Kronekele wa wumbiri 32:1-33
32 Andzhako ka zvilo lezvi ni mitiro leyi yo tsumbeka,+ Senakeribhe, a hosi ya Asiriya, i nota a ta dhumela Judha. I no randzela a madhoropa ma vhikelweko khwatsi na a xuva ku bhoxa a nghena a tlhela a ma wutla.+
2 Laha Hezekiya a nga wona lezvaku Senakeribhe i tile na a hi ni kungo ga kulwa yimpi ni Jerusalema,
3 i no maha ciboho, andzhako ka ku bhula ni tihosana takwe ni tinhenha takwe, ca ku setela zvibuka zva mati lezvi zvi nga hi le handle ka dhoropa,+ niku va no mu seketela.
4 Ku no tlhanganisiwa a vanhu vo tala va setela zvibuka zvontlhe ni cicongwana leci ci nga khulunga lomu tikweni, vaku: “Hikuyini a tihosi ta Asiriya ti nga wa tata ti ta kuma a mati yo tala ke?”
5 Ahandle ka lezvo, i no tiya hlanha a aketa muro wontlhe lowu wu nga khungumulilwe, a yimisa tikhokhola* ka wona a tlhela a aka wun’wani muro hi le handle. I no lungisa ni Milo*+ wa Dhoropa ga Dhavhidha a tlhela a maha matlhari yo tala ni zvitlhangu.
6 I no yimisa a varangeli va masochwa hehla ka vanhu, a va tsombanisa laha prasa* ya nyangwa ya dhoropa, a va tiyisa,* aku:
7 “Tiyani hlanha muva ni ntamu. Mu nga chavi hambu ku tsemeka hlanha hi kota ya hosi ya Asiriya+ ni citshungu contlhe leci a nga naco, hakuva lava va nga na hina va tele nguvhu a ku hundza lava va nga na yena.+
8 Yena i na ni woko ga nyama,* kanilezvi hina hi na Jehovha, a Nungungulu wa hina, kasi a hi vhuna ni ku hi lwela tiyimpi ta hina.”+ Ni vanhu va no tiyisiwa hi magezu ya Hezekiya, a hosi ya ka Judha.+
9 Andzhako ka lezvo, laha Senakeribhe, a hosi ya Asiriya, a nga hi Lakixe+ ni butho gakwe gontlhe ga ntamu, i no rumela a malandza yakwe Jerusalema, ka Hezekiya, a hosi ya ka Judha, ni ka vaJudha vontlhe Jerusalema,+ ma yaku:
10 “Senakeribhe, a hosi ya Asiriya, i ngalo: ‘Mo tsumba yini lezvi mu simamako lomu Jerusalema kuveni gi randzelwe?+
11 A mu zvi woni ku Hezekiya o mu kalavela kasi mufa hi ndlala ni tora, lezvi a nge: “Jehovha, a Nungungulu wa hina, i ta hi tlhatlhisa mandleni ya hosi ya Asiriya”?+
12 Kasi a hi yena Hezekiya yaloyi a nga suselela a matshamu yo tlakuka+ ya Nungungulu wa n’wina* ni maalati Yakwe,+ a byela a vanhu va Judha ni va Jerusalema, aku: “Mu fanele ku korama mahlweni ka alati gin’we ni ku mahela ka gona a miphahlo ya kuhiswa”+ ke?
13 A mu zvi tivi lezvi mina ni vakokwani va mina hi nga maha vanhu vontlhe va matiko ke?+ Xana a vanungungulu va matiko lawo va zvi kotile a ku tlhatlhisa a tiko gabye canjeni ga mina ke?+
14 Hi wihi a nungungulu cikari ka vanungungulu va matiko lawa a vakokwani va mina va ma nyikeleko kulovisweni a zvi kotileko ku tlhatlhisa vanhu vakwe canjeni ga mina, laha ka kuza a Nungungulu wa n’wina a zvi kota ku mu tlhatlhisa canjeni ga mina ke?+
15 Mu nga vhumeli ku kalavelwa hi Hezekiya kutani ku a mu hambukisa hi ndlela leyi!+ Mu nga kholwi kakwe, hakuva a ku na nungungulu wa tiko ni gin’we kutani wa mufumo ni wun’we a zvi kotileko ku tlhatlhisa a vanhu vakwe canjeni ga mina ni ga vakokwani va mina. Makunu a ndza ha wuli hi Nungungulu wa n’wina, a nge zvi koti ku mu tlhatlhisa canjeni ga mina!’”+
16 A malandza yakwe ma tlhelile ma engetela man’wani magezu yo vhukela Jehovha, a Nungungulu wa lisine, na Hezekiya, a nandza gakwe.
17 I no tsala ni mapapilo+ ya ku rukatela Jehovha, a Nungungulu wa Izrayeli,+ ni ku wulawula zvakubiha hi yena, aku: “A ku fana ni vanungungulu va matiko lawo, lava va nga tsandzeka ku tlhatlhisa a vanhu vabye canjeni ga mina,+ a Nungungulu wa Hezekiya yenawu a nga ta zvi kota ku tlhatlhisa a vanhu vakwe canjeni ga mina.”
