Papilo go sangula ka Va Le Korinte 15:1-58
15 Makunu ndza mu alakanyisa, vamakabye, hi mahungu ya manene lawa ndzi ma kaneleko ka n’wina,+ lawa kambe mu nga ma amukela, ku nga yalawa mu tiyileko ka wona.
2 Ma hanyisiwa kambe ha wona loku mu khoma zvi tiya ka mahungu ya manene lawa ndzi kaneleko ka n’wina, ahandle ka loku mu no kholwa mahala.
3 Hakuva cikari ka zvilo zvo sangula ndzi nga mu nyika, ku wa hi ni leci minawu ndzi nga amukela, caku: Kristu i no fela zviwonho zva hina kota lezvi a Mitsalo yi wulako;+
4 niku i no lahliwa+ a tlhela a vhuxiwa+ hi siku ga wunharu+ kota lezvi a Mitsalo yi wulako;+
5 ni lezvaku i wonekile ka Khefasi,*+ hi kulandzela a woneka ka lava va 12.+
6 Andzhako ka lezvo, i no woneka ka 500 wa vamakabye ni ku hundza hi khatigin’we,+ lava a kutala kabye va ha hiko zvin’we na hina, hambu lezvi a vokari va etleleko kufeni.
7 Andzhako ka lezvo, i no woneka ka Jakobe+ a guma a woneka ka vapostoli vontlhe.+
8 Kanilezvi hi kugumesa, i no woneka ka minawu+ wa ku khwatsi ndzi no pswaliwa a masiku na ma nga se chikela.
9 Hakuva hi mina wa mutsongwani ka vapostoli, niku a ndzi ringani ku vitaniwa ku ndzi mupostoli, hakuva ndzi xanisile a bandla ga Nungungulu.+
10 Kanilezvi hi kota ya tipswalo ta Nungungulu, ndzi lezvi ndzi nga zvona. Niku a tipswalo takwe ka mina a ti vangi ta mahala, kanilezvi ndzi no ti tsitsirita a ku hundza vona vontlhe; hambulezvo ku wa nga hi mina, kanilezvi tipswalo ta Nungungulu leti ti nga hi zvin’we na mina.
11 Makunu, kani hi mina kutani hi vona, hi zvalezvi hi chumayelisako zvona, niku hi zvalezvi mu nga kholwisa zvona.
12 Makunu loku ku chumayelwa lezvaku Kristu i vhuxilwe hi ka vafileko,+ va wulisa kuyini vokari cikari ka n’wina lezvaku a ku na kuvhuka ka vafileko ke?
13 Loku hakunene ku nga hi na kuvhuka ka vafileko, Kristu yenawu a nga vhuxiwangi.
14 Kanilezvi loku Kristu a nga vhuxiwangi, a kuchumayela ka hina hakunene ka mahala, ni kukholwa ka n’wina konawu ka mahala.
15 Ahandle ka lezvo, hinawu hi gumesa hiva vakustumunyu va mawunwa va Nungungulu,+ hakuva hi nyika wukustumunyu go vhukela Nungungulu hiku i vhuxile Kristu,+ loyi a nga kala ku mu vhuxa, loku ku hi lezvaku hakunene a vafileko va nga ta vhuxiwa.
16 Hakuva loku ku hi lezvaku a vafileko va nga ta vhuxiwa, hambu Kristu a nga vhuxiwangi.
17 Ahandle ka lezvo, loku Kristu a nga vhuxiwangi, a kukholwa ka n’wina a ku vhuni nchumu; mu simama zviwonhweni zva n’wina.+
