Kronekele wa wumbiri 14:1-15
14 Hi kugumesa, Abhija i no etlela a humula ni vakokwani vakwe, niku va no mu lahla Dhoropeni ga Dhavhidha;+ Asa, a n’wana wakwe, i no maha hosi cikhundleni cakwe. Masikwini yakwe, a tiko gi no humula a 10 wa malembe.
2 Asa i no maha zvazvinene ni zvakululama mahlweni ka Jehovha, a Nungungulu wakwe.
3 I no susa a maalati ya vanungungulu va matiko+ ni matshamu yo tlakuka, a fayetela ni mapilari yo basa*+ ni ku tsemelela a tisinya to basa.*+
4 Ahandle ka lezvo, i no byela a vaJudha lezvaku va hlota Jehovha, a Nungungulu wa vakokwani vabye, ni ku hlayisa a Nayo ni zvileletelo.
5 Hikwalaho, i no susa a matshamu yo tlakuka ni maalati yo hisela ka wona libani+ madhoropeni wontlhe ya ka Judha; a mufumo wu no simama kuva ni kurula kufumeni kakwe.
6 I no aka madhoropa ma vhikelweko khwatsi le Judha,+ hakuva a tiko gi wa hi kuruleni niku ku wa nga hi na yimpi ya ku mu vhukela malembeni lawo, hakuva Jehovha i wa mu nyikile kuhumula.+
7 I no byela a va ka Judha, aku: “A hi akeni madhoropa lawa hi ma bhiya hi mimuro ni tikhokhola,*+ hi ma vekela tivati* ni zvikwinyaro. A tiko ga ha hi mandleni ya hina hakuva hi hlotile Jehovha, a Nungungulu wa hina. Hi mu hlotile, niku yena i hi nyikile a kurula matlhelweni wontlhe.” Hikwalaho, va no humelela kuakeni kabye.+
8 Asa i wa hi ni butho ga 300 000 wa vavanuna va ka Judha va nga hlomile a zvitlhangu zva hombe ni matlhari. Ka va ka Bhenjamini, ku wa hi ni 280 000 wa masochwa ya tinhenha ma khomako a zvitlhangu zva zvitsongwani* ni ku hloma mawura.*+
9 Andzhako ka cikhati, Zera, a muEtiopia, i noya a ya va dhumela na a hi ni butho ga 1 000 000 wa vavanuna ni 300 wa tikareta.+ A cikhati leci a nga chikela Marexa,+
10 Asa i no huma kasi alwa naye. Va no fola kasi kulwa yimpi nkoveni wa Zefata le Marexa.
11 Makunu Asa i no kombela ka Jehovha, a Nungungulu wakwe,+ aku: “O Jehovha, wena a wu cuwuki ku lava u va vhunako va tele kutani a va na ntamu.+ Hi vhune, O Jehovha, Nungungulu wa hina, hakuva hi ti seketele ka* wena+ niku hi tile mahlweni ka citshungu leci hi kota ya vito ga wena.+ O Jehovha, wena u Nungungulu wa hina. U nga tsiki munhu wa ku wafa a ti maha wa ntamu a ku hundza wena.”+
12 Hikwalaho, Jehovha i no hlula a vaEtiopia mahlweni ka Asa ni mahlweni ka va ka Judha, niku a vaEtiopia va no tsutsuma.+
13 Asa ni vanhu lava a nga hi navo va no va hlongolisela kala Gerari,+ niku a vaEtiopia va no simama ku mbambamela kala ku nga ha sali ne mun’we, hakuva va wa chindzilwe hi Jehovha ni butho gakwe. Andzhako ka lezvo, a va ka Judha va no phanga a zvilo zvo tala nguvhu.
14 Ahandle ka lezvo, va no hlasela a madhoropa wontlhe matlhelweni ya Gerari, hakuva ma wa chava hi kota ya Jehovha. Va no phanga madhoropa wontlhe hakuva ma wa hi ni zvilo zvo tala.
15 Va no tlhela va hlasela a matenda ya lava va nga hi ni zvifuyo, va teka a mitlhambi yo tala ni makameli, va gumesa va tlhela Jerusalema.
Mitlhamuselo ya lahasi
^ Hi kukongoma: “tivati timbiri-mbiri”.
^ Kutani: “torres”.
^ Kutani: “tingenge”, zvitlhangu zva zvitsongwani zvi nga tala ku tiriswa hi van’wamawura.
^ Hi kukongoma: “kandzihela mawura”.
^ Kutani: “tsumba”.
