Kronekele wa wumbiri 6:1-42
6 Ka cikhati caleco, Solomoni i te: “Jehovha i wulile ku i wa ta tshama lomu ka marefu yo phuma.+
2 Makunu ndzi ku akele a yindlu yo dzundzeka, a wutshamu gi yimisilweko kasi u tshama ka gona kala kupindzuka.”+
3 Andzhako ka lezvo, a hosi yi no hundzuluka yi sangula ku katekisa a bandla gontlhe ga ka Izrayeli, a bandla gontlhe ga ka Izrayeli na gi yimile.+
4 Yona yi te ngalo: “I wa dhumiswe Jehovha, a Nungungulu wa Izrayeli, loyi a tsumbisileko Dhavhidha, a papayi wa mina, hi nomu wakwe a tlhela a tatisa hi mandla yakwe lezvi a zvi wulileko, aku:
5 ‘Kusukela ka siku legi ndzi nga humesa a vanhu va mina tikweni ga Gibhite, a ndzi hlawulangi a dhoropa ka tixaka tontlhe ta Izrayeli kasi ku aka a yindlu ya ku a vito ga mina gi tshama laho+ niku ndzi wa nga se hlawula munhu kasi a rangela a vanhu va mina, a va ka Izrayeli.
6 Kanilezvi makunu ndzi hlawulile Jerusalema+ kasi a vito ga mina gi tshama laho, ndzi tlhela ndzi hlawula Dhavhidha kasi a rangela vanhu va mina, a vaIzrayeli.’+
7 Niku ku wa hi kuxuva ka mbilu ya papayi wa mina Dhavhidha a ku gi akela yindlu a vito ga Jehovha, a Nungungulu wa Izrayeli.+
8 Kanilezvi Jehovha i no byela Dhavhidha, a papayi wa mina, aku: ‘Ku wa hi kuxuva ka mbilu ya wena a ku gi akela yindlu a vito ga mina niku u mahile khwatsi hi ku xuva ku maha lezvo mbilwini ya wena.
9 Hambulezvo, a hi wena u to aka yindlu, kanilezvi a n’wana wa wena, loyi u to pswalelwa,* hi yena a to gi akela yindlu a vito ga mina.’+
10 Jehovha i tatisile a citsumbiso leci a nga maha, hakuva ndzi tshamile cikhundleni ca Dhavhidha, a papayi wa mina, ndzi tshama citshan’wini ca wuhosi ca Izrayeli+ kota lezvi Jehovha a tsumbisileko.+ Ndzi no tlhela ndzi gi akela yindlu a vito ga Jehovha, a Nungungulu wa Izrayeli,
11 niku ndzi vekile ka yona a Arke* legi gi nga ni civhumelwano+ leci Jehovha a mahileko ni vanhu va ka Izrayeli.”
12 Hi kulandzela, Solomoni i no yima mahlweni ka alati ga Jehovha hi le phambeni ka bandla gontlhe ga ka Izrayeli a tlakusa mandla yakwe.+
13 (Hakuva Solomoni i wa mahile a ciluvelo ca kobre a ci veka laha cikari ka tsendzele.*+ Ci wa hi ni ntlhanu wa mikono* a kuleha, ni ntlhanu wa mikono a kuanama, ni mikono yinharu a kutlakuka; i no yima hehla ka cona.) I no khizama mahlweni ka bandla gontlhe ga ka Izrayeli a tlakusa a mandla yakwe matilweni,+
14 aku: “O Jehovha, Nungungulu wa Izrayeli, a ku na Nungungulu wo fana na wena le tilweni kutani laha misaveni, wena loyi u hlayisako a civhumelwano ni ku ma kombisa a lirandzo li nga mbheliko a malandza ya wena lawa ma fambako mahlweni ka wena hi mbilu ya wona yontlhe.+
15 U hlayisile a citsumbiso leci u ci mahileko ka nandza ga wena Dhavhidha, a papayi wa mina.+ U mahile citsumbiso hi nomu wa wena, niku nyamutlha u ci tatisile hi canja ga wena.+
16 Makunu, Jehovha, wena Nungungulu wa Izrayeli, hlayisa a citsumbiso leci u ci mahileko ka nandza ga wena Dhavhidha, a papayi wa mina, a cikhati leci u ngaku: ‘Ku nga ta tshuka ku vhumaleka a munhu wa lixaka la wena wa ku tshama citshan’wini ca wuhosi ca ka Izrayeli mahlweni ka mina, ntsena loku a vana va wena va chela kota ka ndlela yabye hi ku famba nayweni wa mina+ kota lezvi wena u fambisileko zvona mahlweni ka mina.’+
17 Makunu, wena Jehovha, Nungungulu wa Izrayeli, a citsumbiso leci u ci mahileko ka nandza ga wena Dhavhidha, a cive ca lisine.
