Kronekele wa wumbiri 24:1-27
24 Jehowaxi i wa hi ni 7 wa malembe a cikhati leci a nga maha hosi,+ niku i no fuma a 40 wa malembe Jerusalema. A vito ga mamani wakwe ku wa hi Zibhiya, wa le Bherexebha.+
2 Jehowaxi i no simama ku maha zvakululama mahlweni ka Jehovha masikwini wontlhe ya mupristi Jehoyadha.+
3 Jehoyadha i no mu lavela vasati vambiri Jehowaxi; Jehowaxi i nova papayi wa vafana ni vanhanyana.
4 Hi kufamba ka cikhati, Jehowaxi i no xuva mbilwini yakwe a ku aketa yindlu ya Jehovha.+
5 Hikwalaho, i no tsombanisa a vapristi ni vaLevhi, aku kabye: “Fambani madhoropeni ya ka Judha mu ya hlengisa a mali ka vontlhe a vaIzrayeli ya ku aketa a yindlu ya Nungungulu wa n’wina.+ Lezvo zvi maheni lembe ni lembe. Mu fanele ku zvi maha hi cihatla.” Kanilezvi a vaLevhi va no maha mihoni.+
6 Hi cigelo leco, a hosi yi no vitana mupristi Jehoyadha yi taku kakwe:+ “Hikuyini u nga kala ku londza a vaLevhi lezvaku va tisa a khupo wo basa hi ka vaJudha ni ka va le Jerusalema, lowu wu leletelweko hi Mosi,+ a nandza ga Jehovha, wu nga khupo wo basa wa tenda ga Wukustumunyu wa kuta hi ka bandla ga Izrayeli ke?+
7 Hakuva a vana va Ataliya,+ a wasati loyi wa kubiha, va bhoxile va nghena lomu ndlwini ya Nungungulu wa lisine+ va tirisa a zvilo zvontlhe zvo basa zva yindlu ya Jehovha wukhozelini ga Bhaali.”
8 Makunu loku a hosi yi layile, ku no mahiwa a kaxa+ ga minyikelo gi vekiwa lahandle hi le nyangweni ya yindlu ya Jehovha.+
9 Andzhako ka lezvo, ku no huwelelwa lomu Judha kontlhe ni le Jerusalema lezvaku ku fanele ku nehiwa a khupo wo basa ka Jehovha,+ lowu Mosi, a nandza ga Nungungulu wa lisine, a nga leletele a vaIzrayeli ciwuleni.
10 A tihosana tontlhe ni vanhu vontlhe va no tsaka,+ va simama ku neha mihlengo va ta yi chela lomu kaxeni ga minyikelo kala gi tala.*
11 Khati ni khati a vaLevhi va ngaya ka hosi ni kaxa ga minyikelo, va wona lezvaku ku na ni mali yo tala, a matsalani wa hosi ni muvhuneteli wa hosana ya vapristi va waya va ya chulula a mali yontlhe yi nga hi lomu kaxeni+ ga minyikelo, va gumesa va gi tlhelisa wutshan’wini ga gona. Lezvo va wa zvi maha siku ni siku, hikwalaho va no hlengeletela mali yo tala nguvhu.
12 Hi kulandzela, a hosi na Jehoyadha va wa nyikela a mali ka lava va nga wonelela a ntiro wa yindlu ya Jehovha; lava va wa thola a vatsemi va maribye ni vameseri kasi ku aketa a yindlu ya Jehovha+ zvin’we ni lava va zvi tivako a ku tira hi tisimbi ni kobre kasi va lungisa a yindlu ya Jehovha.
13 Lava va nga kari va wonelela a ntiro va no sangula ku tira niku a ntiro wa ku lungisa yindlu wu noya mahlweni na wu wonelelwa hi vona. Va no aketa a yindlu ya Nungungulu wa lisine yi ku khwatsi hi lezvi yi nga tshamisile zvona kusanguleni va tlhela va yi tiyisa.
14 Zvalezvi va nga mbheta a ntiro, va no teka mali leyi yi nga sele va yi tlhelisa ka hosi ni ka Jehoyadha; vona va no yi tirisa kasi ku maha a zvibya zva yindlu ya Jehovha, ni zvibya zva ntiro ni zva ku nyikela hi zvona a minyikelo, ni tikopo, ni zvibya zva ouro ni zva prata.+ Masikwini wontlhe ya Jehoyadha va wa maha miphahlo ya kuhiswa+ hi kukhandzakanya lomu ndlwini ya Jehovha.
