Tihosi ta wumbiri 15:1-38
15 Hi lembe ga wu 27 ga Jerobhowamu,* a hosi ya Izrayeli, Azariya,*+ a n’wana wa Amaziya,+ a hosi ya Judha, i no maha hosi.+
2 I wa hi ni 16 wa malembe a cikhati leci a nga maha hosi, niku i no fuma a 52 wa malembe Jerusalema. A vito ga mamani wakwe ku wa hi Jekoliya, wa le Jerusalema.
3 I no simama ku maha zvakululama mahlweni ka Jehovha a ku khwatsi hi lezvi a papayi wakwe, Amaziya, a nga mahile.+
4 Kanilezvi a matshamu yo tlakuka a ma susiwangi.+ A vanhu va wa ha simama ku maha miphahlo ni ku tuvikisa a musi wa miphahlo lomu ka matshamu yo tlakuka.+
5 Jehovha i noba hosi hi hlokonho. Yi no simama ni hlokonho+ kala a siku legi yi ngafa hi gona na yi tshama ka yindlu yin’wani.+ Jothamu,+ a n’wana wa hosi, hi yena a nga kari a rangela a yindlu,* a lamula a vanhu va tiko.+
6 A man’wani matimu ya Azariya,+ zvontlhe lezvi a nga maha, ma tsalilwe bhukwini ga matimu ya zvikhati zva tihosi ta Judha.
7 Hi kugumesa, Azariya i no etlela a humula ni vakokwani vakwe;+ va no mu lahla ni vakokwani vakwe Dhoropeni ga Dhavhidha. A n’wana wakwe Jothamu i nova hosi cikhundleni cakwe.
8 Hi lembe ga wu 38 ga Azariya,+ a hosi ya Judha, Zakariya,+ a n’wana wa Jerobhowamu, i no maha hosi ya Izrayeli le Samariya, niku i no fuma 6 wa tihweti.
9 I no maha zvakubiha mahlweni ka Jehovha a ku khwatsi hi lezvi a vakokwani vakwe va nga maha. A nga tsikangi a zviwonho lezvi Jerobhowamu, a n’wana wa Nebhate, a nga va wonhisa hi zvona a vaIzrayeli.+
10 Xaluma, a n’wana wa Jabhexe, i no mu xuxela cikungo, a mu daya+ le Ibleyama.+ Andzhako ka loku a mu dele, i nova hosi cikhundleni cakwe.
11 A man’wani matimu ya Zakariya ma tsalilwe bhukwini ga matimu ya zvikhati zva tihosi ta Izrayeli.
12 Lezvo zvi no tatisa a gezu ga Jehovha legi a gi wulileko ka Jehu, aku: “A mune wa zvizukulwana zva vana va wena+ zvi ta tshama citshan’wini ca wuhosi ca Izrayeli.”+ Hi zvalezvo zvi nga maheka.
13 Xaluma, a n’wana wa Jabhexe, i no maha hosi hi lembe ga wu 39 ga Uziya,+ a hosi ya Judha, niku i no fuma a hweti yin’we basi le Samariya.
14 Menahema, a n’wana wa Gadhi, i no kandziha hi le Tirza+ aya Samariya a ya daya Xaluma,+ a n’wana wa Jabhexe, le Samariya. Andzhako ka ku mu daya, i no maha hosi cikhundleni cakwe.
15 A man’wani matimu ya Xaluma ni cikungo leci a ci xuxileko ma tsalilwe bhukwini ga matimu ya zvikhati zva tihosi ta Izrayeli.
16 Andzhako ka loku Menahema a sukile hi le Tirza, i no ya hlasela Tifsa ni vontlhe va nga hi lomo ni lomu matlhelweni ya kona hakuva a va mu vhululelangi tinyangwa. I no gi hlasela, a handzulela a makhwiri ya vavasati va tinyimba.
17 Hi lembe ga wu 39 ga Azariya, a hosi ya Judha, Menahema, a n’wana wa Gadhi, i no maha hosi ya Izrayeli, niku i no fuma a 10 wa malembe le Samariya.
18 I no simama ku maha zvakubiha mahlweni ka Jehovha. Masikwini yakwe wontlhe, a nga zvi tsikangi a zviwonho zvontlhe lezvi Jerobhowamu, a n’wana wa Nebhate, a nga va wonhisa hi zvona a vaIzrayeli.+
19 Pule,+ a hosi ya Asiriya, i no nghena lomu tikweni. Makunu Menahema i no nyika Pule a 1000 wa titalenta* ta prata hi kota ya lezvi a nga mu vhuna ku tiyisa a mufumo mandleni yakwe.+
20 Hikwalaho, Menahema i no hlengeleta a prata lomu Izrayeli hi ku khupisa a vahombe ni vanhu vo ganya.+ I no nyika a hosi ya Asiriya 50 wa maxekeli* ya prata hi kuya hi munhu ni munhu. A hosi ya Asiriya yi no tlhela. A yi tshamangi lomu tikweni.