18 Va no simama ku wulawula hi gezu ga hombe hi lirimi la vaJudha ka vanhu va Jerusalema lava va nga hi le hehla ka muro, kasi va va dzukisela ni ku va tsema hlanha va fela ku teka a dhoropa.+
19 Va no wulawula kubiha hi Nungungulu wa Jerusalema a ku fana ni lezvi va nga wulawulisa zvona kubiha hi vanungungulu va matiko ya misava, lava va mahilweko hi mandla ya vanhu.
20 Kanilezvi hosi Hezekiya na muphrofeti Isaya,+ a n’wana wa Amozi, va no simama ku khongela hi mhaka leyi ni ku rilela matilo va kombela ku vhuniwa.+
21 Makunu Jehovha i no rumela a ngilozi yi ya swiyela a masochwa wontlhe ya tinhenha,+ ni varangeli, ni tihosana ta butho ga hosi ya Asiriya. Hikwalaho, i no tlhela tikweni gakwe na a no koyo tingana. Andzhako ka lezvo, i no nghena lomu ndlwini* ya nungungulu wakwe niku a vokari va vana vakwe va no mu daya kwalomo hi cipadha.+
22 Hikwalaho, Jehovha i no ponisa Hezekiya ni vahanyi va Jerusalema canjeni ga Senakeribhe, a hosi ya Asiriya, ni canjeni ga vontlhe lava van’wani, a va nyika kuhumula matlhelweni wontlhe.
23 Niku a vanhu vo tala va no neha a zvinyikiwo ka Jehovha lomu Jerusalema ni zvilo zva zvinene ka Hezekiya, a hosi ya ka Judha,+ niku i no kombiswa nguvhu cichavo hi matiko wontlhe andzhako ka lezvo.
24 Ka masiku lawo, Hezekiya i no babya zva mahati. Hikwalaho, i no khongela ka Jehovha;+ yena i no mu hlamula a tlhela a mu nyika ciwoniso.+
25 Kanilezvi Hezekiya a nga kombisangi kubonga ka zvilo zva zvinene lezvi a nga mahelwa, hakuva a mbilu yakwe yi no ti tlakusa, zvi tisa zanga hehla kakwe, ni ka vaJudha ni ka Jerusalema.
26 Hambulezvo, Hezekiya i no ti koramisa, a tsika kutikukumukisa ka mbilu yakwe,+ yena zvin’we ni vahanyi va Jerusalema, niku a zanga ya Jehovha a yi tangi hehla kabye masikwini ya Hezekiya.+
27 Hezekiya i nova ni titshomba to tala ni wudzundzo ga hombe;+ i no ti mahela a matshala+ yo veketela kona prata, ni ouro, ni maribye ya lisima, ni mafura ya bhalsamu, ni zvitlhangu, ni zvilo zvontlhe zva lisima.
28 I no maha kambe ni matshala yo veketela kona timbewu ni vhinyo yiswa ni mafura, a ku patsa ni maranga ya zvifuyo zva tixakaxaka ni zvibala zva mitlhambi.
29 I no ti akela ni madhoropa, a ti lavela a zvifuyo zvo tala, a tiyivhu ni tihomu, hakuva Nungungulu i wa mu nyikile a titshomba to tala.
30 Kuve Hezekiya a nga setela a cibuka ca le hehla ca mati+ ya Gihoni,+ a ma jikisa ma relela maya mupela-gambo wa Dhoropa ga Dhavhidha,+ niku Hezekiya i no humelela mitirweni yakwe yontlhe.
31 Hambulezvo, a cikhati leci a tihosana ta Bhabhuloni ti nga rumela a zvirun’wa kasi zvi ta wutisa xungetano hi ciwoniso+ leci ci nga humelele lomu tikweni,+ a Nungungulu wa lisine i no mu tsika yece kasi a mu veka ciringweni+ a fela ku tiva zvontlhe zvi nga hi mbilwini yakwe.+
32 A man’wani matimu ya Hezekiya ni zvimaho zvakwe zva lirandzo li nga mbheliko+ ma tsalilwe ka muwoniso wa muphrofeti Isaya,+ a n’wana wa Amozi, Bhukwini ga Tihosi ta ka Judha ni ta ka Izrayeli.+
33 Hi kugumesa, Hezekiya i no etlela, a humula ni vakokwani vakwe va mu lahla ka wutshamu go tlakuka ndleleni ya kuya zvilahleni zva vana va Dhavhidha.+ A vaJudha vontlhe ni vahanyi va Jerusalema va no mu dzundza kufeni kakwe. A n’wana wakwe Manase i no maha hosi cikhundleni cakwe.
Mitlhamuselo ya lahasi
^ Kutani: “torres”.
^ I gezu ga ciHebheru gi wulako ku: “ku tata”.
^ Hi kukongoma: “a wulawula timbilwini tabye”.
^ Kutani: “ntamu wa vanhu”.
^ Hi kukongoma: “matshamu yakwe yo tlakuka”.
^ Kutani: “tempeleni”.
