pawa ni kunwa a kopo.
29 Hakuva loyi a gako ni kunwa na a nga zvi zwisisi lezvaku a miri wu yimela yini, oga ni kunwa kulamula hehla ka yena n’winyi.
30 Hi caleci ci mahako votala cikari ka n’wina vava ni gome ni ku babya, niku a votala va etlele kufeni.*+
31 Kanilezvi loku hi wo zvi zwisisa a ku hi tshamisile kuyini, hi wa nga ta lamuliwa.
32 Kanilezvi loku hi lamuliwa ho kawukiwa hi Jehovha*+ kasi hi nga koniwi zvin’we ni tiko.+
33 Hikwalaho, vamakabye va mina, a cikhati leci mu tlhanganako kasi kuga, nyimelani vanghana.
34 Loku a wokari azwa ndlala, i wage le kaya, kasi loku mu tlhangana mu nga tlhanganeli ku lamuliwa.+ Kanilezvi xungetano hi timhaka leti ti seleko, ndzi ta ti lulamisa loku ndzi chikela seyo.