Tihosi ta wumbiri 10:1-36
10 Ahabhi+ i wa hi ni 70 wa vana le Samariya. Hikwalaho, Jehu i no tsala mapapilo a ma rumela le Samariya ka tihosana ta Jezreeli, ni ka madhota,+ ni ka vahlayisi va vana va Ahabhi,* aku:
2 “Seyo mu na ni vana va hosi ya n’wina, ni tikareta ta yimpi, ni mahaxi, ni dhoropa gi vhikelweko khwatsi, ni matlhari. Makunu a cikhati leci a papilo legi gi to chikela ka n’wina,
3 hlawulani a n’wana wa munene, a ringanelwako* cikari ka vana va hosi ya n’wina mu mu veka citshan’wini ca wuhosi ca papayi wakwe, mu lwela a yindlu ya hosi ya n’wina.”
4 Kanilezvi va no chava nguvhu, vaku: “Loku a tihosi timbiri ti nga zvi kotangi a ku yima mahlweni kakwe,+ hina hi ta zvi kotisa kuyini ke?”
5 Hikwalaho, a muwoneleli wa yindlu ya wuhosi,* ni govhernadhori wa dhoropa, ni madhota, ni vahlayisi va vana va hosi va no rumela a gezu legi ka Jehu, vaku: “Hina hi malandza ya wena. Hi ta maha zvontlhe lezvi u to hi byela. I hava hi to mu yimisa kota hosi. Maha ni cihi u ci wonako na ci hi cinene mahlweni ka wena.”
6 I no va tsalela a papilo ga wumbiri, aku: “Loku mu yima na mina ni loku mu lava ku ndzi ingisa, tanani ni tihloko ta vana va hosi ya n’wina a mandziko hi cikhati caleci seno Jezreeli.”
A 70 wa vana va hosi va wa hi zvin’we ni vavanuna vo chaviseka va lomu dhoropeni lava va nga va wundla.
7 Zvalezvi a papilo gi nga chikela kabye, va no khoma a vana va hosi va va daya, 70 wa vavanuna,+ va chela a tihloko tabye lomu ka zvindzala* va ti rumela kakwe, le Jezreeli.
8 A cirun’wa ci no nghena, ci mu byela ku: “Va nehile a tihloko ta vana va hosi.” Hikwalaho yena i te ngalo: “Ti veketeleni hi tinhulu timbiri laha nyangweni ya dhoropa kala ni mixo.”
9 Ni mixo ya kona, i no huma a ya yima mahlweni ka vanhu vontlhe, aku: “N’wina a mu na nandzu.* Ina, hi mina ndzi nga yi xuxela cikungo a hosi ya mina, ndzi yi daya,+ kanilezvi himani a nga daya vontlhe lava ke?
10 Zvi tiveni lezvaku a ku na gezu ni gin’we ga Jehovha legi Jehovha a gi wulileko hi yindlu ya Ahabhi gi to kala ku tatiseka,*+ niku Jehovha i mahile lezvi a nga zvi wula hi nomu wa nandza gakwe Elija.”+
11 Ahandle ka lezvo, Jehu i no daya vontlhe va nga sele va yindlu ya Ahabhi le Jezreeli, ni vontlhe a vavanuna vakwe vo chaviseka, ni lava a nga tivana navo, ni vapristi vakwe,+ kala ku nga sali munhu wo hanya.+
12 I no gumesa a khoma ndlela aya Samariya. A yindlu leyi a varisi va nga boha ka yona a tiyivhu* yi wa hi ndleleni leyo.
13 Kwalaho, Jehu i no kumana ni vamakabye va Ahaziya,+ a hosi ya Judha, a va wutisa, aku: “Hi n’wina vamani?” Vona va hlamula, vaku: “Hina hi vamakabye va Ahaziya, niku hiya hi ya tiva a kuvhuka ka vana va hosi ni vana va mamani muzindza.”*
14 I no tekela ku: “Va khomeni na va hanya!” Hikwalaho, va no va khoma na va hanya va va daya laha thangini ga yindlu leyi va nga boha ka yona a tiyivhu; va wa hi 42 wa vavanuna. A nga tsikangi ne mun’we wabye a pona.+
15 A cikhati a nga suka hi laho i no kumana na Jehonadhabha,+ a n’wana wa Rekabe,+ na a mu khinga. Laha a nga mu losa* i te ngalo kakwe: “A mbilu ya wena yi mbhelele* ka mina, a ku khwatsi hi lezvi a mbilu ya mina yi nga zvin’we ni mbilu ya wena ke?”
Jehonadhabha i no hlamula, aku: “Ina.”
Jehu aku: “Loku zvi hi lezvo, ndzi nyike a canja ga wena.”
I no mu nyika a canja gakwe, Jehu a mu koka a nghena kareteni yakwe.
16 I no gumesa aku: “A hi fambe, u ya wona lezvaku a ndzi nyenyeleti a kungatsumbeki mahlweni ka* Jehovha.”+ Hikwalaho, va no famba zvin’we lomu kareteni yakwe ya yimpi.
17 I no chikela Samariya, a daya vontlhe va nga sele va yindlu ya Ahabhi le Samariya, a va lovisa vontlhe,+ kota lezvi Jehovha a nga wulile hi nomu wa Elija.+
18 Ahandle ka lezvo, Jehu i no hlengeleta a vanhu vontlhe, aku kabye: “Ahabhi i khozele Bhaali kutsongwani,+ kanilezvi Jehu i ta mu khozela nguvhu.
