Kronekele wa wumbiri 1:1-17
1 Solomoni, a n’wana wa Dhavhidha, i no simama ku tiyisa a mufumo wakwe, niku Jehovha, a Nungungulu wakwe, i wa hi zvin’we naye a tlhela a mu endzelekisa hi ndlela yo hlamalisa.+
2 Solomoni i no vitanisa a Izrayeli yentlhe: a varangeli va mitlawa ya 1000 wa vanhu ni ya 100 wa vanhu, ni valamuli, ni tontlhe a tihosana ta Izrayeli yentlhe, ni tihloko ta tiyindlu ta vapapayi.
3 Andzhako ka lezvo, Solomoni ni bandla gontlhe va noya wutshan’wini go tlakuka le Gibheyoni,+ hakuva hi laho gi nga hi kona a tenda ga mutlhangano ga Nungungulu wa lisine, legi Mosi, a nandza ga Jehovha, a nga gi mahile le ciwuleni.
4 Hambulezvo, Dhavhidha i wa tisile a Arke* ga Nungungulu wa lisine hi Kiriyat-Jeyarime+ a ta gi veka ka wutshamu legi a nga gi longiselele; Dhavhidha i wa gi gwimbele a tenda le Jerusalema.+
5 A alati ga kobre+ legi Bhezaleli,+ a n’wana wa Uri, a n’wana wa Hura, a nga mahile gi wa vekilwe mahlweni ka tabhernakeli ga Jehovha; Solomoni ni bandla va wa khongela mahlweni ka gona.*
6 Solomoni i no nyikela laho a minyikelo mahlweni ka Jehovha. I no nyikela a 1000 wa minyikelo ya kuhiswa laha alatini ga kobre+ ga tenda ga mutlhangano.
7 Ka wusiku lego, Nungungulu i no woneka ka Solomoni, aku kakwe: “Kombela lezvi u lavako ku ndzi ku nyika.”+
8 Makunu Solomoni i te ngalo ka Nungungulu: “U kombisile a lirandzo la hombe li nga mbheliko ka papayi wa mina Dhavhidha+ niku u ndzi yimisile a kuva hosi cikhundleni cakwe.+
9 Makunu Jehovha Nungungulu, ngha a citsumbiso ca wena ka Dhavhidha, a papayi wa mina, ci tatiseka,+ hakuva u ndzi yimisile a kuva hosi ka vanhu vo talisa ku khwatsi tindzhohwana ta ntshuri wa misava.+
10 Hikwalaho, ndzi nyike a wutlhari ni wutivi+ kasi ndzi rangela a vanhu lava,* hakuva himani wa ku a nga zvi kota ku lamula vanhu va wena vo talisa lezvi ke?”+
11 Makunu Nungungulu i no byela Solomoni, aku: “Kota lezvi a mbilu ya wena yi xuvako lezvo, ni lezvi u nga kala ku kombela titshomba ne ku ganya, ne wudzundzo ne kufa ka valala va wena, ne hambu ku kombela a wutomi go leha,* kanilezvi u kombela a wutlhari ni wutivi kasi u rangela a vanhu va mina lava ndzi ku yimisileko a kuva hosi yabye,+
12 ndzi ta ku nyika wutlhari ni wutivi; kanilezvi ndzi ta tlhela ndzi ku nyika a titshomba, ni kuganya, ni wudzundzo zva ku a ku na hosi yi nga hi nazvo mahlweni ka wena, ne a yi kona yi tova nazvo andzhako ka wena.”+
13 Hikwalaho, Solomoni i no suka wutshan’wini go tlakuka le Gibheyoni,+ hi mahlweni ka tenda ga mutlhangano, a tlhela Jerusalema a ya fuma hehla ka Izrayeli.
14 Solomoni i no simama ku hlengeletela a tikareta ni mahaxi;* i wa hi ni 1400 wa tikareta, ni 12 000 wa mahaxi.+ I no zvi veka madhoropeni ya tikareta,+ kusuhani ni hosi le Jerusalema.+
15 A hosi yi no maha lezvaku kuva ni prata ni ouro Jerusalema yo talisa ku khwatsi maribye,+ ni mapulango ya sedhare yo talisa ku khwatsi mikuwu ya le Xefela.+
16 A mahaxi ya Solomoni ma wata hi Gibhite,+ niku a ntlawa wa vaxavisi va hosi wu wa xava mitlhambi ya mahaxi* hi ntsengo wu yimisilweko.+
17 A kareta yin’we ni yin’wani yi nga tisiwa hi Gibhite yi wa xaviwa hi 600 wa zvingerengere zva prata, niku a haxi gin’we gi wa xaviwa hi 150 wa zvingerengere zva prata. Vonawu va wa zvi xavisela a tihosi tontlhe ta vaHiti ni tihosi ta Siriya.
Mitlhamuselo ya lahasi
^ Kutani: “va wa Mu wutisela laho”.
^ Hi kukongoma: “kasi ndzi nghena ni ku huma mahlweni ka vanhu lava”.
^ Hi kukongoma: “masiku yo tala”.
^ Kutani: “vakhileli va mahaxi”.
^ Zvi nga maha na zvi wula ku: “hi le Gibhite ni le Kuwe; a vaxavisi va hosi va wa ma xava le Kuwe”, kuzvilava na ku wuliwa le Kilikiya.
