Papilo go sangula ka Va Le Korinte 7:1-40
7 Xungetano hi timhaka leti mu nga tsala, i chukwana ku a wanuna a nga henyi* wasati;
2 kanilezvi hi kota ya lezvi a wubhayi* gi tatileko tiko, a wanuna mun’we ni mun’wani i wave ni sati wakwe,+ ni wasati mun’we ni mun’wani ava ni nuna wakwe.+
3 A nuna i wa nyike sati wakwe lezvi zvi mu faneleko, ni sati yenawu i wa mahe zvalezvo ka nuna wakwe.+
4 A sati a nga mandi ka miri wakwe saseka nuna wakwe; ni nuna yenawu a nga mandi ka miri wakwe saseka a sati wakwe.
5 Mu nga alelani, saseka loku mu vhumelelana hi cikhati ci yimisilweko, kasi mu ti nyika cikhati ca ku khongela, mu tlhela mu tlhangana kambe, lezvaku Sathani a nga mu ringi hi kota ya ku tsandzeka ku ti khoma.
6 Hambulezvo, ndzi wula lezvi hi ku mahela n’wina, a hi nayo.
7 Kanilezvi ndzi xuva lezvaku vontlhe vanhu va fana na mina. Hambulezvo, a munhu ni munhu i na ni cinyikiwo cakwe+ a nga nyikiwa hi Nungungulu, a mun’we hi tshamela legi, ni mun’wani hi tshamela legiyani.
8 Makunu ndza wula ka lava va kalako va nga chadhangi, ni ka tinoni* lezvaku i chukwana loku va wo tshamisa ku khwatsi hi mina.+
9 Kanilezvi loku va nga zvi koti ku ti khoma va wa chadhe, hakuva i chukwana ku chadha a ku hundza kuswa hi kunavela.+
10 Ndza laya lava va chadhileko, na ku nga hi mina, kanilezvi hi Hosi, ndziku: A sati a nga faneli ku hambana ni nuna wakwe.+
11 Kanilezvi loku a sati a hambana ni nuna wakwe, i wa tshame a nga chadhi kutani ku tlhela a zwanana ni nuna wakwe; ni nuna a nga tsiki a sati wakwe.+
12 Kanilezvi ka van’wani ndza wula mina, na ku nga hi Hosi, ndziku:+ Loku a hi kona makabye a nga ni sati a nga kholwiko, a nga tsiki sati wakwe loku a sati loye a zvi lava ku tshama naye;
13 ni loku a wasati a hi ni nuna a nga kholwiko, a nga tsiki nuna wakwe loku a nuna loye a zvi lava ku tshama naye.
14 Hakuva a nuna a nga kholwiko i basisilwe hi kota ya sati wakwe, ni sati a nga kholwiko i basisilwe hi kota ya makabye loye; loku zvi wa nga hi lezvo, a vana va n’wina na va nga hlazvekangi, kanilezvi makunu va basile.
15 Kanilezvi loku loyi a nga kholwiko a hlawula ku suka a famba,* i wa mu tsike a famba; a makabye wa cinuna kutani wa cisati a nga bohelelwangi ka zvilo zva tshamela lego, kanilezvi Nungungulu i mu vitanele kurula.+
16 Wena sati, u zvi tivisa kuyini lezvaku u nga ta ponisa a nuna wa wena?+ Kutani wena nuna, u zvi tivisa kuyini lezvaku u nga ta ponisa a sati wa wena ke?
17 Hambulezvo, a mun’we ni mun’wani i wa fambise lezvi Nungungulu a mu vitanisileko zvona,+ hi kuya hi ciavelo leci Jehovha* a mu nyikileko. Hizvalezvo, ndzi laya lezvo mabandleni wontlhe.
18 I kona a nga vitaniwa na a mahilwe wukwera?* I wa tshamise zvezvo.+ Ni loku a hi kona a nga vitaniwa na a nga mahiwangi wukwera, i wa tshamise zvezvo.+
19 A wukwera* a hi ga nchumu, ni kungamahi wukwera zvonawu a hi zva nchumu;+ a ca lisima ku hlayisa milayo ya Nungungulu.+
20 Ni ka cihi ciyimo leci a mun’we ni mun’wani a nga vitaniwa na a hi ka cona, i wa simamise zvezvo.+
21 U vitanilwe na u hi khumbi? U nga karateki hi zvona;+ kanilezvi loku u zvi kota ku tlhatlheka, londzowota mole lowo.
22 Hakuva ni wihi a nga vitanelwa Hosini na a hi khumbi munhu a tlhatlhilweko wa Hosi;+ hizvalezvo ni loyi a nga vitaniwa na a tlhatlhekile i khumbi ya Kristu.
