Papilo go sangula ka Va Le Korinte 14:1-40
14 Hlotani lirandzo, hambulezvo, simamani ku ti tsitsirita kasi mu kuma zvinyikiwo zva moya, kanilezvi nguvhunguvhu a kuva mu phrofeta.+
2 Hakuva loyi a wulawulako hi lirimi limbe, a nga wulawuli ni vanhu, kanilezvi i wulawula na Nungungulu, hakuva i hava a zvi zwisisako,+ kanilezvi i wulawula zvihundla zvo basa+ hi moya.
3 Hambulezvo, loyi a phrofetako i aka ni ku tiyisa ni ku chavelela vanhu hi magezu yakwe.
4 Loyi a wulawulako hi lirimi limbe o ti aka yena wutsumbu, kanilezvi loyi a phrofetako i aka bandla.
5 Makunu ndzi wa xuva lezvaku n’wentlhe mu wulawula hi tirimi,+ kanilezvi i chukwana ku mu phrofeta.+ Kunene, loyi a phrofetako wa hombe ku hundza loyi a wulawulako hi tirimi, ahandle ka loku a tlhamusela,* kasi a bandla gi fela ku akeka.
6 Kanilezvi, vamakabye, loku ndzi wota ka n’wina zvezvi na ndzi wulawula hi tirimi, ndzi wa ta mu vhunisa kuyini, ahandle ka loku ndzi wo wulawula na n’wina hi kuvhululelwa+ kutani hi wutivi,+ kutani hi kuphrofeta, kutani hi kugondzisa ke?
7 Zva fana ni zvilo lezvi zvi nga hanyiko, lezvi zvi nga ni pfumawulo, kani citoliya kutani citende. Loku a kuvhuma ka zvona ku nga hambani, zvi ta tivisiwa kuyini a ku leci ci biwako citoliya kutani citende ke?
8 Hakuva loku a mpundzu wuba zvo kala zvi nga tiveki, himani a to hloma kuya yimpini ke?
9 Hizvalezvo na n’winawu, loku mu nga humesi hi tirimi ta n’wina a magezu ma olovako ku ma zwisisa, a munhu i ta zvi tivisa kuyini lezvi zvi wuliwako ke? Kunene, mu ta ngha mu wulawula moyeni.
10 Zvi nga maha na ku hi ni tirimi to tala to hambanahambana lomu tikweni, kanilezvi li hava ni lin’we leli a magezu ya lona ma nga wulawuliko.
11 Hakuva loku ndzi nga zvi zwisisi lezvi zvi wuliwako, ndzi tava wamatiko ka loyi a wulawulako, ni loyi a wulawulako i tava wamatiko ka mina.
12 Hizvalezvo kambe na n’winawu, kota lezvi mu navelako nguvhu a zvinyikiwo zva moya, hlotani a kuva mu andza ka zvinyikiwo lezvi zvi to aka bandla.+
13 Hikwalaho, loyi a wulawulako hi lirimi limbe i wa khongele kasi a kota ni ku tlhamusela.*+
14 Hakuva loku ndzi khongela hi lirimi limbe, cinyikiwo ca mina ca moya ci khongelako, kanilezvi a kupima ka mina a ku tiri.
15 Makunu, zvini zvi faneleko ku mahiwa? Ndzi ta khongela hi cinyikiwo ca moya, kanilezvi ndzi ta tlhela ndzi khongela hi kupima ka mina. Ndzi ta yimbelela a tisimu ta kudhumisa hi cinyikiwo ca moya, kanilezvi ndzi ta tlhela ndzi yimbelela a tisimu ta kudhumisa hi kupima ka mina.
16 Loku zvi ngavi tano, loku u dhumisa hi cinyikiwo ca moya, xana a munhu wa nyalidede loyi a nga cikari ka n’wina i ta wulisa kuyini ku “Amen” ka magezu ya wena ya kubonga kuveni a nga zvi tivi lezvi u wulako ke?
