Kronekele wa wumbiri 19:1-11
19 Jehoxafati, a hosi ya Judha, i no tlhela hi kurula+ mutini* wakwe Jerusalema.
2 Jehu,+ a n’wana wa Hanani,+ a muwoni, i no khinga hosi Jehoxafati, a yaku: “Zva ku sasekela, wena, a ku vhuna vakubiha+ ni ku randza lava va vengako Jehovha ke?+ Hi kota ya lezvo, a zanga ya Jehovha ya ku vhukela.
3 Hambulezvo, ku na ni zvilo zva zvinene zvi kumilweko ka wena+ hakuva u fuvisile a tisinya to basa* lomu tikweni u tlhela u longisela a mbilu ya wena kasi u hlota a Nungungulu wa lisine.”+
4 Jehoxafati i no simama ku hanya Jerusalema; i no tlhela a endzela vanhu kusukela Bherexebha kala tikweni ga zvitsunga ga ka Efrayime+ kasi a va wuyisa ka Jehovha, a Nungungulu wa vakokwani vabye.+
5 I no yimisa a valamuli kambe tikweni gontlhe, madhoropeni wontlhe ya ka Judha ma vhikelweko khwatsi, ka dhoropa ni dhoropa.+
6 I no byela valamuli, aku: “Chelani kota ka lezvi mu mahako, hakuva a mu lamuleli vanhu, kanilezvi mu lamulela Jehovha; na yena i na n’wina a cikhati leci mu lamulako.+
7 Makunu chavani Jehovha.+ Ti woneleni ka lezvi mu mahako, hakuva ka Jehovha, a Nungungulu wa hina, a ku na kungalulami,+ ne cihlawulela,+ ne kuxavelela.”+
8 Le Jerusalema konawu, Jehoxafati i no yimisa a vaLevhi vo kari, ni vapristi, ni tihloko to kari ta tiyindlu ta vapapayi ta ka Izrayeli kasi va tirela Jehovha kota valamuli va tlhela va xuxa timhaka ta vahanyi va Jerusalema.+
9 I no va leletela, aku: “Mu ta maha lezvi hi ku chava Jehovha, ni kutsumbeka, ni hi mbilu yontlhe:
10 Ni ka cihi cikhati leci a vamakabye va n’wina, lava va hanyako madhoropeni yabye, va to tisa a mhaka ya ku mu ta xuxa yi yelanako ni kuhalatwa ka nkhata+ kutani ciwutiso xungetano hi nayo, ni cileletelo, ni milayo kutani zviboho zva kulamula, va tlharihiseni kasi va ngavi ni nandzu mahlweni ka Jehovha; loku mu nga mahi lezvo, a zanga yakwe yi tava hehla ka n’wina ni ka vamakabye va n’wina. Hi zvalezvo mu faneleko ku maha kasi mu ngavi ni nandzu.
11 Hi loyi Amariya, a hosana ya vapristi, loyi a to mu rangela ka yontlhe mitiro ya Jehovha.+ Zebhadhiya, a n’wana wa Ixmayeli, i ta rangela a yindlu ya ka Judha timhakeni tontlhe leti ti yelanako ni hosi. A vaLevhi va ta tira kota varangeli va n’wina. Tiyani hlanha mu khoma ntiro niku ngha Jehovha ava zvin’we ni lava va mahako zvazvinene.”*+
