Tihosi ta wumbiri 14:1-29
14 Hi lembe ga wumbiri ga Jehowaxi,+ a n’wana wa Jehoahaza, a hosi ya Izrayeli, Amaziya, a n’wana wa Jehowaxi, a hosi ya Judha, i no maha hosi.
2 I wa hi ni 25 wa malembe a cikhati leci a nga maha hosi niku i no fuma a 29 wa malembe Jerusalema. A vito ga mamani wakwe ku wa hi Jehoyadhina, wa le Jerusalema.+
3 I no simama ku maha zvakululama mahlweni ka Jehovha, kanilezvi i wa nga fani na Dhavhidha,+ a kokwani wakwe. I no maha zvontlhe a ku khwatsi hi lezvi a papayi wakwe Jehowaxi a mahileko.+
4 Kanilezvi a matshamu yo tlakuka a ma susiwangi.+ A vanhu va wa ha simama ku maha miphahlo ni ku tuvikisa a musi wa miphahlo lomu ka matshamu yo tlakuka.+
5 Zvalezvi a nga tiyisa a wuhosi gakwe, i no daya a malandza yakwe lawa ma nga dele a papayi wakwe, loyi a nga hi hosi.+
6 Kanilezvi a nga dayangi a vana va vadayi lavo, hi kuya hi cileletelo ca Jehovha ci tsalilweko bhukwini ga Nayo wa Mosi, caku: “A vapapayi a va faneli ku dawa hi kota ya vana vabye, ni vana a va faneli ku dawa hi kota ya vapapayi vabye, kanilezvi a mun’we ni mun’wani i ta dawa hi kota ya ciwonho cakwe.”+
7 I no daya a 10 000 wa vavanuna va vaEdhomi+ Nkoveni wa Munyu,+ a tlhela a teka a dhoropa ga Sela yimpini leyo,+ legi gi nga chuliwa ku Jokteeli kala nyamutlha.
8 Andzhako ka lezvo, Amaziya i no rumela zvirun’wa ka Jehowaxi, a n’wana wa Jehoahaza, a n’wana wa Jehu, a hosi ya Izrayeli, aku: “Tana hi ta tlhangana hilwa.”*+
9 Jehowaxi, a hosi ya Izrayeli, i no rumela mahungu ka Amaziya, a hosi ya Judha, aku: “A sinya ya mimizwa ya Lebhanoni yi no rumela mahungu ka sedhare wa Lebhanoni, yiku: ‘Nyikela nhanyana wa wena ka mufana wa mina kasi ava sati wakwe.’ Kanilezvi a cihari ca khwati ca Lebhanoni ci no hundza hi laho ci kandzihetela a sinya ya mimizwa.
10 Hakunene u hlasele Edhomi,+ hikwalaho a mbilu ya wena ya ti kukumukisa. Ti buze hi wudzundzo ga wena kanilezvi ti tshamele ndlwini* ya wena. Hikuyini u ti vitaniselako a khombo ni kuwa, u wisa Judha zvin’we na wena ke?”
11 Kanilezvi Amaziya a nga ingisangi.+
Hikwalaho, Jehowaxi, a hosi ya Izrayeli i no kandziha. Yena na Amaziya, a hosi ya Judha, va no tlhangana valwa le Bhet-Xemexe+ wa Judha.+
12 Judha i no hluliwa hi Izrayeli, hikwalaho a mun’we ni mun’wani wabye i no tsutsuma aya kaya* kakwe.
13 Jehowaxi, a hosi ya Izrayeli, i no khoma Amaziya, a hosi ya Judha, a n’wana wa Jehowaxi, a n’wana wa Ahaziya, le Bhet-Xemexe. Andzhako ka lezvo, va noya Jerusalema, a ya vhulula muhocho wa 400 wa mikono* laha ka muro wa Jerusalema kusukela Nyangweni ya Efrayime+ kala Nyangweni ya laha Khoneni.+
14 I no teka a ouro yontlhe, ni prata, ni zvibya zvontlhe lezvi zvi nga hi lomu ndlwini ya Jehovha ni lomu titshombeni ta yindlu* ya hosi, a tlhela a khoma vanhu vo kari, a gumesa a tlhela le Samariya.