23 Mu xavilwe hi ntsengo;+ tsikani ku ti maha tikhumbi ta vanhu.
24 Vamakabye, ni ka cihi ciyimo leci a mun’we ni mun’wani a nga vitaniwa na a hi ka cona, i wa simamise zvezvo mahlweni ka Nungungulu.
25 Makunu xungetano hi majaha ni vanhwana,* a ndzi na nayo wa Hosi, kanilezvi ndzo nyika mawonela ya mina+ kota munhu wo tsumbeka a mahelweko wuxinji hi Hosi.
26 Hikwalaho, ndzi alakanya lezvaku i chukwana ku a wanuna a simamisa zvalezvi a nga tshamisa zvona hi kota ya zvikarato lezvi zvi nga kona.
27 Loku u bohilwe ka sati, u nga lavi ku tlhatlheka.+ Loku u nga hi na sati, u nga lavi sati.
28 Hambulezvo loku u chadha, a wu wonhi. Ni loku a jaha kutani nhwana* a chadha, a nga wonhi. Kanilezvi lava va chadhako va ta xaniseka nyameni.* Ndzo zama ku mu vhikela ka lezvo.
29 Ndza engeta ndziku ngalo ka n’wina vamakabye: A cikhati ci nga sala ci tsongwani.+ Kusukela lezvi, lava va nga ni vasati va wa hanyise ku khwatsi a va navo,
30 lava va rilako va wa mahise ku khwatsi a va rili, ni lava va tsakako va ku khwatsi a va tsaki, lava va xavako va ku khwatsi a va na nchumu,
31 ni lava va tirisako zva tiko va ku khwatsi a va zvi tirisi nguvhu; hakuva a matshamela ya tiko legi ma cica.
32 Kunene, ndzi lava lezvaku mu tlhatlheka ka kukarateka. A wanuna loyi a nga chadhangiko i karatekela a zvilo zva Hosi, lezvaku i ta yi tsakisisa kuyini Hosi.
33 Kanilezvi a wanuna loyi a chadhileko i karatekela a zvilo zva tiko,+ lezvaku i ta mu tsakisisa kuyini a sati wakwe,
34 niku i avanyekile. A wasati a nga chadhangiko, a ku patsa ni nhwana,* i karatekela a zvilo zva Hosi+ lezvaku a fela ku basa mirini ni moyeni wakwe. Kanilezvi a wasati loyi a chadhileko i karatekela a zvilo zva tiko, lezvaku i ta mu tsakisisa kuyini a nuna wakwe.
35 Ndzi wula lezvi kasi mu vhuneka, na ku nga hi ku mu bohelela, kanilezvi kasi ku mu hlanganyeta mu maha lezvi zvi faneleko ni ku tirela Hosi contlhe cikhati na mu nga colopetelwi hi nchumu.
36 Kanilezvi loku a wokari a alakanya lezvaku a nga ha zvi koti ku ti khoma hi ku tshama a nga chadhi, ni loku a hundzile ka tanga ya wun’wanana, i wa mahe lezvi a zvi lavako; a hi ciwonho. Va wa chadhe.+
37 Kanilezvi loku a wokari a hlambanyile mbilwini yakwe, na zvi nga mu karati a ku tshama a nga chadhi, na a zvi kota ku fumela kunavela kakwe, ni loku a tiyisile mbilwini yakwe a ku tshama a nga chadhi, i maha khwatsi.+
38 Ni loyi a chadhako yenawu i maha khwatsi, kanilezvi loyi a nga chadhiko i maha khwatsi nguvhu.+
39 A sati i bohilwe loku a nuna wakwe a ha hanya.+ Kanilezvi loku a nuna wakwe a etlela kufeni, i tlhatlhekile ku chadha ni loyi a mu lavako, saseka lezvaku i wa chadhe ntsena Hosini.+
40 Kanilezvi hi mawonela ya mina, i ta tsaka nguvhu loku a tshamisa zvalezvo. Ndza kholwa lezvaku minawu ndzi na ni moya wa Nungungulu.
Mitlhamuselo ya lahasi
^ Ku nga lezvaku a nga hlengeli masango ni.
^ Hi ciGreki: porneía. Wona Tlhamuselo wa magezu ya Bhibhiliya.
^ Kutani: “vavasati vo felwa hi vanuna”.
^ Kutani: “a boha ku hambana naye”.
^ Kutani: “tlulisilwe ngoma”.
^ Kutani: “A ku tlula ngoma”.
^ Kutani: “lava va kalako va nga se tshuka va chadha”.
^ Kutani: “karateka kuhanyeni”.
^ Kutani: “lava va kalako va nga se tshuka va chadha”.
^ Kutani: “virgem”.
