Tihosi ta wumbiri 12:1-21
12 Hi lembe ga wu 7 ga Jehu,+ Jehowaxi+ i no maha hosi, niku i no fuma 40 wa malembe le Jerusalema. A vito ga mamani wakwe ku wa hi Zibhiya, wa le Bherexebha.+
2 Jehowaxi i no simama ku maha zvakululama mahlweni ka Jehovha masikwini wontlhe lawa a nga gondzisiwa hi mupristi Jehoyadha.
3 Hambulezvo, a matshamu yo tlakuka+ a ma susiwangi. A vanhu va wa ha simama ku maha miphahlo ni ku tuvikisa a musi wa miphahlo lomu ka matshamu yo tlakuka.
4 Jehowaxi i te ngalo ka vapristi: “Tekani a mali yontlhe ya minyikelo yo basa+ leyi yi nehiwako ndlwini ya Jehovha: a mali leyi a mun’we ni mun’we a khupako hi yona,+ ni mali ya ntsengo wu gemelweko munhu,* ni mali yontlhe leyi a mbilu ya munhu ni munhu yi mu kucako ku neha ndlwini ya Jehovha.+
5 A vapristi va ta yi amukela mandleni ya lava va nyikelako* kasi va yi tirisela ku lungisa yindlu, ni kwihi laha ku to ngha ku gohekile.*+
6 Kala ka lembe ga wu 23 ga hosi Jehowaxi, a vapristi va wa nga se lungisa a yindlu.+
7 Hikwalaho, hosi Jehowaxi i no vitana mupristi Jehoyadha+ ni vapristi lava van’wani, a taku kabye: “Hikuyini mu nga lungisiko a yindlu? Hi kota ya lezvo, mu nga ha amukeli a mali yin’wani ka lava va nyikelako, ntsena loku yi lava ku tiriselwa ku lungisa a yindlu.”+
8 A vapristi va no vhumela lezvaku va nga ta ha amukela kambe a mali ya vanhu ni lezvaku a hi vona va to lungisa yindlu.
9 Mupristi Jehoyadha i no teka a kaxa+ a bhoxa laha hehla ka gona a gi veka kusuhani ni alati hi tlhelo ga cinene loku u nghena lomu ndlwini ya Jehovha. A vapristi lava va nga hi vagadhi va tinyangwa va wa chela lomo a mali yontlhe leyi yi nga nehiwa lomu ndlwini ya Jehovha.+
10 Khati ni khati va nga wona lezvaku ku na ni mali yo tala lomu kaxeni, a matsalani wa hosi ni mupristi wa hombe va waya va ya yi hlengeleta,* va gumesa va hlaya a mali leyo yi nga nehilwe lomu ndlwini ya Jehovha.+
11 Va wa nyikela a mali leyo yi hlayilweko ka lava va nga yimisilwe a ku wonelela a ntiro lomu ndlwini ya Jehovha. Lavo vonawu va wa hakhela a vavatli ni vaaki lava va nga tira lomu ndlwini ya Jehovha,+
12 zvin’we ni vameseri ni vatsemi va maribye. Va wa tlhela va xava mapulango ni maribye ma vatlilweko kasi ku lungisa a yindlu ya Jehovha, niku a mali leyi kambe va wa yi tirisa kasi ku hakhela zvontlhe zvi nga laveka kasi ku lungisa a yindlu.
13 Kanilezvi ka mali leyi yi nga nehiwa ndlwini ya Jehovha yi hava yi nga tiriselwa ku maha a tibasiya ta prata, ni zvigere zva ku tsema hi zvona a titirisido, ni mingelo, ni mimpundzu,+ kutani zvibya zvin’wani zva ouro hambu zva prata zva yindlu ya Jehovha.+
14 Va wa yi nyikela ntsena ka lava va nga maha a ntiro kasi va lungisa hi yona a yindlu ya Jehovha.
15 Va wa nga va londzi tikonta a vavanuna lava va nga va nyikile mali kasi va nyika vatiri hakuva va wa hi vanhu vo tsumbeka.+
16 Kanilezvi a mali ya minyikelo ya nandzu+ ni mali ya minyikelo ya ciwonho yi wa nga tiriselwi zva yindlu ya Jehovha; yi wa lumba vapristi.+
17 Ka cikhati caleco, Hazayeli,+ a hosi ya Siriya, i no kandziha a yalwa ni Gati,+ a gi teka. Andzhako ka lezvo, i no boha ku dhumela Jerusalema.+
18 Hikwalaho, Jehowaxi, a hosi ya Judha, i no teka a minyikelo yontlhe yo basa, leyi a vakokwani vakwe, Jehoxafati, na Jehoramu, na Ahaziya, a tihosi ta Judha, va nga yi basisile, zvin’we ni minyikelo yo basa ya yena wutsumbu, ni ouro yontlhe leyi yi nga hi lomu tshombeni ya yindlu ya Jehovha ni ya yindlu* ya hosi a zvi rumela ka Hazayeli, a hosi ya Siriya.+ Hikwalaho, Hazayeli i no suka Jerusalema.
19 A man’wani matimu ya Jehowaxi, zvontlhe lezvi a nga maha, ma tsalilwe bhukwini ga matimu ya zvikhati zva tihosi ta Judha.
20 Kanilezvi a malandza ya Jehowaxi ma no bohana ma mu xuxela cikungo+ ma mu daya kusuhani ni yindlu ya Milo,*+ ndleleni yi relelako yiya Sila.
21 A malandza yakwe lawa ma nga mu dhumela ma mu daya hi Jozakara, a n’wana wa Ximeyate, na Jehozabhadha, a n’wana wa Xomera.+ Va no mu lahla zvin’we ni vakokwani vakwe Dhoropeni ga Dhavhidha. A n’wana wakwe, Amaziya, i no maha hosi cikhundleni cakwe.+
Mitlhamuselo ya lahasi
^ Kutani: “muhefemulo”.
^ Kutani: “va tivanako navo”.
^ Kutani: “ku hi ni tifa”.
^ Kutani: “chela ka zvikhwama”. Hi kukongoma: “bohelela”.
^ Kutani: “palácio”.
^ Kutani: “Bhet-milo”.
