Kronekele wa wumbiri 30:1-27
-
Hezekiya a maha Phasika (1-27)
30 Hezekiya i no rumela gezu kontlhe lomu Izrayeli+ ni lomu Judha, a tlhela a tsala mapapilo maya ka va ka Efrayime ni ka va ka Manase,+ kasi vaya ndlwini ya Jehovha a Jerusalema va ya maha Phasika ka Jehovha, a Nungungulu wa Izrayeli.+
2 Hambulezvo, a hosi ni tihosana ta yona ni bandla gontlhe lomu Jerusalema va no boha a ku maha Phasika ka hweti ya wumbiri,+
3 hakuva va wa nga zvi kotangi ku gi maha hi cikhati ca kona,+ hakuva ku wa nga hi na vapristi vo enela lava va nga ti basisile+ ne a vanhu va wa nga hlengeletanangi Jerusalema.
4 A ciboho leco ci no woneka na ci lulamile mahlweni ka hosi ni ka bandla gontlhe.
5 Hikwalaho, va no boha lezvaku ku mahiwa citiviso kontlhe lomu Izrayeli, kusukela Bherexebha kala Dhani,+ ca lezvaku a vanhu va fanele kuya Jerusalema va ya maha Phasika ka Jehovha, a Nungungulu wa Izrayeli, hakuva, kota ntlawa, va wa nga gi mahangi hi kuya hi lezvi zvi tsalilweko.+
6 Hi kulandzela, ku no fambafamba zvirun’wa* kontlhe lomu Izrayeli ni lomu Judha na zvi hi ni mapapilo ma ngata hi ka hosi ni tihosana ta yona, hakuva a hosi yi wa layile, yiku: “N’wina, vanhu va Izrayeli, tlhelelani ka Jehovha, a Nungungulu wa Abrahama, na Isaka, na Izrayeli, kasi yenawu a tlhelela ka misalela leyi yi ponileko canjeni ga tihosi ta Asiriya.+
7 Mu nga fani ni vakokwani va n’wina ni vamakabye va n’wina lava va nga kala ku tsumbeka mahlweni ka Jehovha, a Nungungulu wa vakokwani vabye, laha ka kuza a va maha vava nchumu wo tshisa, a ku khwatsi hi lezvi mu zvi wonako.+
8 Makunu mu nga ti nonohisi a ku khwatsi hi vakokwani va n’wina.+ Ti koramiseni ka Jehovha, muta wutshan’wini gakwe ga kubasa+ legi a gi basisileko kala kupindzuka, mu ta tirela Jehovha, a Nungungulu wa n’wina, kasi a zanga yakwe yi vhurako yi fela ku suka ka n’wina.+
9 Hakuva loku mu tlhelela ka Jehovha, a vamakabye va n’wina ni vana va n’wina va ta mahelwa wuxinji hi lava va va khomileko+ niku va ta va tsika va wuya tikweni legi,+ hakuva Jehovha, a Nungungulu wa n’wina, wa zwela wusiwana niku i na ni wuxinji,+ a nga ta jikisa a nghohe yakwe a nga mu cuwuki loku mu tlhelela kakwe.”+
10 Hikwalaho, a zvirun’wa* zvi no fambafamba hi dhoropa ni dhoropa tikweni ga ka Efrayime ni ga ka Manase,+ zvi famba kala Zebhuloni, kanilezvi a vanhu va wo va hleka va tlhela va va poyila.+
11 Hambulezvo, a vokari va ka Axeri, ni va ka Manase, ni va ka Zebhuloni va no ti koramisa vaya Jerusalema.+
12 A canja ga Nungungulu wa lisine gonawu gi wa hi le Judha kasi gi va tlhanganisa* va maha lezvi a hosi ni tihosana va nga va leletele hi ku landza a gezu ga Jehovha.
13 Ku no hlengeletana a vanhu vo tala Jerusalema kasi va maha a Mubuzo wa Tipawa to kala Comelo+ hi hweti ya wumbiri;+ gi wa hi bandla ga hombe.
14 Va no suka va suselela a maalati lawa ma nga hi Jerusalema,+ va suselela ni maalati wontlhe ya ku hisela ka wona libani+ va ya ma hoxa nkoveni wa Kidroni.