21 A man’wani matimu ya Menahema,+ zvontlhe lezvi a nga maha, ma tsalilwe bhukwini ga matimu ya zvikhati zva tihosi ta Izrayeli.
22 Menahema i no etlela a humula ni vakokwani vakwe; a n’wana wakwe Pekahiya i no maha hosi cikhundleni cakwe.
23 Hi lembe ga wu 50 ga Azariya, a hosi ya Judha, Pekahiya, a n’wana wa Menahema, i no maha hosi ya Izrayeli le Samariya, niku i no fuma a malembe mambiri.
24 I no simama ku maha zvakubiha mahlweni ka Jehovha. A nga tsikangi a zviwonho lezvi Jerobhowamu, a n’wana wa Nebhate, a nga va wonhisa hi zvona a vaIzrayeli.+
25 A nandza gakwe Peka,+ a n’wana wa Remaliya, i no mu xuxela cikungo a mu daya le Samariya, lomu likhokholeni* li tiyisilweko khwatsi la yindlu* ya hosi, na a hi na Argobha na Ariye zvin’we ni 50 wa vavanuna va le Gileyadhe. Andzhako ka loku a mu dele, i no maha hosi cikhundleni cakwe.
26 A man’wani matimu ya Pekahiya, zvontlhe lezvi a nga maha, ma tsalilwe bhukwini ga matimu ya zvikhati zva tihosi ta Izrayeli.
27 Hi lembe ga wu 52 ga Azariya, a hosi ya Judha, Peka,+ a n’wana wa Remaliya, i no maha hosi ya Izrayeli le Samariya niku i no fuma 20 wa malembe.
28 I no simama ku maha zvakubiha mahlweni ka Jehovha. A nga tsikangi a zviwonho lezvi Jerobhowamu, a n’wana wa Nebhate, a nga va wonhisa hi zvona a vaIzrayeli.+
29 Masikwini ya Peka, a hosi ya Izrayeli, Tiglate-Pilesera,+ a hosi ya Asiriya, i no dhumela a teka Ijoni, ni Abhel-Bhete-Maaka,+ ni Janowa, ni Kedhexe,+ ni Hazori, ni Gileyadhe,+ ni Galileya, gontlhe a tiko ga Naftali,+ a tlhela a khoma a vahanyi va kona a va yisa wukhumbini le Asiriya.+
30 Makunu Hoxeya,+ a n’wana wa Ela, i no mu xuxela cikungo Peka, a n’wana wa Remaliya, a mu dhumela a mu daya. Yena i no maha hosi cikhundleni cakwe hi lembe ga wu 20 ga Jothamu,+ a n’wana wa Uziya.
31 A man’wani matimu ya Peka, zvontlhe lezvi a nga maha, ma tsalilwe bhukwini ga matimu ya zvikhati zva tihosi ta Izrayeli.
32 Hi lembe ga wumbiri ga Peka, a n’wana wa Remaliya, a hosi ya Izrayeli, Jothamu,+ a n’wana wa Uziya,+ a hosi ya Judha, i no maha hosi.
33 I wa hi ni 25 wa malembe a cikhati leci a nga maha hosi niku i no fuma a 16 wa malembe Jerusalema. A vito ga mamani wakwe ku wa hi Jeruxa, a nhanyana wa Zadhoki.+
34 I no simama ku maha zvakululama mahlweni ka Jehovha, a ku khwatsi hi lezvi Uziya, a papayi wakwe, a nga mahile.+
35 Kanilezvi a matshamu yo tlakuka a ma susiwangi. A vanhu va wa ha simama ku maha miphahlo ni ku tuvikisa a musi wa miphahlo lomu ka matshamu yo tlakuka.+ Hi yena a nga aka a nyangwa ya le hehla ya yindlu ya Jehovha.+
36 A man’wani matimu ya Jothamu, lezvi a nga maha, ma tsalilwe bhukwini ga matimu ya zvikhati zva tihosi ta Judha.
37 Masikwini lawo, Jehovha i no sangula ku rumela Rezini, a hosi ya Siriya, na Peka,+ a n’wana wa Remaliya, kasi va ya vhukela Judha.+
38 Jothamu i no etlela a humula ni vakokwani vakwe, a lahliwa ni vakokwani vakwe Dhoropeni ga Dhavhidha, a kokwani wakwe. A n’wana wakwe Ahaza i no maha hosi cikhundleni cakwe.
Mitlhamuselo ya lahasi
^ Ku nga Jerobhowamu wa Wumbiri.
^ Zvi wulako ku: “Jehovha i vhunile.” I vitaniwa ku hi Uziya ka 2Th 15:13; 2Kr 26:1-23; Isa 6:1; ni ka Zak 14:5.
^ Kutani: “palácio”.
^ Kutani: “torre”.
^ Kutani: “palácio”.
