Kronekele wa wumbiri 15:1-19
-
Lezvi zvi lulamisilweko hi Asa (1-19)
15 Makunu a moya wa Nungungulu wu nota hehla ka Azariya, a n’wana wa Odhedhi.
2 Hikwalaho, i no huma a khinga Asa, aku kakwe: “Wena, Asa, ni vontlhe va ka Judha ni va ka Bhenjamini, ndzi ingiseleni! Jehovha i tava zvin’we na n’wina loku mu simama kuva zvin’we naye;+ loku mu mu hlota mu ta mu kuma,+ kanilezvi loku mu mu tsika, yenawu i ta mu tsika.+
3 Hi cikhati co leha,* Izrayeli i no tshama a nga hi na Nungungulu wa lisine, ne mupristi wa ku mu gondzisa, ne hambu nayo.+
4 Kanilezvi a cikhati leci va nga hi zvikaratweni, va no tlhelela ka Jehovha, a Nungungulu wa Izrayeli, va mu hlota, va se mu kuma.+
5 Cikhatini leco, i hava a nga kari a endza na a tlhatlhekile,* hakuva ku wa hi ni gujeguje cikari ka vahanyi vontlhe va matiko.
6 A tiko gin’we gi wa hahlulwa hi gin’wani tiko, ni dhoropa gin’we hi gin’wani dhoropa, hakuva Nungungulu i wa va tsikile lomu ka gujeguje hi tixanisa ta tixaka tontlhe.+
7 Kanilezvi n’wina tiyani, mu nga mbheli ntamu,*+ hakuva mu ta chachazelwa hi kota ya mitiro ya n’wina.”
8 Zvalezvi Asa a ngazwa magezu lawa ni ciphrofeto ca muphrofeti Odhedhi, i no tiya hlanha a susa zvifananiso zvontlhe zva manyala tikweni gontlhe ga ka Judha,+ ni ga ka Bhenjamini ni ka madhoropa lawa a nga ma tekile tikweni ga zvitsunga ga ka Efrayime, a vhuxisa a alati ga Jehovha legi gi nga hi mahlweni ka ligumbagumba la Jehovha.+
9 I no tsombanisa vontlhe a va ka Judha, ni va ka Bhenjamini, ni valuveli va nga hi cikari kabye va kuta hi ka va ka Efrayime, ni va ka Manase, ni va ka Simeyoni,+ hakuva va wa sukile ka Izrayeli vata kakwe na va tele, laha va nga wona lezvaku Jehovha, a Nungungulu wakwe, i wa hi zvin’we naye.
10 Hikwalaho, va no hlengeletana Jerusalema hi hweti ya wunharu ka lembe ga wu 15 ga kufuma ka Asa.
11 Ka siku lego, va no maha muphahlo ka Jehovha hi 700 wa tihomu ni 7000 wa tiyivhu ta muphango lowu va nga wuyile nawo.
12 Ahandle ka lezvo, va no maha civhumelwano ca ku hlota Jehovha, a Nungungulu wa vakokwani vabye, hi mbilu yabye yontlhe ni muhefemulo* wabye wontlhe.+
13 Ni wihi loyi a nga wa ta kala ku hlota Jehovha, a Nungungulu wa Izrayeli, i wa ta dawa, kani mutsongwani kutani wahombe, kani wanuna kutani wasati.+
14 Hikwalaho, va no maha cihlambanyo ka Jehovha hi gezu ga hombe, va kanyuluka hi kutsaka, ni kuvhuma ka mimpundzu ni tinanga.*
15 Ni vaJudha vontlhe va no tsaka hi cihlambanyo leco, hakuva va wa hlambanyile hi mbilu yabye yontlhe niku va wa mu hlotile hi kuxuva kabye kontlhe, yena a ti kumekisa kabye;+ Jehovha i no simama ku va nyika kuhumula matlhelweni wontlhe.+
16 Hosi Asa i zile a susa Maaka,+ a kokwani wakwe, cikhundleni cakwe ca wumamani muzindza,* hakuva i wa mahile a cifananiso co nyenyeza ci nga tirisiwa wukhozelini ga sinya yo basa.*+ Asa i no khungumula a cifananiso co nyenyeza ca kokwani wakwe, a ci fayetela, a ci hisa Nkoveni wa Kidroni.+
17 Kanilezvi a matshamu yo tlakuka a ma susiwangi+ lomu Izrayeli.+ Hambulezvo, a mbilu ya Asa yi wa mbhelele wutomini* gakwe gontlhe.+
18 I no neha ndlwini ya Nungungulu wa lisine a zvibya lezvi yena ni papayi wakwe va nga zvi basisile: a prata, ni ouro ni zvibya zvo tsalangana.+
19 A ku vangi ni yimpi kala hi lembe ga wu 35 ga kufuma ka Asa.+
Mitlhamuselo ya lahasi
^ Hi kukongoma: “Hi masiku yo tala”.
^ Hi kukongoma: “ku wa nga hi na kurula ka loyi a nga huma kutani ku nghena”.
^ Hi kukongoma: “mu nga tsiki mandla ya n’wina mawa”.
^ Kutani: “makhombela”.
^ Hi kukongoma: “masikwini”.