15 A man’wani matimu ya Jehowaxi, lezvi a nga maha, ni ntamu wakwe, ni lezvi a nga lwisa zvona na Amaziya, a hosi ya Judha, ma tsalilwe bhukwini ga matimu ya zvikhati zva tihosi ta Izrayeli.
16 Makunu Jehowaxi i no etlela a humula ni vakokwani vakwe, a lahliwa le Samariya+ zvin’we ni tihosi ta Izrayeli. A n’wana wakwe Jerobhowamu*+ i no maha hosi cikhundleni cakwe.
17 Amaziya,+ a n’wana wa Jehowaxi, a hosi ya Judha, i no sala a hanya a 15 wa malembe andzhako ka kufa ka Jehowaxi,+ a n’wana wa Jehoahaza, a hosi ya Izrayeli.+
18 A man’wani matimu ya Amaziya, ma tsalilwe bhukwini ga matimu ya zvikhati zva tihosi ta Judha.
19 Hi ndzhako ka cikhati, va no mu xuxela cikungo+ le Jerusalema. I no tsutsuma aya Lakixe, kanilezvi va no rumela vavanuna va mu landza kwale Lakixe va ya mu daya kwaseyo.
20 Hikwalaho, va no mu rwala hi mahaxi va tlhela naye a ya lahliwa le Jerusalema zvin’we ni vakokwani vakwe Dhoropeni ga Dhavhidha.+
21 Makunu a vanhu vontlhe va Judha va no teka Azariya,*+ loyi a nga hi ni 16 wa malembe,+ va mu maha hosi cikhundleni ca papayi wakwe Amaziya.+
22 I no aketa Elate,+ a gi tlhelisela ka Judha andzhako ka loku a hosi* yi etlele yi humula ni vakokwani va yona.+
23 Hi lembe ga wu 15 ga Amaziya, a n’wana wa Jehowaxi, a hosi ya Judha, Jerobhowamu,+ a n’wana wa Jehowaxi, a hosi ya Izrayeli, i no maha hosi le Samariya niku i no fuma 41 wa malembe.
24 I no simama ku maha zvakubiha mahlweni ka Jehovha. A nga tsikangi a zviwonho zvontlhe lezvi Jerobhowamu, a n’wana wa Nebhate, a nga va wonhisa hi zvona a vaIzrayeli.+
25 I no vhuxisa a mimbhingano ya Izrayeli kusukela Lebho-Hamate*+ kala Bimbini ga Arabha,*+ hi kuya hi gezu ga Jehovha, a Nungungulu wa Izrayeli, legi a gi wulileko hi nomu wa nandza gakwe Jona,+ a n’wana wa Amitayi, a muphrofeti wa le Gat-Heferi.+
26 Hakuva Jehovha i wa wonile a hlomulo wa hombe wa Izrayeli.+ Ku wa nga hi na munhu wa ku vhuna Izrayeli ne hambu loyi a vhumalako muvhuni kutani a rerekileko.
27 Kanilezvi Jehovha i wa tsumbisile lezvaku a nga ta fuvisa a vito ga Izrayeli lahasi ka matilo.+ Hikwalaho, i no va ponisa hi canja ga Jerobhowamu, a n’wana wa Jehowaxi.+
28 A man’wani matimu ya Jerobhowamu, zvontlhe lezvi a nga maha ni ntamu wakwe, lezvi a nga lwisa zvona a tlhelisa Dhamasku+ ni Hamate+ ka Judha na Izrayeli, ma tsalilwe bhukwini ga matimu ya zvikhati zva tihosi ta Izrayeli.
29 Jerobhowamu i no etlela a humula ni vakokwani vakwe zvin’we ni tihosi ta Izrayeli. A n’wana wakwe Zakariya+ i no maha hosi cikhundleni cakwe.
Mitlhamuselo ya lahasi
^ Kutani: “hi ta kumana nghohe ni nghohe”.
^ Kutani: “palácio”.
^ Hi kukongoma: “tendeni”.
^ Kutani: “palácio”.
^ Ku nga Jerobhowamu wa Wumbiri.
^ Zvi wulako ku: “Jehovha i vhunile.” I vitaniwa ku hi Uziya ka 2Th 15:13; 2Kr 26:1-23; Isa 6:1; ni ka Zak 14:5.
^ Ku nga Amaziya, a papayi wakwe.
^ Kutani: “nyangweni ya Hamate”.
^ Ku nga Bimbi ga Munyu kutani Bimbi Gofa.