18 “Kanilezvi hakunene Nungungulu a nga tshama ni vanhu laha misaveni ke?+ Phela a matilo, ina, a tilo ga matilo, a gi ku eneli.+ A ndza ha wuli hi yindlu leyi ndzi yi akileko!+
19 Makunu ingisela a mukhongelo wa nandza ga wena ni cikombelo ca gona ca ku lava ku mahelwa wuxinji, O Jehovha, Nungungulu wa mina, ingisela a kurila ka nandza ga wena ka ku lava ku vhuniwa ni mukhongelo wa gona lowu gi mahako mahlweni ka wena.
20 A matihlo ya wena ma wa vhululeke, wusiku ni mumu, ma cuwuka a yindlu leyi, a wutshamu legi u wulileko ku u ta veka a vito ga wena ka gona,+ kasi ku ingisela a mukhongelo lowu a nandza ga wena gi wu mahako na gi cuwukile a wutshamu legi.
21 Ingisela a kukhongotela ka nandza ga wena ka ku lava ku vhuniwa ni kukhongotela ka vanhu va wena, a va ka Izrayeli, a cikhati leci va khongelako na va cuwukile a wutshamu legi.+ Ngha u zvizwa na u hi kwaseyo u tshamako kona, le matilweni;+ ina, zvizwe u tsetselela.+
22 “Loku a munhu a wonhela a munhu-kulobye, a kurumetwa ku hlambanya,* hi ndlela leyo a bohiwa hi kuhlambanya* loko, andzhako ka lezvo, ata ndlwini leyi mahlweni ka alati ga wena na a hi ndzeni ka cihlambanyo,*+
23 ngha u zvizwa na u hi kwaseyo matilweni, u maha cokari, u lamula a malandza ya wena hi ku tlhelisela loyi wa kubiha, u neha mitiro yakwe hehla ka hloko yakwe,+ ni ku mu hlayela kululama loyi a nga hava nandzu, u mu chachazela hi kuya hi kululama kakwe.+
24 “Loku a vanhu va wena, a va ka Izrayeli, va hluliwa hi nala hi kota ya lezvi va tshameleko ku ku wonhela,+ va gumesa va wuya va ta dhumisa vito ga wena+ va khongela+ ni ku kukhongotela lezvaku u va mahela wuxinji mahlweni ka yindlu leyi,+
25 ngha u zvizwa hi kwaseyo matilweni,+ u tsetselela a ciwonho ca vanhu va wena, a va ka Izrayeli, u tlhela u va wuyisa tikweni legi u nyikileko vona ni vakokwani vabye.+
26 “Loku a matilo ma vhaleka, ku ngani vhula+ hi ku ngha va tshamele ku ku wonhela,+ va gumesa va khongela na va cuwukile a wutshamu legi, va dhumisa vito ga wena va tlhela va tsika ciwonho cabye hi kota ya lezvi u va koramisileko,*+
27 ngha u zvizwa na u hi kwaseyo matilweni, u tsetselela a ciwonho ca malandza ya wena, a vanhu va wena, a va ka Izrayeli, hakuva u ta va gondzisa a ndlela ya yinene leyi va faneleko ku famba hi yona+ u tlhela u nisa vhula+ tikweni ga wena legi u nyikileko a vanhu va wena kota tshomba.
28 “Loku ku humelela ndlala lomu tikweni+ kutani ntungu,+ ni moya wo hisa, ni kukuruka,+ ni butho ga humbi* kutani humbi yi lambileko,*+ kutani loku a valala vabye va va randzela ni ka gihi dhoropa ga tiko,*+ kutani loku ku humelela ni lihi lixaka la ntungu kutani mababyi,+
29 ni loku a munhu kutani a vanhu va wena vontlhe va ka Izrayeli va khongela+ kutani ku kombela+ ku mahelwa wuxinji (hakuva a munhu ni munhu wa gi tiva a khombo gakwe ni kubayisa kakwe),+ laha va tlakusako a mandla yabye na va cuwukile a yindlu leyi,+
30 ngha u zvizwa na u hi kwaseyo matilweni, lomu u tshamako kona,+ u tsetselela+ u tlhela u chachazela a mun’we ni mun’wani hi kuya hi tontlhe tindlela takwe, hakuva wa yi tiva a mbilu yakwe (hi wena wece u yi tivako khwatsi a mbilu ya munhu),+
31 kasi va ku chava va famba tindleleni ta wena wontlhe a masiku lawa va to hanya tikweni legi u nyikileko a vakokwani va hina.
