Tihosi ta wumbiri 13:1-25
13 Hi lembe ga wu 23 ga Jehowaxi,+ a n’wana wa Ahaziya,+ a hosi ya Judha, Jehoahaza, a n’wana wa Jehu,+ i no maha a hosi ya Izrayeli le Samariya, niku i no fuma a 17 wa malembe.
2 I no simama ku maha zvakubiha mahlweni ka Jehovha, niku i no maha a ciwonho caleci Jerobhowamu, a n’wana wa Nebhate, a wonhisileko hi cona Izrayeli.+ A nga ci tsikangi.
3 Hikwalaho, a zanga ya Jehovha+ yi no vhurela a vaIzrayeli,+ a va nyikela canjeni ga Hazayeli,+ a hosi ya Siriya, ni canjeni ga Bhen-Hadhadhe,+ a n’wana wa Hazayeli, wontlhe a masiku yabye.
4 Hi kufamba ka cikhati, Jehoahaza i no khongotela Jehovha lezvaku a mu mahela wuxinji, niku Jehovha i no muzwa hakuva i wa ti wona a tixanisa leti a hosi ya Siriya yi nga va xanisa hi tona a vaIzrayeli.+
5 Hikwalaho, Jehovha i no nyika Izrayeli a muhanyisi+ kasi a va tlhatlhisa mandleni ya vaSiriya, niku a vaIzrayeli va no tlhela va hanya mitini yabye a ku khwatsi hi kale.*
6 (Hambulezvo, a va tsikangi a ciwonho ca yindlu ya Jerobhowamu leci a nga va wonhisa hi cona a vaIzrayeli.+ Va no simama ciwonhweni leci,* niku a sinya yo basa*+ yi no simama yi yimile Samariya.)
7 Jehoahaza i no sala ntsena ni butho ga 50 wa vakhileli va mahaxi, ni 10 wa tikareta, ni 10 000 wa masochwa ma nga famba hi minenge, hakuva a hosi ya Siriya yi wa va lovisile,+ yi va kandzihetela a ku khwatsi i ntshuri cikhatini ca ku hula timbewu.+
8 A man’wani matimu ya Jehoahaza, zvontlhe lezvi a nga maha ni ntamu wakwe, ma tsalilwe bhukwini ga matimu ya zvikhati zva tihosi ta Izrayeli.
9 Jehoahaza i no etlela a humula ni vakokwani vakwe, va mu lahla Samariya.+ A n’wana wakwe Jehowaxi i no maha hosi cikhundleni cakwe.
10 Hi lembe ga wu 37 ga Jehowaxi, a hosi ya Judha, Jehowaxi,+ a n’wana wa Jehoahaza, i no maha hosi ya Izrayeli le Samariya, niku i no fuma a 16 wa malembe.
11 I no simama ku maha zvakubiha mahlweni ka Jehovha; a nga tsikangi zvontlhe a zviwonho lezvi Jerobhowamu, a n’wana wa Nebhate, a va wonhisileko hi zvona a vaIzrayeli.+ I no simama* zviwonhweni lezvo.
12 A man’wani matimu ya Jehowaxi, zvontlhe lezvi a nga maha ni ntamu wakwe, ni lezvi a nga lwisa zvona na Amaziya, a hosi ya Judha,+ ma tsalilwe bhukwini ga matimu ya zvikhati zva tihosi ta Izrayeli.
13 Jehowaxi i no etlela a humula ni vakokwani vakwe, niku Jerobhowamu*+ i no tshama citshan’wini cakwe ca wuhosi. Jehowaxi i no lahliwa Samariya zvin’we ni tihosi ta Izrayeli.+
14 A cikhati leci Elixa+ a nga babya hi mababyi lawa ma nga gumesa ma mu daya, Jehowaxi, a hosi ya Izrayeli, i no relela aya kakwe a ya mu rilela, aku: “Papayi, papayi! A kareta ya Izrayeli ni vakhileli va yona va mahaxi!”+
15 Elixa i te ngalo kakwe: “Teka a wura ni mipaxa.” Hikwalaho, i no teka a wura ni mipaxa.
16 I no gumesa a byela a hosi ya Izrayeli, aku: “Khoma a wura.” Hikwalaho, i no khoma a wura; andzhako ka lezvo, Elixa i no tlhateka a mandla yakwe hehla ka mandla ya hosi,
17 aku: “Vhulula a janela gi nga tlhelweni ga mutsuwuka-gambo.” Hikwalaho i no vhulula. Elixa aku: “Phanda!” Hikwalaho yena i no phanda. Makunu Elixa i te ngalo: “Lowu i paxa wa Jehovha wa kuhlula,* a paxa wa ku hlula* Siriya! U ta hihirita a tiko ga Siriya le Afeka+ kala u gi lovisa gi ku bhi.”
18 Elixa i no engeta aku: “Teka mipaxa.” Yena i no yi teka. I no byela a hosi ya Izrayeli, aku: “Bana lahasi.” Hikwalaho, i noba lahasi a makhati manharu a gumesa a nyima.
19 Makunu a munhu wa Nungungulu wa lisine i no mu zangarela, aku: “Na u bile lahasi a 5 kutani 6 wa makhati! Loku a wu no maha lezvo na u hihiritile a vaSiriya kala va ku bhi, kanilezvi makunu u ta hlula vaSiriya makhati manharu basi.”+
20 Andzhako ka lezvo, Elixa i nofa a lahliwa. Ku wa hi ni mitlawa ya vaphangi ya vaMowabhi+ leyi yi nga tolovela kuta lomu tikweni kusanguleni ka lembe.*
21 Laha a vavanuna vo kari va nga kari va lahla a wanuna, va no wona a ntlawa wa vaphangi, hikwalaho va no hoxela a wanuna loye hi cihatla cilahleni ca Elixa va tsutsuma. Laha a wanuna loye a nga henya a marambu ya Elixa, i no vhuka+ a yima hi mikondzo yakwe.
22 Hazayeli,+ a hosi ya Siriya, i no xanisa a vaIzrayeli+ wontlhe masiku ya Jehoahaza.
23 Kanilezvi Jehovha i no va mahela tipswalo ni wuxinji+ a va zwela wusiwana hi kota ya civhumelwano cakwe na Abrahama,+ na Isaka,+ na Jakobe.+ A nga lavangi ku va lovisa ne hambu ku va hoxa kule ni nghohe yakwe kala nyamutlha.
24 Laha Hazayeli, a hosi ya Siriya, a ngafa, a n’wana wakwe Bhen-Hadhadhe i no maha hosi cikhundleni cakwe.
25 Jehowaxi, a n’wana wa Jehoahaza, i no tlhela a teka ka Bhen-Hadhadhe, a n’wana wa Hazayeli, a madhoropa lawa a nga ma tekile ka Jehoahaza, a papayi wakwe, hi kulwa. Jehowaxi i no mu hlula a makhati manharu,+ a tlhelisela a madhoropa ya Izrayeli.
Mitlhamuselo ya lahasi
^ Ku nga ku hanya kuruleni na va tshamisekile.
^ Hi kukongoma: “i no famba ka cona”.
^ Hi kukongoma: “I no famba”.
^ Ku nga Jerobhowamu wa Wumbiri.
^ Kutani: “kuhanyisa”.
^ Kutani: “kuhanyiswa ka”.
^ Hi kukongoma: “kungheneni ka lembe”, kuzvilava kusanguleni ka nguva ya cimumu.