19 Hikwalaho, ndzi vitaneleni a vaphrofeti vontlhe va Bhaali,+ ni vakhozeli vakwe vontlhe, ni vapristi vakwe vontlhe.+ Mu nga siyi wo siya hakuva ndzi lava ku maha muphahlo wa hombe ka Bhaali. Loyi a to kala kuta a nga ta hanya.” Kanilezvi Jehu i wo maha cikungo ca ku lovisa a vakhozeli va Bhaali.
20 Jehu i no engeta, aku: “Tivisani lezvaku ku tava ni mutlhangano wo basa wa Bhaali.” Hikwalaho, va no tivisa a mutlhangano.
21 Andzhako ka lezvo, Jehu i no rumela mahungu tikweni gontlhe ga Izrayeli. Vontlhe a vakhozeli va Bhaali va nota. Ku hava ni mun’we a nga kala kuta. Va no nghena lomu ndlwini* ya Bhaali,+ a yindlu ya Bhaali yi tala yi ku khapa.
22 I no byela a muhlayisi wa yindlu ya tinguwo, aku: “Tana ni tinguwo u ta nyika a vakhozeli vontlhe va Bhaali.” Hikwalaho, i no va nehela tinguwo.
23 Jehu na Jehonadhabha,+ a n’wana wa Rekabe, va no nghena lomu ndlwini ya Bhaali. Jehu i no byela a vakhozeli va Bhaali, aku: “Cuwukisisani khwatsi mu wona lezvaku a ku na mukhozeli wa Jehovha laha, ntsena a vakhozeli va Bhaali.”
24 Hi kugumesa, va no nghena kasi va maha miphahlo ni minyikelo ya kuhiswa. Jehu i wa vekile a 80 wa vavanuna vakwe lahandle, aku: “Loyi a to tsika mun’we wa lava ndzi va vekako mandleni ya n’wina a pona i ta riha hi wutomi gakwe.”
25 Zvalezvi a nga mbheta ku maha munyikelo wa kuhiswa, Jehu i no byela a vagadhi* ni malandza, aku: “Nghenani mu va daya! Mu nga tsiki munhu a pona!”+ A vagadhi ni malandza va no va daya hi cipadha va va hoxa lahandle; va no simama kala wutshan’wini go basa ga lomu cikari* ka yindlu ya Bhaali.
26 Andzhako ka lezvo, va no humesa a mapilari yo basa*+ ya yindlu ya Bhaali va ma hisa.+
27 Va no khungumula a pilari go basa+ ga Bhaali, va khungumula ni yindlu ya Bhaali+ va yi maha zvikoti, niku zva hi kona ni nyamutlha lezvi.
28 Hi ndlela leyo, Jehu i no lovisa Bhaali lomu Izrayeli.
29 Kanilezvi Jehu a nga tsikangi a zviwonho lezvi Jerobhowamu, a n’wana wa Nebhate, a wonhisileko hi zvona a vaIzrayeli xungetano hi marole ya ouro lawa ma nga hi Bheteli ni Dhani.+
30 Hikwalaho, Jehovha i no byela Jehu, aku: “Kota lezvi u mahileko khwatsi, u maha zvakululama mahlweni ka mina hi ku maha zvontlhe lezvi a mbilu ya mina yi nga xuva ku maha a yindlu ya Ahabhi,+ a mune wa zvizukulwana zva vana va wena zvi ta tshama citshan’wini ca wuhosi ca Izrayeli.”+
31 Kanilezvi Jehu a nga chelangi kota hi ku famba Nayweni wa Jehovha, a Nungungulu wa Izrayeli, hi mbilu yakwe yontlhe.+ A nga tsikangi a zviwonho lezvi Jerobhowamu a nga va wonhisa hi zvona a vaIzrayeli.+
32 Masikwini lawo, Jehovha i no sangula ku hungula* a tiko ga Izrayeli hi kutsongwani-kutsongwani. Hazayeli i no simama ku va dhumela lomu tikweni gontlhe ga Izrayeli,+
33 kusukela Jordhani zviya mutsuwuka-gambo, gontlhe a tiko ga Gileyadhe — ga va ka Gadhi, ni va ka Rubheni, ni va ka Manase+ — kusukela Arowera, kusuhani ni Nkova wa Arnoni, kala Gileyadhe ni Bhaxani.+
34 A man’wani matimu ya Jehu, zvontlhe lezvi a nga maha ni ntamu wakwe wontlhe, ma tsalilwe bhukwini ga matimu ya zvikhati zva tihosi ta Izrayeli.
35 Jehu i no etlela a humula ni vakokwani vakwe, a lahliwa le Samariya. A n’wana wakwe Jehoahaza+ i no maha hosi cikhundleni cakwe.
36 A ntsengo wa masiku lawa Jehu a nga fuma vaIzrayeli kuve 28 wa malembe le Samariya.
Mitlhamuselo ya lahasi
^ Hi kukongoma: “vahlayisi va Ahabhi”.
^ Kutani: “a lulamileko”.
^ Hi kukongoma: “wa yindlu”.
^ Kutani: “zvirundzo”.
^ Kutani: “mu lulamile”.
^ Hi kukongoma: “gi towa lahasi”.
^ Zvi nga maha na ku wuliwa a wutshamu legi a tiyivhu ti nga bohiwa kona kasi ti tsemiwa woya.
^ Kutani: “katekisa”.
^ Hi kukongoma: “yi lulamile”.
^ Kutani: “u ya wona kutitsitsirita ka mina hi”.
^ Kutani: “tempeleni”.
^ Hi kukongoma: “vatsutsumi”.
^ Hi kukongoma: “kala dhoropeni”, kuzvilava wutshamu go tshamisa ku khwatsi i khokhola.
^ Kutani: “ku tsema”.
