Tihosi ta wumbiri 1:1-18
-
Elija a phrofeta kufa ka Ahaziya (1-18)
1 Andzhako ka kufa ka Ahabhi, Mowabhi+ i no vhukela Izrayeli.
2 Kuve ka cikhati caleco, laha Ahaziya a ngawa hi laha janeleni ga kwartu yakwe ya le hehla le Samariya a ti bayisa. Hikwalaho, i no ruma a zvirun’wa a zvi leletela, aku: “Fambani, mu ya wutisa Bhaali-Zebhubha, a nungungulu wa Ekroni,+ a ku ndzi ta hanya lezvi ndzi nga ti bayisa ke.”+
3 Kanilezvi a ngilozi ya Jehovha yi no byela Elija,*+ a muTixebheti, yiku: “Suka, u khinga a zvirun’wa zva hosi ya Samariya u ya zvi byela, uku: ‘Ko kala ku nga hi na Nungungulu lomu Izrayeli a kuza u ruma vanhu va ya wutisa Bhaali-Zebhubha, a nungungulu wa Ekroni ke?+
4 Hikwalaho, Jehovha i ngalo: “U nga ta vhuka mubhedhini lowu u etleleko ka wona. U tafa.”’” Makunu Elija i no suka a famba.
5 Laha a zvirun’wa zvi nga tlhela ka Ahaziya, i no tekela ku zvi wutisa, aku: “Mu wuyela yini?”
6 Zvi mu hlamula, zviku: “Hi no khingiwa hi wanuna, a hi byela ku: ‘Tlhelani ka hosi leyi yi mu rumileko mu ya yi byela, muku: “Jehovha i ngalo: ‘Ko kala ku nga hi na Nungungulu lomu Izrayeli a kuza u ruma vanhu va ya wutisa Bhaali-Zebhubha, a nungungulu wa Ekroni ke? Hikwalaho, u nga ta vhuka mubhedhini lowu u etleleko ka wona. Hakunene u tafa.’”’”+
7 Makunu a hosi yi no va wutisa, yiku: “A wanuna loyi a nga mu khinga a mu byela a timhaka leti i wa tshamisile kuyini?”
8 Vona vaku kakwe: “A wanuna loye i wa bohile a nguwo ya woya+ ni libhandi la cikhumba ciwunwini cakwe.”+ A hosi yi tekela ku: “Loye hi Elija, a muTixebheti.”
9 A hosi yi no rumela kakwe a murangeli wa ntlawa wa 50 wa vanhu ni vavanuna vakwe va 50. A cikhati leci a murangeli loye a nga famba ka Elija, i no ya mu kuma na a tshamile le hehla ka citsunga. A murangeli loye aku kakwe: “Munhu wa Nungungulu wa lisine,+ a hosi yi ngalo: ‘Chika.’”
10 Kanilezvi Elija i no hlamula a murangeli wa ntlawa wa 50 wa vanhu, aku: “Loku mina ndzi hi munhu wa Nungungulu, ku wa relele ndzilo hi le matilweni+ wu ta ku hisa ni vavanuna va wena va 50.” Ku no relela ndzilo hi le matilweni wu ta mu hisa ni vavanuna vakwe va 50.
11 Hikwalaho, a hosi yi no tlhela yi rumela a mun’wani murangeli wa ntlawa wa 50 wa vanhu ni vavanuna vakwe va 50. Yena i no famba a ya byela Elija, aku: “Munhu wa Nungungulu wa lisine, a hosi yi ngalo: ‘Hatlisa u chika.’”
12 Kanilezvi Elija i no va hlamula, aku: “Loku mina ndzi hi munhu wa Nungungulu wa lisine, ku wa relele ndzilo hi le matilweni wu ta ku hisa ni vavanuna va wena va 50.” Ku no relela ndzilo wa Nungungulu hi le matilweni wu ta mu hisa ni vavanuna vakwe va 50.
13 A hosi yi no engeta yi rumela a murangeli wa wunharu wa ntlawa wa 50 wa vanhu ni vavanuna vakwe va 50. Kanilezvi a murangeli loyi wa wunharu wa ntlawa wa 50 wa vanhu i no kandziha a ya khizama hi madzolo yakwe mahlweni ka Elija a sangula ku mu khongotela lezvaku a mu mahela wuxinji, aku kakwe: “Munhu wa Nungungulu wa lisine, ndzi kombela ku a wutomi ga mina ni ga* malandza ya wena lawa ya 50 giva ga lisima mahlweni ka wena.
14 Ku sina ku relele ndzilo hi le matilweni wu ta hisa varangeli vambiri vo sangula va mitlawa ya 50 wa vanhu ni mitlawa yabye ya 50 wa vanhu, kanilezvi makunu a wutomi* ga mina gi wave ga lisima mahlweni ka wena.”
15 Zvalezvo a ngilozi ya Jehovha yi no byela Elija, yiku: “Relela naye. U nga mu chavi.” Hikwalaho, Elija i no suka a relela naye aya ka hosi.
16 Elija i te ngalo ka hosi: “Jehovha i ngalo: ‘U rumele zvirun’wa kasi zvi ya wutisa Bhaali-Zebhubha, a nungungulu wa Ekroni.+ Ko kala ku nga hi na Nungungulu lomu Izrayeli ke?+ Hikuyini u nga kala ku wutisa gezu gakwe? Kota lezvi u mahileko lezvo, u nga ta vhuka mubhedhini lowu u etleleko ka wona. U tafa.’”
17 Hikwalaho, a hosi yi nofa, hi kuya hi gezu legi Jehovha a gi wulileko hi nomu wa Elija. Kota lezvi yi nga hi hava mufana, Jehoramu*+ i no maha hosi cikhundleni cakwe, hi lembe ga wumbiri ga Jehoramu,+ a n’wana wa Jehoxafati, a hosi ya Judha.
18 A man’wani matimu ya Ahaziya,+ lezvi a nga maha, ma tsalilwe bhukwini ga matimu ya zvikhati zva tihosi ta Izrayeli.
Mitlhamuselo ya lahasi
^ Zvi wulako ku: “A Nungungulu wa mina hi Jehovha”.
^ Kutani: “a muhefemulo wa mina ni muhefemulo wa”.
^ Kutani: “muhefemulo”.
^ Ku nga makabye wa Ahaziya.