15 Laha Jehoyadha a nga khosahele, na a tsakile hi ku hanya malembe yo tala, i nofa. I file na a hi ni 130 wa malembe.
16 Hikwalaho, va no mu lahla Dhoropeni ga Dhavhidha zvin’we ni tihosi,+ hakuva i wa mahile zvazvinene lomu Izrayeli+ na a mahela a Nungungulu wa lisine ni yindlu Yakwe.
17 Andzhako ka kufa ka Jehoyadha, a tihosana ta ka Judha ti noya ti ya korama ka hosi, niku a hosi yi no va ingisa.
18 Va no tsika a yindlu ya Jehovha, a Nungungulu wa vakokwani vabye va sangula ku khozela a tisinya to basa* ni zvifananiso; hikwalaho, a zanga ya Nungungulu yi no vhukela Judha ni Jerusalema hi kota ya nandzu wabye.
19 Jehovha i no simama ku va rumelela vaphrofeti kasi va va vhuna ku tlhelela kakwe; a vaphrofeti va no simama ku va tlharihisa* kanilezvi a va ingisangi.+
20 A moya wa Nungungulu wu nota ka Zakariya, a n’wana wa mupristi Jehoyadha;+ i no yima ka wutshamu go tlakuka mahlweni ka vanhu, aku kabye: “A Nungungulu wa lisine i ngalo: ‘Hikuyini mu hambunyetako a zvileletelo zva Jehovha? Mu nga ta humelela! Kota lezvi mu tsikileko Jehovha, yenawu i ta mu tsika.’”+
21 Kanilezvi va no xuxa cikungo ca ku mu vhukela,+ va mu gandla hi maribye laha tsendzeleni* wa yindlu ya Jehovha, kota lezvi a hosi yi nga layile.+
22 Hosi Jehowaxi a nga alakanyangi a lirandzo li nga mbheliko leli Jehoyadha, a papayi wa Zakariya, a nga mu kombisile; i no daya n’wana wakwe, loyi a cikhati leci a nga kari afa a ngaku: “Jehovha i wa zvi wone a ku tsayisa hi kota ya mitiro ya wena.”+
23 Kusanguleni ka lembe, a butho ga vaSiriya gi no kandziha gi ya vhukela Jehowaxi, gi dhumela Judha ni Jerusalema.+ Andzhako ka lezvo, a vaSiriya va no daya a tihosana tontlhe+ ta vanhu, va teka zvontlhe lezvi va nga zvi phangile va zvi rumela ka hosi ya Dhamasku.
24 Hambu lezvi a butho ga vaSiriya gi nga hi ni vavanuna va tsongwani, Jehovha i no nyikela a butho ga hombe nguvhu+ ga vaJudha mandleni yabye hakuva va wa tsikile Jehovha, a Nungungulu wa vakokwani vabye. Hikwalaho, a vaSiriya va no lamula Jehowaxi.
25 A cikhati leci a vaSiriya va nga suka va famba (hakuva va mu siyile na a bayisilwe nguvhu*), a malandza yakwe ma no xuxa cikungo ca ku mu vhukela hi lezvi a nga halatile nkhata wa n’wana wa mupristi Jehoyadha.+ Ma no mu daya laha mubhedhini wakwe.+ Hikwalaho, i nofa va mu lahla Dhoropeni ga Dhavhidha,+ kanilezvi a va mu lahlangi zvilahleni zva tihosi.+
26 Lava va nga xuxa cikungo+ ca ku mu vhukela hi lava: Zabhadha, a n’wana wa Ximeyate, a wasati wa muAmoni, na Jehozabhadha, a n’wana wa Ximrite, a wasati wa muMowabhi.
27 Xungetano hi vana vakwe, ni magezu yo tala ya kulamulwa kakwe,+ ni kuaketwa ka yindlu ya Nungungulu wa lisine,+ a zvilo lezvo zvontlhe zvi tsalilwe lomu ka timhaka ti tsalilweko Bhukwini ga Tihosi. A n’wana wakwe, Amaziya, i no maha hosi cikhundleni cakwe.
Mitlhamuselo ya lahasi
^ Zvi nga maha na zvi wula ku: “kala loku vontlhe va nyikele”.
^ Kutani: “nyika wukustumunyu go va vhukela”.
^ Kutani: “pátio”.
^ Kutani: “na a hi ni mababyi yo tala”.
