Kronekele wa wumbiri 5:1-14
5 Hikwalaho, Solomoni i no mbheta a ntiro wontlhe wa yindlu ya Jehovha lowu a nga fanele ku maha.+ Andzhako ka lezvo, Solomoni i no nghenisa a zvilo lezvi Dhavhidha, a papayi wakwe, a nga zvi basisile+ niku i no chela a prata, ni ouro, ni zvibya zvontlhe tshombeni ya yindlu ya Nungungulu wa lisine.+
2 Ka cikhati caleco, Solomoni i no tlhanganisa a madhota ya ka Izrayeli: a tihloko tontlhe ta tixaka, ni tihosana tontlhe ta tiyindlu ta vapapayi ta ka Izrayeli. Va nota Jerusalema kasi ku ta teka a arke* ga civhumelwano ca Jehovha Dhoropeni ga Dhavhidha,+ ku nga Ziyoni.+
3 A vanhu vontlhe va ka Izrayeli va no hlengeletana mahlweni ka hosi mubuzweni* lowu wu nga kari wu mahiwa hi hweti ya wu 7.+
4 Hikwalaho, a madhota wontlhe ya ka Izrayeli ma nota, niku a vaLevhi va no tlakula a Arke.+
5 Va no neha a Arke, ni tenda ga mutlhangano,+ ni zvibya zvontlhe zvo basa lezvi zvi nga hi lomu tendeni. Zvi no nehiwa hi vapristi ni vaLevhi.*
6 Hosi Solomoni ni hlengeletano yontlhe ya va ka Izrayeli, lava va nga vitanilwe ku ta tlhangana naye, va wa hi mahlweni ka Arke. Hikwalaho, va no maha miphahlo hi tiyivhu ni tihomu to tala nguvhu+ ta ku zvi wa nga koteki a ku ti hlaya, ti wa hi tsandza-vahlayi.
7 Andzhako ka lezvo, a vapristi va no neha a arke ga civhumelwano ca Jehovha ka wutshamu ga gona, va gi nghenisa lomu kwartwini ya lomu cikari ka yindlu, ka Wutshamu go Basabasa, lahasi ka tipapa ta makerubhima.+
8 A tipapa ta makerubhima ti wa tshambulukile hehla ka wutshamu ga Arke laha ka ku a makerubhima ma fenengeta a Arke ni mipingu+ ya gona.
9 A mipingu ya gona yi wa lehile nguvhu laha ka kuza a magumo ya yona ma woneka loku u hi lomu ka Wutshamu go Basa mahlweni ka kwartu ya lomu cikari, kanilezvi ma wa nga woneki hi le handle. A mipingu leyo ya ha hi kwalaho kala ni nyamutlha lezvi.
10 Lomu ka Arke ku wa nga hi na nchumu ahandle ka timbila timbiri ta maribye leti Mosi a nga chelile le Horebhe+ a cikhati leci Jehovha a nga maha civhumelwano+ ni vanhu va ka Izrayeli kuhumeni kabye hi Gibhite.+
11 A cikhati leci a vapristi va nga huma hi lomu ka wutshamu go basa (hakuva a vapristi vontlhe lava va nga hi kona va wa ti basisile,+ na va nga cheli kota hi lezvaku a munhu i lumba ntlawa muni)+
12 a vayimbeleli vontlhe va vaLevhi+ va nga lumba Asafa,+ na Hemani,+ na Jedhutuni,+ ni vana vabye, ni vamakabye vabye va wa yimile hi tlhelo ga mutsuwuka-gambo ga alati na va bohile tinguwo ta tinene, na va welele a tingomana, ni zvichaya-chaya zva tingoti, ni zvitende, na va hi zvin’we ni 120 wa vapristi lava va ngaba mimpundzu.+
13 A vabi va mimpundzu ni vayimbeleli va wa dhumisa ni ku bonga Jehovha khatigin’we. Ku wa zwala a kuvhuma ka mimpundzu, ni ka tingomana, ni ka zvin’wani zvichaya-chaya laha va nga kari va dhumisa Jehovha, “hakuva mu nene; a lirandzo lakwe li nga mbheliko li simama kala kupindzuka”.+ Ka cikhati caleco, a yindlu, a yindlu ya Jehovha, yi no tala hi refu.+
14 A vapristi a va zvi kotangi a ku simama va tira lomo hi kota ya refu, hakuva a kungangamela ka Jehovha ku wa tatile a yindlu ya Nungungulu wa lisine.+