18 Makunu ni lava va etleleko kufeni na va hi ka Kristu, va lovile.+
19 Loku a kutsumba ka hina ka Kristu ku hi ka wutomi legi basi, hi xanisekile a ku hundza vanhu vontlhe.
20 Kanilezvi a co tiya hi lezvaku Kristu i vhuxilwe hi ka vafileko, a matewula ya lava va etleleko kufeni.+
21 Hakuva kota lezvi a kufa ku tileko hi ka munhu,+ a kuvhuka ka vafileko konawu kuta hi ka munhu.+
22 Hakuva a ku khwatsi hi lezvi vontlhe va fako hi ka Adhamu,+ hizvalezvo kambe ni ka Kristu vontlhe va ta nyikiwa kuhanya.+
23 Kanilezvi a mun’we ni mun’wani hi khati gakwe: a matewula hi Kristu,+ ku gamela lava va lumbako Kristu cikhatini ca kuvakona kakwe.+
24 Hi kulandzela, ku ta chikela kugumesa, laha a to tlhelisa a Mufumo ka Nungungulu tlhelo Papayi wakwe, na a fuvisile a mifumo yontlhe, ni wuhosi gontlhe ni ntamu.+
25 Hakuva i fanele ku fuma kala Nungungulu a veka valala vontlhe lahasi ka mikondzo yakwe.+
26 A nala wo gumesa a to lovisiwa kufa.+
27 Hakuva Nungungulu “i vekile zvilo zvontlhe lahasi ka mikondzo yakwe”.+ Kanilezvi loku aku: ‘A zvilo zvontlhe zvi vekilwe lahasi ka yena’,+ zva dlunyateka lezvaku Loyi a vekileko zvilo zvontlhe lahasi kakwe a nga hlayiwi nazvo.+
28 Kanilezvi a cikhati leci a zvilo zvontlhe zvi to vekiwa lahasi kakwe, a N’wana yenawu i ta ti veka lahasi ka Loyi a vekileko a zvilo zvontlhe lahasi kakwe,+ kasi Nungungulu ava zvontlhe ka vontlhe.+
29 Loku zvi nga hi lezvo, va ta kuyini lava va bhabhatiselwako kufa ke?+ Loku ku hi lezvaku hakunene a vafileko va nga ta vhuxiwa, hikuyini va bhabhatiselwako kufa ke?
30 Hikuyini hinawu hi nga mhangweni contlhe cikhati?+
31 Siku ni siku ndzi le mhangweni ya kufa. A mhaka leyi lisine a ku fana ni kutidzundza ka mina hi n’wina, vamakabye, ka Kristu Jesu, a Hosi ya hina.
32 A ku fana ni van’wani vanhu,* zvi ndzi vhuna yini lezvi ndzi lwileko ni zvivandza le Efesusi ke?+ Loku ku hi lezvaku a vafileko va nga ta vhuxiwa, “a hi geni ni kunwa, hakuva a mandziko hi tafa”.+
33 Mu nga kalavelwi. A ku tolovelana ni vakubiha zva bihisa a mahanyela ma nene.+
34 Tlhelani muva ni kupima ku nene hi ku maha zvakululama, mu nga wonhi, hakuva a vokari a va mu tivi Nungungulu. Ndzi wula lezvi kasi ku mu wisa tingana.
35 Hambulezvo, a wokari i taku: “A vafileko va ta vhuxiswa kuyini? Kona va ta vhuka na va hi ni miri muni?”+
36 Cipumbu ndziwena! Leci u byalako a ci nge hanyi ahandle ka loku ci rangile hi kufa.
37 Ni leci u byalako, a hi miri lowu wu to kula, kanilezvi i mbewu ntsena, kani ya trigo kutani ya lixaka lin’wani;
38 kanilezvi Nungungulu i yi nyika miri lowu wu mu tsakisako, a nyika mbewu yin’we ni yin’wani a miri wa yona.
39 A hi nyama yontlhe yi nga nyama ya lixaka lin’we, kanilezvi ku na ni nyama ya vanhu, ni nyama ya zvihari, ni nyama ya zvinyanyani, ni nyama ya tinjhanjhi.
40 Ku na ni mimiri ya le tilweni+ ni mimiri ya laha misaveni;+ kanilezvi a kungangamela ka mimiri ya le tilweni ka tshamela go kari, ni kungangamela ka mimiri ya laha misaveni ka tshamela gin’wanewo.
