Papilo go sangula ka Va Le Korinte 12:1-31
12 Makunu xungetano hi zvinyikiwo zva moya,+ vamakabye, a ndzi lavi lezvaku mu kohlwa nchumu.
2 Ma zvi tiva lezvaku na ma ha hi vanhu va matiko,* mu wa kucetelwa ni ku hambukiswa muya ka zvifananiso zvi nga wulawuliko,+ mu zvi landzela ni kwihi lomu zvi nga kari zvi mu yisa kona.
3 Hikwalaho, ndzi lava ku mu zvi tiva lezvaku a ku na munhu a wulako hi moya wa Nungungulu, aku: “Jesu i rukatelwe!”; ne a nga kona a nga wulako, aku: “Jesu i Hosi!”, na a nga wuli hi moya wo basa.+
4 Ku na ni zvinyikiwo zvo hambana, kanilezvi kova ni moya wun’we;+
5 ku na ni matirela yo hambana,+ hambulezvo kova ni Hosi yin’we;
6 ku na ni mitiro yo hambanahambana, hambulezvo a Nungungulu loyi a mahako yontlhe ka vontlhe hi yaloyi wa mun’we.+
7 Kanilezvi, a kuwonekeliswa ka moya ku nyikiwa mun’we ni mun’wani hi kungo gi vhunako.+
8 Hakuva a mun’we i nyikiwa timhaka* ta wutlhari hi moya, a mun’wani i nyikiwa timhaka ta wutivi hi moya walowu wa wun’we,
9 a mun’wani i nyikiwa kukholwa+ hi moya walowu wa wun’we, ni mun’wani i nyikiwa a zvinyikiwo zva ku hanyisa+ hi moya walowu wa wun’we,
10 a mun’wani kambe i nyikiwa ku maha mitiro ya ntamu,+ a mun’wani i nyikiwa ku phrofeta, a mun’wani i nyikiwa ku hlola magezu ma pimisilweko,+ a mun’wani i nyikiwa ku wulawula tirimi to hambanahambana,+ ni mun’wani i nyikiwa ntamu wa ku tlhamusela tirimi.+
11 Kanilezvi yontlhe a mitiro leyi yi mahiwa hi moya walowu wa wun’we, wu avela ka mun’we ni mun’wani hi kuya hi kurandza ka wona.
12 Hakuva a ku khwatsi hi lezvi a miri wu nga wun’we kanilezvi na wu hi ni zviro zvo tala, ni zviro zvontlhe zva miri, hambu lezvi zvi nga tala, zvi maha miri wun’we,+ hizvalezvo kambe na Kristu.
13 Hakuva hontlheni hi bhabhatisilwe hi moya wun’we hi maha miri wun’we, kani hi vaJudha kutani hi vaGreki, kani hi tikhumbi kutani hi tlhatlhekile, hontlheni hi nyikilwe kunwa a moya walowu wa wun’we.
14 Hakuva, kunene, a miri a wu wumbiwi hi ciro cin’we, kanilezvi wu wumbiwa hi zvo tala.+
15 Loku a nkondzo wu wo wula, wuku: “Lezvi ndzi kalako ndzi nga hi canja, a ndzi ciro ca miri”, wu wa nga ta tsika kuva ciro ca miri hi kota ya lezvo.
16 Ni loku a ndleve yi wo wula, yiku: “Lezvi ndzi kalako ndzi nga hi tihlo, a ndzi ciro ca miri”, yi wa nga ta tsika kuva ciro ca miri hi kota ya lezvo.
17 Loku a miri wontlhe wu wa hi tihlo, na ku hi kwihi a kuingisa? Loku wona wontlhe wu wa hi kuingisa, hi wa tazwa masema hi yini?
18 Kanilezvi a co tiya hi ku Nungungulu i vekile ciro cin’we ni cin’wani ca miri kota lezvi zvi nga mu tsakisisa zvona.
19 Loku zvontlhe zvi wa hi ciro cin’we, a miri na wu hi kwihi?
20 Kanilezvi ku na ni zviro zvo tala, hambulezvo, a miri wun’we.
21 A tihlo a gi nge byeli canja, giku: “A ndzi ku lavi”, ne hloko a yi nge byeli mikondzo, yiku: “N’wina a ndzi mu lavi.”
22 Kanilezvi a zviro zva miri lezvi zvi nge khwatsi zvi na ni gome, zva laveka,
23 ni zviro zva miri lezvi hi alakanyako lezvaku a zvi dzundzeki nguvhu, hi zvi nyika wudzundzo ga hombe,+ ni zviro zva hina lezvi zvi kalako zvi nga koki mahlo, hi chela nguvhu kota hi zvona,
24 kuveni a zviro zva hina lezvi zvo saseka a zvi lavi nchumu. Hambulezvo, Nungungulu i wu mahisile lezvo a miri, a ci nyika wudzundzo ga hombe a ciro leci ci kalako ci nga dzundzeki,
25 kasi ku ngavi ni kuhambana cikari ka miri, kanilezvi kasi a zviro zva miri zvi fela ku zwelana.+
26 Loku a ciro cin’we ca miri ci xaniseka, zvontlhe lezvi zvin’wani zvi xaniseka zvin’we naco;+ ni loku a ciro ci dzundziwa, zvontlhe a zviro lezvi zvin’wani zvi tsaka zvin’we naco.+
27 Makunu n’wina mu miri wa Kristu,+ niku a mun’we ni mun’wani wa n’wina ciro ca miri lowo.+
28 Nungungulu i yimisile a zviro zvo tala lomu bandleni: a vo sangula vapostoli,+ a va wumbiri vaphrofeti,+ a va wunharu vagondzisi,+ ku landzela a mitiro ya ntamu,+ ni zvinyikiwo zva ku hanyisa,+ ni mitiro ya kuvhunetela, ni wutlhari ga ku rangela,+ ni ku wulawula tirimi to hambanahambana.+
29 Kasi hi vontlhe va nga vapostoli ke? Hi vontlhe va nga vaphrofeti? Xana hi vontlhe va nga vagondzisi? Kona hi vontlhe va mahako mitiro ya ntamu ke?
30 Kasi hi vontlhe va nyikilweko zvinyikiwo zva ku hanyisa ke? Xana hi vontlhe va wulawulako hi tirimi?+ Kona hi vontlhe va nga vatlhamuseli* ke?+
31 Kanilezvi simamani ku ti tsitsirita kasi mu kuma zvinyikiwo zva hombe.+ Hambulezvo, ndzi ta mu komba a ndlela ya yinene nguvhu.+