17 Lisine lezvaku u bonga Nungungulu hi ndlela yi nene, kanilezvi loyi mun’wani a nga akeki.
18 Ndza mu bonga Nungungulu hi lezvi ndzi wulawulako hi tirimi to tala a ku hundza n’wina n’wentlhe.
19 Hambulezvo, lomu bandleni i chukwana ku ndzi wula ntlhanu wa magezu hi kupima* ka mina, kasi ndzi fela ku gondzisa van’wani, a ku hundza ku wula a 10 000 wa magezu hi lirimi limbe.+
20 Vamakabye, mu nga mahi vanana kupimeni ka n’wina,+ kanilezvi mahani vanana ka zvakubiha,+ muva vanhu va kulileko* kupimeni ka n’wina.+
21 Lomu Nayweni ku tsalilwe lezvi: “‘Hi tirimi ta vamatiko ni minomu ya vambe vanhu ndzi ta wulawula ka vanhu lava, hambulezvo va ta ala ku ndzi ingisa’, ku wula Jehovha.”*+
22 Hikwalaho, a tirimi a hi cikombiso ka lava va kholwako kanilezvi ka lava va nga kholwiko,+ kuveni a kuphrofeta a hi ka lava va nga kholwiko kanilezvi ka lava va kholwako.
23 Hikwalaho, loku a bandla gontlhe gi tlhangana ka wutshamu gin’we, vontlhe va wulawula hi tirimi, ku gumesa ku nghena vanhu va nyalidede kutani vangakholwiko, va nga ta wula ku mo hlanya ke?
24 Kanilezvi loku n’wentlheni mu kari mu phrofeta, makunu kuta munhu a nga kholwiko kutani wa nyalidede, i ta kawukiwa a tlhela a hloliwa khwatsanyana hi vontlhe.
25 Makunu a zvihundla zva mbilu yakwe zvi ta woneka, awa lahasi hi nghohe a khozela Nungungulu, aku: “Hakunene Nungungulu i kona cikari ka n’wina.”+
26 Makunu hi ta ku yini, vamakabye? A cikhati leci mu tlhanganako, a mun’we i na ni lisimu, a mun’wani i na ni gondzo, a mun’wani i na ni kuvhululelwa, a mun’wani i wulawula hi lirimi limbe, ni mun’wani i nyikilwe ku tlhamusela.+ Ngha zvontlhe zvi mahiwa kasi ku akana.
27 Loku ku hi ni loyi a wulawulako hi tirimi, ku wa wulawule vambiri kutani vanharu basi, mun’we hi khati, lezvo na ku hi ni mutlhamuseli.*+
28 Kanilezvi loku ku nga hi na mutlhamuseli,* i wa miyele lomu bandleni a wulawula yece na Nungungulu.
29 Ku wa wulawule vaphrofeti vambiri kutani vanharu,+ kanilezvi lava van’wani va wa zwisise a tlhamuselo wa kona.
30 Kanilezvi loku a mun’wani a amukela a kuvhululelwa na a ha tshamile laho, loyi wo ranga i wa miyele.
31 Hakuva n’wentlheni mu nga phrofeta, kanilezvi ku wa phrofete mun’we hi khati, kasi vontlhe va gondza ni lezvaku vontlhe va fela ku tiyiswa.+
32 A zvinyikiwo zva moya zva vaphrofeti zvi fanele ku wonelelwa hi vaphrofeti.
33 Hakuva Nungungulu a hi Nungungulu wa woyonga kanilezvi wa kurula.+
A ku khwatsi hi mabandleni wontlhe ya vobasa,
34 a vavasati va wa miyele lomu mabandleni, hakuva a va vhumelelwi a ku wulawula.+ Kanilezvi va wa ti koramise+ kota lezvi a Nayo wonawu wu wulako.
35 Loku va lava ku tiva cokari, va wa wutise a vanuna vabye le kaya, hakuva tingana ka wasati ku a wulawula lomu bandleni.
36 Kasi a mhaka ya Nungungulu yi no tumbulukela ka n’wina, kutani yi nota kala ka n’wina n’wece ke?
37 Loku a wokari a alakanya lezvaku muphrofeti kutani ku i na ni cinyikiwo ca moya, i fanele ku vhumela lezvaku a timhaka leti ndzi mu tsalelako cileletelo ca Hosi.
38 Kanilezvi loku a wokari a kanyisa cileletelo leci, yenawu i ta kanyisiwa.*
39 Hikwalaho, vamakabye, simamani ku ti tsitsirita kasi mu phrofeta,+ hambulezvo mu nga beteli munhu ku wulawula hi tirimi.+
40 Kanilezvi a zvilo zvontlhe zvi wa mahiwe hi fanelo ni nayo.+
Mitlhamuselo ya lahasi
^ Kutani: “hundzulusela”.
^ Kutani: “hundzulusela”.
^ Kutani: “kuzwisisa”.
^ Kutani: “mu buvha”.
^ Kutani: “muhundzuluseli”.
^ Kutani: “muhundzuluseli”.
^ Zvi nga maha na zvi wula ku: “loku a munhu a nga tivi, i ta simama ku nga tivi”.
