Kronekele wa wumbiri 2:1-18
-
Malulamiselo ya ku aka tempeli (1-18)
2 Makunu Solomoni i no laya lezvaku a vito ga Jehovha+ gi akelwa yindlu ni lezvaku ku akiwa yindlu* ya mufumo wakwe.+
2 Solomoni i no hlawula a 70 000 wa vavanuna kota vatiri,* ni 80 000 wa vavanuna kota vatsemi va maribye lomu zvitsungeni+ ni 3600 kota vawoneleli vabye.+
3 A ku tsika lezvo, Solomoni i no rumela gezu ka Hiramu,+ a hosi ya Tire, gaku: “Hi nga ndzi mahela lezvi u nga mahela Dhavhidha, a papayi wa mina, zva ku mu rumelela a mapulango ya sedhare kasi a aka a yindlu* ya ku tshama ka yona.+
4 Ndzi lava ku gi akela yindlu a vito ga Jehovha, a Nungungulu wa mina, kasi ndzi yi nyikela kakwe, ni ku hisela ka yona a libani lo nuhela+ mahlweni kakwe a ku patsa ni ku nyikela ka yona a tipawa ta munyikelo hi kukhandzakanya,+ zvin’we ni minyikelo ya kuhiswa, mixo ni gambo,+ ni masabhadho,+ ni ka tihweti tiswa,+ ni ka zvikhati zva mibuzo+ ya Jehovha, a Nungungulu wa hina. Leyo i fanelo ya vaIzrayeli ya kala kupindzuka.
5 A yindlu leyi ndzi akako yi tava ya hombe hakuva a Nungungulu wa hina wa hombe nguvhu a ku hundza vontlhe a vanungungulu lava van’wani.
6 Himani wa ku a nga zvi kota ku mu akela yindlu ke? Hakuva a matilo ni tilo ga matilo a zvi mu eneli.+ Hikwalaho, ndzova mina mani wo kala ndzi mu akela yindlu, ahandle ka wutshamu ga ku mahela kona miphahlo ya kuhiswa mahlweni kakwe ke?
7 Makunu ndzi rumelele a meseri loyi a nga ni wutlhari ga ku maha zvilo hi ouro, ni prata,+ ni tisimbi, ni woya go pswhuka, ni tihindza to pswhukisa ku zvu, ni tihindza ta azuli, na a zvi tiva ku maha zvilo zvo kehliwa. I ta tira le Judha ni le Jerusalema zvin’we ni vameseri va mina va wutlhari, lava Dhavhidha, a papayi wa mina, a va yimisileko.+
8 Ndzi rumelele a mapulango ya sedhare, ni ya junipero,+ ni ya ndzonvori+ ya Lebhanoni hakuva ndza zvi tiva lezvaku a zvitiri zva wena zva zvi tiva khwatsi a ku tsema a tisinya ta Lebhanoni.+ A malandza ya mina ma ta tira ni malandza ya wena+
9 kasi ku ndzi longiselela a mapulango yo tala, hakuva a yindlu leyi ndzi lavako ku aka yi tava ya hombe nguvhu.
10 Ndzi ta nyikela zvakuga ka malandza ya wena,+ a vapandzi va mapulango lava va tsemako a tisinya: 20 000 wa makore* ya trigo, ni 20 000 wa makore ya sevhadha, ni 20 000 wa mabhatu* ya vhinyo, ni 20 000 wa mabhatu ya mafura.”
11 Hi kota ya lezvo, Hiramu, a hosi ya Tire, i no tsala mahungu maya ka Solomoni, yaku: “Hi kota ya lezvi Jehovha a randzako vanhu vakwe, i ku yimisile kota hosi yabye.”
12 Makunu Hiramu i te: “I wa dhumiswe Jehovha, a Nungungulu wa Izrayeli, loyi a nga maha a matilo ni misava hakuva i nyikile hosi Dhavhidha a n’wana wo tlhariha,+ a teleko hi wutlhari ni kuzwisisa,+ loyi a to mu akela yindlu Jehovha a tlhela a ti akela yindlu ya mufumo wakwe.
13 Makunu ndza rumela a meseri wo tlhariha loyi a teleko hi kuzwisisa, Huramu-Abhi,+
14 a n’wana wa wasati wa lixaka la ka Dhani, loyi a papayi wakwe a nga hi wa le Tire. Yena i na ni wutlhari ga ku maha a zvilo hi ouro, ni prata, ni kobre, ni tisimbi, ni maribye, ni mapulango, ni woya go pswhuka, ni tihindza ta azuli, ni tinguwo ta tinene, ni tihindza to pswhukisa ku zvu.+ A nga maha ni wihi nchumu wa ku kehliwa, ni ku maha ni wihi ntiro a nyikiwako.+ I ta tira zvin’we ni vameseri va wena va nga ni wutlhari ga ku maha mitiro ni vameseri va hosi ya mina Dhavhidha, a papayi wa wena.
15 Makunu ngha a hosi ya mina yi rumela a trigo, ni sevhadha, ni mafura, ni vhinyo lezvi yi tsumbisileko ka malandza ya yona.+
16 Hi ta tsema tisinya Lebhanoni,+ tontlhe leti u to ti lava, hi ku rumelela, hi ti tlhatukisa bimbi kala Jopa;+ wena u ta ti teka ti chikela Jerusalema.”+
17 Andzhako ka lezvo, Solomoni i no hlaya vavanuna vontlhe va valuveli, lava va nga hanya lomu tikweni ga Izrayeli,+ a kuma 153 600 wa vavanuna lava Dhavhidha, a papayi wakwe,+ a nga va tsalele.
18 Hikwalaho, i no yimisa a 70 000 wabye kota vatiri,* ni 80 000 kota vatsemi va maribye+ lomu zvitsungeni ni 3600 kota vawoneleli kasi va tirisa vanhu.+
Mitlhamuselo ya lahasi
^ Kutani: “palácio”.
^ Kutani: “kota varwali va mindzhwalo”.
^ Kutani: “palácio”.
^ Kutani: “kota varwali va mindzhwalo”.