15 Andzhako ka lezvo, va no daya a muphahlo wa Phasika hi siku ga wu 14 ka hweti ya wumbiri. A vapristi ni vaLevhi va nowa tingana, hikwalaho va no ti basisa va tlhela va neha a minyikelo ya kuhiswa ndlwini ya Jehovha.
16 Va no yima matshan’wini yabye khwatsi hi lezvi zvi leletelwako hi Nayo wa Mosi, a munhu wa Nungungulu wa lisine. Hi kulandzela, a vapristi va no n’watsekela a nkhata+ lowu va nga wu amukela hi mandleni ya vaLevhi.
17 Ku wa hi ni votala lomu bandleni va nga kala va nga ti basisangi; a vaLevhi va wa rangela a kudawa ka zvihari zva Phasika na zvi dayelwa vontlhe lava va nga kala va nga hlazvekangi,+ kasi va basiselwa Jehovha.
18 Hakuva a ntsengo wa hombe wa vanhu, nguvhunguvhu a va ka Efrayime, ni va ka Manase,+ ni va ka Isakari, ni va ka Zebhuloni, va wa nga ti basisangi, hambulezvo va gile a Phasika, va hambunyeta lezvi zvi tsalilweko. Kanilezvi Hezekiya i no va khongelela, aku: “Jehovha, loyi a nga mu nene,+ i wa tsetselele
19 ni wihi a longiseleko a mbilu yakwe kasi ku hlota a Nungungulu wa lisine,+ Jehovha, a Nungungulu wa vakokwani vakwe, hambu lezvi a nga kala ku ti basisa hi kuya hi milayo ya ku ti basisa.”+
20 Jehovha i no ingisa Hezekiya a tsetselela* vanhu.
21 Hikwalaho, a vaIzrayeli lava va nga hi Jerusalema va no maha a Mubuzo wa Tipawa to kala Comelo+ hi 7 wa masiku na va tsakile nguvhu+ niku a vaLevhi ni vapristi va wa dhumisa Jehovha siku ni siku, na vaba zvibya zvabye zva ku chaya hi zvona zvi vhuma nguvhu, va zvi chayela Jehovha.+
22 Ahandle ka lezvo, Hezekiya i no tiyisa a* vaLevhi vontlhe lava va nga tirela Jehovha hi wutlhari. Ka wontlhe masiku ya 7 ya mubuzo,+ va noga, va nyikela miphahlo ya kuhlengela+ va tlhela va bonga Jehovha, a Nungungulu wa vakokwani vabye.
23 A bandla gontlhe gi no boha a kuva gi maha kambe a mubuzo ka man’wani masiku ya 7, hikwalaho, va no wu maha hi man’wani masiku ya 7 hi kutsaka.+
24 Hezekiya, a hosi ya ka Judha, i no nyikela ka bandla a 1000 wa tihomu ni 7000 wa tiyivhu; a tihosana ti no nyikela ka bandla a 1000 wa tihomu ni 10 000 wa tiyivhu;+ ni vapristi vo tala va wo ti basisa.+
25 A bandla gontlhe ga Judha, ni vapristi, ni vaLevhi, ni bandla gontlhe legi gi nga tile hi Izrayeli,+ ni valuveli+ lava va nga tile hi tikweni ga Izrayeli, ni lava va nga kari va hanya Judha, va no simama ku tsaka.
26 Ku nova ni kutsaka ka hombe Jerusalema, hakuva kusukela masikwini ya Solomoni, a n’wana wa Dhavhidha, a hosi ya Izrayeli, ku wa nga se maheka zvilo zvo kota lezvo Jerusalema.+
27 Hi kugumesa, a vapristi va vaLevhi va no suka va yima va katekisa vanhu.+ Nungungulu i nozwa a gezu gabye, ni mukhongelo wabye wu no chikela wutshan’wini gakwe go basa, matilweni.
Mitlhamuselo ya lahasi
^ Hi kukongoma: “vatsutsumi”.
^ Hi kukongoma: “vatsutsumi”.
^ Hi kukongoma: “maha vava ni mbilu yin’we”.
^ Hi kukongoma: “chuma”.
^ Hi kukongoma: “wulawula timbilwini ta”.
