Kronekele wa wumbiri 26:1-23
26 Makunu a vanhu vontlhe va Judha va no teka Uziya,+ loyi a nga hi ni 16 wa malembe, va mu maha hosi cikhundleni ca papayi wakwe Amaziya.+
2 I no aketa Elote,+ a gi tlhelisela ka Judha andzhako ka loku a hosi* yi etlele yi humula ni vakokwani va yona.+
3 Uziya+ i wa hi ni 16 wa malembe a cikhati leci a nga maha hosi, niku i no fuma a 52 wa malembe Jerusalema. A vito ga mamani wakwe ku wa hi Jekoliya, wa le Jerusalema.+
4 I no simama ku maha zvakululama mahlweni ka Jehovha a ku khwatsi hi lezvi a papayi wakwe, Amaziya, a nga mahile.+
5 I no simama ku hlota Nungungulu masikwini ya Zakariya, loyi a nga mu gondzisa ku chava a Nungungulu wa lisine. Ka cikhati leci a nga kari a hlota Jehovha, a Nungungulu wa lisine i no mu maha a vhuvhuma.+
6 Uziya i no huma a yalwa ni vaFilistiya,+ a bhoxa muhocho ka muro wa Gati,+ ni muro wa Jabne,+ ni muro wa Axdhodhe.+ Hi kulandzela, i no aka madhoropa tikweni ga Axdhodhe ni tikweni ga vaFilistiya.
7 A Nungungulu wa lisine i no simama ku mu vhuna a kulwa ni vaFilistiya, ni vaArabhiya+ lava va nga hanya Gur-Bhaali, a tlhela a mu vhuna a kulwa ni vaMewunime.
8 A vaAmoni+ va no sangula ku humesa ndzuvo* ka Uziya. Hi kugumesa, a nduma yakwe yi no hangalaka kala Gibhite, hakuva i nova ni ntamu wa hombe nguvhu.
9 Ahandle ka lezvo, Uziya i no aka tikhokhola*+ Jerusalema kusuhani ni Nyangwa ya laha Khoneni,+ ni Nyangweni ya le Nkoveni,+ ni ka Pilari ga Ciseketelo, a ti tiyisa.
10 I no aka tikhokhola*+ kambe le ciwuleni a tlhela a kela tihlowo to tala (hakuva i wa hi ni zvifuyo zvo tala); i no maha zvezvo kambe le Xefela ni le nkoveni. I wa hi ni varimi ni vanhu va nga tira zvivhineni* lomu zvitsungeni ni le Karmeli, hakuva i wa randza ku rima.
11 A ku tsika lezvo, Uziya i wa hi ni butho ga masochwa ma nga longile a kulwa yimpi. Ma wa huma maya tiyimpini na ma xaxametilwe hi mitlawa. Ma no hlayiwa ma tlhela ma tsalelwa+ hi Jeyeli, a matsalani,+ na Maaseya, a hosana, na va rangelwa hi Hananiya, a mun’we wa tihosana ta hosi.
12 A tihloko tontlhe ta tiyindlu ta vapapayi leti ti nga rangela a masochwa lawo ya tinhenha ti wa hi 2600.
13 A masochwa ma hlomileko, lawa ma nga rangelwa hi vona, ma wa hi 307 500 wa vavanuna va longileko kuya yimpi, a butho ga ntamu gi vhikelako hosi ka nala.+
14 Uziya i no hlomisa a butho gontlhe hi zvitlhangu, ni matlhari,+ ni makapasete, ni zvikatawu zva simbi,+ ni mawura, ni zvipelupelu.*+
15 Ahandle ka lezvo, i no maha michini ya yimpi le Jerusalema yi tsambilweko hi vaenjinyero. Yi no vekiwa lomu tikhokholeni*+ ni lomu makhoneni ya muro niku yi wa zvi kota a ku phanda mipaxa ni ku hoxela maribye ya hombe. Hikwalaho, a nduma yakwe yi no hangalaka matlhelweni wontlhe, hakuva i no vhunetelwa hi tindlela ti hlamalisako niku i nova ni ntamu.
16 Kanilezvi, zvalezvi a ngava ni ntamu, a mbilu yakwe yi no sangula ku ti tlakusa, lezvi zvi nga mu tisela khombo, niku i no maha zvilo zva kungatsumbeki ka Jehovha, a Nungungulu wakwe, hi ku nghena lomu tempeleni ya Jehovha kasi a hisa libani laha alatini ga ku hisela libani.+
17 Zvalezvo, mupristi Azariya ni van’wani vapristi va Jehovha va 80 va kutiya hlanha va no nghena va mu landza.
18 Va no komamisa hosi Uziya, vaku: “A hi ntiro wa wena, hosi Uziya, a ku mu hisela libani Jehovha!+ Vapristi ntsena va faneleko ku hisa libani, hakuva i vana va Aroni,+ va nga vona va basisilweko. Huma lomu wutshan’wini go basa, hakuva u mahile zvilo zva kungatsumbeki, ne u nga ta amukela wudzundzo hi ka Jehovha Nungungulu hi kota ya lezvi.”
19 Kanilezvi Uziya, loyi a nga hi ni cibya co hisela libani canjeni gakwe kasi a hisa libani, i no vhindluka hi zanga.+ Na a ha zangarele a vapristi, i no biwa hi hlokonho+ laha cikandzeni cakwe mahlweni ka vapristi lomu ndlwini ya Jehovha kusuhani ni alati go hisela libani.
20 Laha Azariya, a hosana ya vapristi, ni vontlhe vapristi va nga mu cuwuka, va no wona lezvaku i wa bilwe hi hlokonho laha cikandzeni cakwe. Hikwalaho, va no mu humesa hi kuhatlisa, niku yenawu i no hatla a huma hakuva Jehovha i wa mu bile.
21 Hosi Uziya i no simama ni hlokonho kala a siku legi a ngafa hi gona. Kota munhu wa hlokonho, i no simama ku tshama ka yindlu yin’wani,+ hakuva i wa vhalilwe ku nghena ndlwini ya Jehovha. Jothamu, a n’wana wakwe, hi yena a nga kari a rangela a yindlu* ya hosi, a lamula vanhu va tiko.+
22 A man’wani matimu ya Uziya, kusukela kusanguleni kala magumo, ma tsalilwe hi muphrofeti Isaya,+ a n’wana wa Amozi.
23 Hi kugumesa, Uziya i no etlela a humula ni vakokwani vakwe; va no mu lahla ni vakokwani vakwe, kanilezvi sin’wini ga zvilahla zva tihosi, hakuva va waku: “I na ni hlokonho.” A n’wana wakwe Jothamu+ i nova hosi cikhundleni cakwe.
Mitlhamuselo ya lahasi
^ Ku nga Amaziya, a papayi wakwe.
^ Kutani: “tributo”, wona laha kaku: “ndzuvo” ka Tlhamuselo wa magezu ya Bhibhiliya.
^ Kutani: “torres”.
^ A zvivhina masimu ya tisinya leti ti pswalako mauvha.
^ Kutani: “torres”.
^ Kutani: “torres”.
^ Kutani: “palácio”.
