Kronekele wa wumbiri 4:1-22
4 Hi kulandzela, i no maha a alati ga kobre+ ga 20 wa mikono a kuleha, ni 20 wa mikono a kuanama, ni 10 wa mikono a kutlakuka.
2 I no nyekisa kobre a maha Bimbi.*+ Gi wa hi ga redhonda na gi hi ni 10 wa mikono kusukela ka tlhelo gin’we ga nomu kala ka gin’wani, ni ntlhanu wa mikono a kutlakuka, niku zvi wa lava a lingoti la ku pima hi lona la 30 wa mikono a kuleha kasi ku gi rendzeleka.+
3 Lahasi ka nomu wa gona ku wa sasekiselwe hi zvilo zvo khwatsi zvihambu+ zvi nga wu rendzelekele wontlhe; ka nkono ni nkono ku wa hi ni 10 wa zvihambu zvi nga rendzelekela a Bimbi gontlhe. A zvihambu zvi wa xalamele hi tilinya timbiri niku zvi wa nyekiselwe laha ka Bimbi zviva nchumu wun’we.
4 Gi wa hi hehla ka 12 wa madhuna ya tihomu:+ a manharu ma wa cuwukile n’walungu,* a manharu ma cuwuka mupela-gambo, a manharu ma cuwuka dzongeni,* ni manharu ma cuwuka mutsuwuka-gambo. A Bimbi gi wa tlhatekilwe hehla ka wona niku wontlhe ma wa fularele laha cikari.
5 A kudziva ka gona ku wa ringana ni kuanama ka canja;* a nomu wa gona wu wa mahisilwe ku khwatsi i nomu wa kopo, na wu tshamisile ku khwatsi citsangi ca khon’wa. A Bimbi legi gi waya 3000 wa mabhatu.*
6 Ahandle ka lezvo, i no maha a 10 wa tibasiya, a veka a ntlhanu cineneni ni ntlhanu cibhabheni.+ Va wa hlazva ni ku halujela ka tona lezvi va nga zvi tirisa ku maha hi zvona a minyikelo ya kuhiswa.+ Kanilezvi a mati ya Bimbi ma wa hi ya vapristi kasi va hlamba hi wona.+
7 Andzhako ka lezvo, i no maha a 10 wa minenge ya tikandiya ya ouro,+ hi ku landza a zvileletelo zva kona,+ a yi veka lomu tempeleni, a ntlhanu cineneni ni ntlhanu cibhabheni.+
8 I no maha ni 10 wa timeza a ti veka lomu tempeleni, a ntlhanu cineneni ni ntlhanu cibhabheni;+ i no maha ni 100 wa mingelo ya ouro.
9 Hi kulandzela, i no maha a tsendzele*+ wa vapristi+ ni tsendzele wa hombe ni tivati ta tsendzele.+ I no nameketela kobre lomu ka tivati ta yona.
10 I no veka a Bimbi hi tlhelo ga cinene gi cuwuka dzongeni wa mutsuwuka-gambo.+
11 Hiramu i no maha ni mabhaketi, ni mafoxola ni mingelo.+
Hikwalaho, Hiramu i no mbheta a ntiro lowu a nga mahela hosi Solomoni ndlwini ya Nungungulu wa lisine:+
12 mapilari mambiri+ ni tihloko to tshamisa ku khwatsi mingelo ti nga hi le hehla ka mapilari lawo ya mambiri; ni tiredhi timbiri+ ta ku fenengeta a tihloko timbiri to tshamisa ku khwatsi mingelo ti nga hi le hehla ka mapilari;
13 ni 400 wa maromã+ ya tiredhi leto ta timbiri — tilinya timbiri ta maromã ka redhi yin’we ni yin’wani — kasi ku fenengeta a tihloko timbiri to tshamisa ku khwatsi mingelo ti nga hi le hehla ka mapilari;+
14 ni 10 wa zvikarinyana* ni 10 wa tibasiya ta zvikarinyana;+
15 ni Bimbi ni 12 wa madhuna ya tihomu lahasi ka gona;+
16 a mabhaketi, ni mafoxola, ni magarfo+ ni zvontlhe a zvibya zva kona lezvi Huramu-Abhivhi+ a nga maha hi kobre yo hatima a mahela hosi Solomoni kasi zviva zva yindlu ya Jehovha.
17 A hosi yi zvi nyekisele le dhistrito ya Jordhani, ka wumba go dziva, cikari ka Sukote+ ni Zeredha.
18 Solomoni i no maha a zvibya lezvi zvontlhe zvi tala nguvhu; a kubindza ka kobre a ku pimiwangi.+
19 Solomoni i no maha a zvibya zvontlhe+ zva yindlu ya Nungungulu wa lisine: a alati ga ouro;+ a timeza+ ta ku veka ka tona a tipawa ta munyikelo;+
20 ni minenge ya tikandiya zvin’we ni tikandiya ta kona ta ouro ya yinene,+ kasi ti lumekiwa mahlweni ka kwartu ya lomu cikari hi kuya hi zvileletelo zva kona;
21 ni zvitsangi, ni tikandiya, ni zvitimo,* zva ouro, ku nga ouro ya yinene nguvhu;
22 a zvigere zva ku tsema hi zvona a titirisido, ni mingelo, ni tikopo, ni zvibya zva ku woka hi zvona ndzilo, zva ouro ya yinene; a nyangwa ya yindlu, ni tivati ta yona ta Wutshamu go Basabasa,+ ni tivati ta tempeli,* zvontlhe na zvi hi zva ouro.+
Mitlhamuselo ya lahasi
^ Kutani: “thangi”.
^ Kutani: “norte”.
^ Kutani: “sul”.
^ Kutani: “pátio”.
^ Kutani: “tikareta ta mati”.
^ Kutani: “tenazes”.
^ Laha ku wuliwa a Wutshamu go Basa.