32 “Xungetano hi muluveli loyi a nga hiko wa vanhu va wena, a va ka Izrayeli, loyi a tako hi ka tiko ga le kule hi kota ya vito ga wena ga hombe,+ ni canja ga wena ga ntamu, ni woko ga wena gi nawulutilweko, ata a ta khongela na a cuwukile a yindlu leyi,+
33 ngha u muzwa hi kwaseyo matilweni, lomu u tshamako kona, u maha zvontlhe lezvi a muluveli loye a ku kombelako kasi a matiko wontlhe ya misava ma tiva a vito ga wena,+ ma ku chava, a ku fana ni lezvi a vanhu va wena, a va ka Izrayeli, va mahako, ma tlhela ma tiva lezvaku a vito ga wena gi khongeliwa ka yindlu leyi ndzi yi akileko.
34 “Loku a vanhu va wena vaya yimpini va yalwa ni valala vabye na va landza a ndlela leyi u to va komba,+ va gumesa va khongela+ ka wena na va cuwukile tlhelweni ga dhoropa legi u gi hlawulileko ni ka tlhelo ga yindlu leyi ndzi akeleko a vito ga wena,+
35 zwana mukhongelo wabye ni cikombelo cabye ca ku lava ku mahelwa wuxinji na u hi kwaseyo matilweni u va lamulela.+
36 “Loku va ku wonhela (hakuva a ku na munhu a kalako a nga wonhi),+ u va zangarela, u va nyikela ka valala vabye, a valala vabye va va khoma va va yisa wukhumbini tikweni ga le kule kutani ga laha kusuhani,+
37 kanilezvi va gumesa va ti laya na va hi tikweni legi va khomilweko va yisiwa ka gona, va tlhelela ka wena va ku khongotela kasi u va mahela wuxinji na va hi tikweni legi va khomilweko va yisiwa ka gona, vaku: ‘Hi wonhile niku hi gohile; hi mahile zvakubiha’,+
38 va tlhelela ka wena hi mbilu yabye yontlhe ni muhefemulo* wabye wontlhe+ na va hi tikweni legi va khomilweko va yisiwa ka gona kota tikhumbi,+ va gumesa va khongela na va cuwukile tlhelweni ga tiko legi u nyikileko a vakokwani vabye ni ka dhoropa legi u gi hlawulileko+ ni yindlu leyi ndzi akeleko a vito ga wena,
39 ngha uzwa a mukhongelo wabye ni cikombelo cabye ca ku lava ku mahelwa wuxinji hi kwaseyo matilweni, lomu u tshamako kona, u va mahela kululama+ u tlhela u tsetselela a vanhu va wena lava va ku wonheleko.
40 “O Nungungulu wa mina, ndzi kombela lezvaku a matihlo ya wena ma vhululeka ni tindleve ta wena ti ingisela mikhongelo yi mahiwako ka* wutshamu legi.+
41 O Jehovha Nungungulu, makunu suka uta wutshan’wini ga wena ga kuhumula,+ wena ni Arke ga ntamu wa wena. O Jehovha Nungungulu, a vapristi va wena va wa bohisiwe a kuhanyiswa niku lava va tsumbekako ka wena va wa tsake wuneneni ga wena.+
42 O Jehovha Nungungulu, u nga chokoli a totilweko wa wena.+ Alakanya a lirandzo la wena li nga mbheliko leli u li kombisileko ka nandza ga wena Dhavhidha.”+
Mitlhamuselo ya lahasi
^ Hi kukongoma: “a n’wana wa wena, a to huma hi lomu ciwunwini ca wena”.
^ Kutani: “pátio”.
^ Hi kukongoma: “ciruko”.
^ Hi kukongoma: “ciruko”.
^ Kutani: “loyi wa wumbiri a mu rwexa ciruko”. Ku nga cihlambanyo ca ku loku ci nga tatisiwi kutani loku ci hambunyetwa, ci wa ta neha ciruko kutani tsayiselelo.
^ Kutani: “xanisileko”.
^ Kutani: “bhandzala”.
^ Hi kukongoma: “tiko ga tinyangwa takwe”.
^ A humbi zviharana zvo fana ni bhandzala.
^ Kutani: “hi kuyelana ni”.
