Kronekele wa wumbiri 7:1-22
7 Zvalezvi Solomoni a nga mbheta ku khongela,+ ku no relela ndzilo hi le matilweni+ wu ta hisa a munyikelo wa kuhiswa ni miphahlo, a yindlu yi tala hi kungangamela ka Jehovha.+
2 A vapristi va no tsandzeka ni ku nghena lomu ndlwini ya Jehovha, hakuva a kungangamela ka Jehovha ku wa tatile a yindlu ya Jehovha.+
3 A vanhu vontlhe va ka Izrayeli va wo cuwukela a cikhati leci a ndzilo wu nga relela ni laha a kungangamela ka Jehovha ku nga hi hehla ka yindlu. Va no korama laha ka wutshamu go bambatelwa, a tinghohe tabye na ti cuwukile lahasi, va tlhela va khizama va bonga Jehovha, “hakuva mu nene; a lirandzo lakwe li nga mbheliko li simama kala kupindzuka”.
4 Makunu a hosi ni vanhu vontlhe va no maha miphahlo mahlweni ka Jehovha.+
5 Hosi Solomoni i no maha muphahlo hi 22 000 wa tihomu ni 120 000 wa tiyivhu. Hi ndlela leyo, a hosi ni vanhu vontlhe va no kangula a yindlu ya Nungungulu wa lisine.+
6 A vapristi va wa yimile matshan’wini yabye yo tira mitiro yabye, a ku fana ni vaLevhi lava va nga hi ni zvichaya-chaya lezvi zvi nga biwa na ku yimbelelwa a tisimu ta Jehovha.+ (Hosi Dhavhidha i wa mahile zvichaya-chaya lezvo kasi ku bonga Jehovha — “hakuva a lirandzo lakwe li nga mbheliko li simama kala kupindzuka” — a cikhati leci Dhavhidha a nga mu dhumisa zvin’we navo.*) A vapristi va waba a mimpundzu yi vhuma nguvhu+ mahlweni kabye, a vaIzrayeli vontlhe na va yimile.
7 Andzhako ka lezvo, Solomoni i no basisa laha cikari ka tsendzele* lowu wu nga hi mahlweni ka yindlu ya Jehovha hakuva zvi lavile ku a yi mahela laho a minyikelo ya kuhiswa,+ ni zvipandze zvo nona zva miphahlo ya kuhlengela,* hakuva a alati ga kobre+ legi Solomoni a nga gi mahile gi wa nga ta enela ku mahela ka gona a miphahlo ya kuhiswa, ni minyikelo ya tindzhoho,+ ni zvipandze zvo nona.+
8 Ka cikhati caleco, Solomoni i no maha a mubuzo hi 7 wa masiku,+ zvin’we ni vontlhe vaIzrayeli, a bandla ga hombe nguvhu ga kuta hi Lebho-Hamate* kala Nkoveni wa Gibhite.+
9 Kanilezvi hi siku ga wu 8,* va no maha a mutlhangano wo basa+ hakuva va wa kangulile a alati hi 7 wa masiku va tlhela va maha mubuzo hi 7 wa masiku.
10 Hi siku ga wu 23 ka hweti ya wu 7, Solomoni i no hangalasa vanhu va tlhela mitini yabye na va tsakile+ ni ku xalala timbilwini tabye hi kota ya wunene legi Jehovha a gi kombisileko ka Dhavhidha, ni ka Solomoni, ni ka vanhu vakwe, a vaIzrayeli.+
11 Hi ndlela leyo, Solomoni i no mbheta a yindlu ya Jehovha ni yindlu* ya hosi,+ niku Solomoni i no humelela ka zvontlhe lezvi a nga zvi xuvile ku maha mbilwini yakwe xungetano hi yindlu ya Jehovha ni yindlu yakwe wutsumbu.+
12 Hi kulandzela, Jehovha i no woneka ka Solomoni+ ni wusiku, aku: “Ndzi wu zwile a mukhongelo wa wena niku ndzi ti hlawulele a wutshamu legi kasi giva yindlu ya miphahlo.+
13 Loku ndzi vhala matilo ku ngani vhula, ni loku ndzi rumela a bhandzala lomu tikweni, ni loku ndzi rumela ntungu cikari ka vanhu va mina,
14 makunu a vanhu va mina, lava va vitaniwako hi vito ga mina,+ va ti koramisa,+ va khongela, va hlota a nghohe ya mina va tlhela va tsika a tindlela tabye to biha,+ ndzi ta vazwa na ndzi hi matilweni ndzi va tsetselela a ciwonho cabye ndzi tlhela ndzi hanyisa a tiko.+
15 Makunu a matihlo ya mina ma ta vhululeka ni tindleve ta mina ti ta ingisela a mikhongelo yi mahiwako ka wutshamu legi.+
16 Ndzi hlawulile a yindlu leyi ndzi tlhela ndzi yi basisa kasi a vito ga mina gi tshama ka yona gi nga suki+ niku a matihlo ya mina ni mbilu ya mina zvi tava ka yona contlhe cikhati.+
17 “Loku wena u famba mahlweni ka mina a ku fana ni lezvi Dhavhidha, a papayi wa wena, a nga fambisa zvona hi ku maha zvontlhe lezvi ndzi ku layileko zvona u tlhela u ingisa a milayo ni kulamula ka mina,+
18 ndzi ta yimisa a citshamu ca wuhosi ga wena,+ a ku khwatsi hi lezvi ndzi mahileko a civhumelwano na Dhavhidha,+ a papayi wa wena, ndziku: ‘Ku nga ta tshuka ku vhumaleka a munhu wa lixaka la wena wa ku fumela Izrayeli.’+
19 Kanilezvi loku mu hambuka mu tsika a milayo ya mina ni zvileletelo zva mina lezvi ndzi zvi vekileko mahlweni ka n’wina, mu ya tirela a van’wani vanungungulu mu tlhela mu va khizamela,+
20 ndzi ta tsuwula vaIzrayeli lomu tikweni ga mina legi ndzi va nyikileko,+ ni yindlu leyi ndzi nga yi basisela a vito ga mina ndzi ta yi susa kuwoneni ka mina ndzi yi maha yi chepetiwa* yi tlhela yiva cihlekiso cikari ka matiko wontlhe.+
21 A yindlu leyi yi ta maha tinhulu ta maribye. Ni wihi a to hundza hi laho i ta yi cuwuka hi kuhlamala,+ aku: ‘Hikuyini Jehovha a nga maha lezvi ka tiko legi ni ka yindlu leyi ke?’+
22 Va ta wula, vaku: ‘Hi lezvi va nga tsika Jehovha,+ a Nungungulu wa vakokwani vabye, loyi a va humesileko tikweni ga Gibhite,+ va ya namarela van’wani vanungungulu va tlhela va va khizamela ni ku va tirela.+ Hi zvona zvi mahileko ku a va nehela a khombo gontlhe legi.’”+
Mitlhamuselo ya lahasi
^ Kuzvilava ku wuliwa vaLevhi.
^ Kutani: “pátio”.
^ Kutani: “miphahlo ya kurula”. Wona Tlhamuselo wa magezu ya Bhibhiliya.
^ Kutani: “nyangweni ya Hamate”.
^ Siku gi nga landzela siku go gumesa ga mubuzo kutani siku ga wu 15.
^ Kutani: “palácio”.
^ Hi kukongoma: “vingu”.
