Kronekele wa wumbiri 17:1-19
17 A n’wana wakwe, Jehoxafati,+ i no maha hosi cikhundleni cakwe, a tiyisa a cikhundla cakwe hehla ka Izrayeli.
2 I no yimisa a mabutho ya tiyimpi ka wontlhe madhoropa ya ka Judha ma vhikelweko khwatsi a tlhela a veka masochwa tikweni ga ka Judha ni ka madhoropa ya ka Efrayime lawa Asa, a papayi wakwe, a nga ma tekile.+
3 Jehovha i no simama kuva zvin’we na Jehoxafati hakuva i wa famba tindleleni ta kale ka kokwani wakwe, Dhavhidha,+ niku a nga hlotangi vaBhaali.
4 I no hlota a Nungungulu wa papayi wakwe+ a tlhela a landzela* zvileletelo zvakwe, na ku nga hi mitiro ya Izrayeli.+
5 Jehovha i no simama ku yimisa a mufumo canjeni gakwe wu tiya;+ ni Judha yentlhe i wa simama ku mu nyika zvinyikiwo Jehoxafati. Hikwalaho, i nova ni titshomba to tala ni wudzundzo ga hombe.+
6 A mbilu yakwe yi no tiya tindleleni ta Jehovha, niku i zile a susa ni matshamu yo tlakuka+ ni tisinya to basa*+ tikweni ga ka Judha.
7 Hi lembe ga wunharu ga kufuma kakwe, i no vitanisa a tihosana takwe, Bhen-Hayile, na Obhadhiya, na Zakariya, na Netaneli, na Mikaya kasi ti ta gondzisa lomu madhoropeni ya ka Judha.
8 Ti wa hi zvin’we ni vaLevhi lava: Xemaya, na Netaniya, na Zebhadhiya, na Asaheli, na Xemiramote, na Jehonatani, na Adhonija, na Tobhija, na Tob-Adhonija, zvin’we na mupristi Elixama na mupristi Jehoramu.+
9 Va no sangula ku gondzisa le Judha na va hi ni bhuku ga Nayo wa Jehovha;+ va no fambafamba madhoropeni wontlhe ya ka Judha va gondzisa vanhu.
10 A mifumo yontlhe ya matiko lawa ma nga randzele Judha yi no rurumela hi ku chava Jehovha. Hikwalaho, a yi lwangi na Jehoxafati.
11 A vaFilistiya va wata ni zvinyikiwo ni mali kota ndzuvo* ka Jehoxafati. A vaArabhia va no mu nehela a 7700 wa tiyivhu ta vamatsune ni 7700 wa timhongo ta mitlhambi yabye.
12 Jehoxafati i no simama ku vhuvhuma nguvhu+ niku i no simama ku aka matshamu ma bhiyelweko+ ni madhoropa ya ku veketela titshomba+ le Judha.
13 I no maha mitiro ya hombe madhoropeni ya ka Judha a tlhela ava ni masochwa lawa ya tinhenha Jerusalema.
14 Ma wa xaxametilwe hi mitlawa hi kuya hi tiyindlu ta vapapayi vabye: Ka va ka Judha, ku wa hi ni varangeli va mitlawa ya 1000 wa vanhu. Ku wa hi na murangeli Adna, loyi a nga hi zvin’we ni 300 000 wa masochwa ya tinhenha.+
15 Lahasi kakwe ku wa hi na murangeli Jehohanani, loyi a nga ni 280 000 wa masochwa ya tinhenha.
16 Lahasi kakwe kambe ku wa hi na Amasiya, a n’wana wa Zikri, loyi a nga ti nyikela hi kuzvirandza ntirweni wa Jehovha, niku i wa hi zvin’we ni 200 000 wa masochwa ya tinhenha.
17 Ka va ka Bhenjamini+ ku wa hi na Eliyadha, a musochwa wa nhenha, niku i wa hi zvin’we ni 200 000 wa vavanuna va nga hlomile mawura ni zvitlhangu.+
18 Lahasi kakwe ku wa hi na Jehozabhadha, loyi a nga hi zvin’we ni 180 000 wa vavanuna va hlomileko kulwa yimpi.
19 Lava hi lava va nga tirela hosi a ku patsa ni lava a hosi yi nga va vekile lomu madhoropeni ma vhikelweko khwatsi tikweni gontlhe ga ka Judha.+
Mitlhamuselo ya lahasi
^ Hi kukongoma: “a famba hi”.
^ Kutani: “tributo”, wona laha kaku: “ndzuvo” ka Tlhamuselo wa magezu ya Bhibhiliya.