Papilo ga wumbiri ga Johani 1:1-13
1 A wanuna a kulileko,* ka wasati a hlawulilweko ni vana vakwe, lava ndzi va randzako nguvhu, na ku nga hi mina ndzoce kanilezvi ni vontlhe lava va tivako lisine,
2 hi kota ya lisine li simamako ka hina niku li tava na hina kala kupindzuka.
3 A tipswalo ni wuxinji ni kurula zvi tako hi ka Nungungulu tlhelo Papayi, ni ka Jesu Kristu, a N’wana wa Papayi, zvin’we ni lisine ni lirandzo, zvi tava na hina.
4 Ndza tsaka nguvhu hakuva ndzi kumile a vokari va vana va wena na va famba lisineni,+ a ku khwatsi hi lezvi Papayi a hi layileko.
5 Makunu, wasati, ndza ku kombela lezvaku hi randzana. (Ndza ku tsalela, na ku nga hi nayo wuswa, kanilezvi i nayo lowu hi nga nawo kusukela kusanguleni.)+
6 A lirandzo hi leli: ku simama hi famba hi milayo yakwe.+ Lowu hi wona a nayo, a ku khwatsi hi lezvi mu zvi zwileko kusukela kusanguleni lezvaku mu fanele ku simama ku famba lirandzweni.
7 Hakuva a vakanganyisi vo tala va humelele tikweni,+ lava va kanetako lezvaku Jesu Kristu i tile hi ka nyama.+ Loyi hi yena mukanganyisi tlhelo mukaneti wa Kristu.+
8 Ti woneleni kasi mu nga luzi zvilo lezvi hi tirileko kasi ku zvi kuma, kanilezvi mu fela ku kuma nchachazelo wo mbhelela.+
9 Ni wihi loyi a tsemakanyako mbhingano a nga simami ka tigondzo ta Kristu, a nga na Nungungulu.+ Loyi a simamako ka gondzo leyi hi yena a nga na Papayi ni N’wana.+
10 Loku a wokari ata ka n’wina na a nga tisi a gondzo leyi, mu nga mu amukeli mitini ya n’wina+ ne ku mu losa.
11 Hakuva loyi a mu losako i hlengela naye mitirweni yakwe yo biha.
12 Hambu lezvi ndzi nga ni timhaka to tala ta ku mu tsalela, a ndzi lavi ku mu tsalela tona hi phepha ni tinta, kanilezvi ndza tsumba ku ndzi ta mu endzela lezvaku hi ta wulawula nghohe ni nghohe, kasi a litsako la n’wina li fela ku mbhelela.
13 A vana va makabye wa wena, loyi a hlawulilweko, va ku rungula.
Mitlhamuselo ya lahasi
^ Kutani: “A dhota”.