41 A kungangamela ka gambo ka tshamela go kari, a ka hweti ka tshamela gin’wani,+ ni kungangamela ka tinyeleti ka tshamela ga tonawu; kunene a nyeleti yin’we ya hambana ni yin’wani nyeleti hi kungangamela ka yona.
42 Hizvalezvo ni kuvhuka ka vafileko. Ku byaliwa miri lowu wu bolako, ku vhuxiwa lowu wu nga boliko.+
43 Wu byaliwa tinganeni, wu vhuxelwa kungangameleni.+ Wu byaliwa gomeni, wu vhuxiwa na wu hi ni ntamu.+
44 Ku byaliwa miri wa nyama, ku vhuxiwa miri wa moya. Loku ku hi ni miri wa nyama, ku na ni miri wa moya kambe.
45 Hikwalaho, ku tsalilwe ku ngalo: “Adhamu, a wanuna wo sangula, i nova civangwa* ci hanyako.”+ Adhamu wo gumesa, i nova moya wu nyikako wutomi.+
46 Hambulezvo, a zva moya a hi zvona zvo sangula. A zvo sangula hi lezvi zva nyama, ku landzela lezvi zva moya.
47 A munhu wo sangula i huma hi laha misaveni niku i mahilwe hi ntshuri;+ a munhu wa wumbiri wa le tilweni.+
48 A ku khwatsi hi loyi a mahilweko hi ntshuri, hi zvalezvo kambe ni lava va mahilweko hi ntshuri; niku a ku fana ni loyi wa le tilweni, hi zvalezvo kambe ni lava va le tilweni.+
49 Niku a ku khwatsi hi lezvi hi nga mufananiso wa loyi a mahilweko hi ntshuri,+ hi tava mufananiso kambe wa loyi wa le tilweni.+
50 Kanilezvi ndza mu byela a mhaka leyi, vamakabye, ya lezvaku a nyama ni nkhata a zvi zvi koti kuga tshomba ya Mufumo wa Nungungulu, ni leci ci bolako a ci zvi koti kuga tshomba ya kungaboli.
51 Ndza mu byela a cihundla co basa, ndziku: A hi hontlheni hi to etlela kufeni, kanilezvi hontlheni hi ta hundzuluswa+
52 hi cikhatanyana, hi kucopeta ka tihlo, kubeni ka mpundzu wo gumesa. Hakuva a mpundzu wu taba,+ ni vafileko va ta vhuxiwa na va hi ni kungaboli, niku hina hi ta hundzuluswa.
53 Hakuva leci ci bolako ci fanele ku ambala a kungaboli,+ ni leci ci fako ci fanele ku ambala a kungafi.+
54 Kanilezvi laha leci ci bolako ci to ambala a kungaboli, ni leci ci fako ci ambala a kungafi, makunu ku ta tatiseka a mhaka leyi yi tsalilweko, yaku: “A kufa ku fuvisilwe* kala kupindzuka.”+
55 “Kufa, ku kwihi kuhlula ka wena ke? Kufa, yi kwihi a vhenene* ya wena?”+
56 A vhenene* leyi yi pswalako kufa ciwonho,+ ni ntamu wa ciwonho i Nayo.*+
57 Kanilezvi i wa bongiwe Nungungulu hakuva wa hi nyika kuhlula ha Jesu Kristu, a Hosi ya hina!+
58 Hikwalaho, vamakabye va mina va randzekako, tiyani mu ku nde,+ mu nga tsekatseki, mu tshama na mu khomekile+ ntirweni wa Hosi, na mu tiva lezvaku a ntiro wa n’wina a hi wa mahala+ Hosini.
Mitlhamuselo ya lahasi
^ Loyi a gin’wani vito a nga Pedro.
^ Zvi nga maha na zvi wula ku: “hi ka mawonela ya vanhu”.
^ Kutani: “muhefemulo”.
^ Hi kukongoma: “mitilwe”.
^ Kutani: “muzwa”.
^ Kutani: “muzwa”.
^ Kutani: “ni Nayo wu nyika ntamu a ciwonho”.
