Tihosi ta wumbiri 19:1-37
19 Zvalezvi hosi Hezekiya a ngazwa lezvo, i no handzula a tinguwo takwe a boha tisakwa aya ndlwini ya Jehovha.+
2 I no rumela Eliyakimu, loyi a nga wonelela a yindlu,* na Xebna, a matsalani, ni madhota ya vapristi, na va bohile tisakwa, vaya ka muphrofeti Isaya,+ a n’wana wa Amozi,
3 va yaku kakwe: “Hezekiya i ngalo: ‘Nyamutlha i siku ga hlomulo, ni ga ku kawukiwa,* ni ga tingana; hakuva a vanana va chikelelwe hi cikhati ca ku pswaliwa kanilezvi a ntamu wa ku pswala a wu kona.+
4 Kuzvilava Jehovha, a Nungungulu wa wena, i tazwa a magezu wontlhe ya Rabxake, loyi a hosi yakwe, a hosi ya Asiriya, a nga mu rumela kasi ku ta rukatela a Nungungulu a hanyako,+ a mu lamula hi kota ya magezu lawa Jehovha, a Nungungulu wa wena, a ma zwileko. Hikwalaho, khongelela+ a misalela leyi yi ponileko.’”
5 Hikwalaho, a malandza ya hosi Hezekiya ma noya ka Isaya.+
6 Isaya aku ka wona: “Byelani a hosi ya n’wina, muku: ‘Jehovha i ngalo: “U nga chavi+ hi kota ya magezu lawa u ma zwileko, lawa a malandza ya hosi ya Asiriya ma ndzi rukateleko hi wona.+
7 Ndzi ta chela maalakanyo hlokweni yakwe,* niku i tazwa mahungu a tlhela tikweni gakwe. Ndzi ta mu wisa hi cipadha tikweni gakwe.”’”+
8 Laha Rabxake a ngazwa lezvaku a hosi ya Asiriya yi sukile le Lakixe,+ i no tlhela a ya yi kuma na yilwa ni tiko ga Libna.+
9 Makunu hosi Senakeribhe i nozwa vanhu na va wulawula hi Tirhaka, a hosi ya Etiopia, vaku: “Hi loyi, wata a talwa na wena.” Hikwalaho, i no rumela zvirun’wa+ kambe zviya ka Hezekiya, aku:
10 “Byelani Hezekiya, a hosi ya Judha, muku: ‘U nga tsiki a Nungungulu wa wena, loyi u mu tsumbako, a ku kalavela, aku: “Jerusalema a nga ta nyikelwa canjeni ga hosi ya Asiriya.”+
11 U zvi zwile lezvi a tihosi ta Asiriya ti nga maha ka matiko wontlhe, ti ma lovisa.+ U alakanya ku wena wa mun’we u ta ponisiwa ke?
12 A matiko lawa a vakokwani va mina va nga ma lovisa ma ponisilwe hi vanungungulu va wona ke? I kwihi Gozani, ni Harani,+ ni Rezefa, ni vanhu va le Edheni, lava va nga hi le Tel-Asari?
13 Yi kwihi a hosi ya le Hamate, ni hosi ya le Arpadhe, ni tihosi ta madhoropa ya Sefarvhayime, ni Hena, ni Ivha?’”+
14 Hezekiya i no teka a mapapilo mandleni ya zvirun’wa a ma lera. Andzhako ka lezvo, i noya ndlwini ya Jehovha, a ya ma* andlala mahlweni ka Jehovha.+
15 Hezekiya i no sangula ku khongela+ mahlweni ka Jehovha, aku: “O Jehovha, wena Nungungulu wa Izrayeli, u tshamileko hehla* ka makerubhima,+ hi wena wece u nga Nungungulu wa lisine cikari ka mifumo yontlhe ya misava.+ Wena u mahile matilo ni misava.
16 O Jehovha, demba ndleve ya wena u ingisela!+ O Jehovha, vhulula a matihlo ya wena+ u wona! Zwana a magezu lawa Senakeribhe a ma rumeleko ya ku rukatela a Nungungulu a hanyako.
17 O Jehovha, lisine lezvaku a tihosi ta Asiriya ti hahlulele a matiko ni misava ya wona.+
18 Ni lezvaku ti hoxile a vanungungulu vabye lomu ndzilweni, hakuva va wa nga hi vanungungulu+ kanilezvi va wa hi ntiro wa mandla ya vanhu,+ a tisinya ni maribye. Hikwalaho, ti zvi kotile ku va lovisa.
19 Makunu Jehovha, Nungungulu wa hina, ha ku kombela: Hi ponise canjeni gakwe, kasi a mifumo yontlhe ya misava yi zvi tiva lezvaku wena Jehovha, hi wena wece u nga Nungungulu.”+
20 Isaya, a n’wana wa Amozi, i no rumela a mhaka leyi ka Hezekiya, aku: “Jehovha, a Nungungulu wa Izrayeli, i ngalo: ‘Ndzi zwile a mukhongelo wa wena+ hi mhaka ya Senakeribhe, a hosi ya Asiriya.+
21 A mhaka leyi Jehovha a yi wulileko xungetano hi yena hi leyi:
“A nhwana,* a nhanyana wa Ziyoni, wa ku kanyisa, a ku hleka.
A nhanyana wa Jerusalema wa ku ninginisela hloko.
22 Himani u nga mu poyila ni ku mu rukatela?+
Himani u nga mu tlakusela gezu+U tlhela u mu tlakusela a matihlo ya wena ya matshandza ke?
U vhukele Loyi a Basileko wa Izrayeli!+
23 U rukatele Jehovha+ hi zvirun’wa zva wena,+ uku:‘Ndzi ta kandziha ndziya hehla ka zvitsungaHi tikareta ta mina to tala ta yimpi,Ndziya ka matshamu ya le kule ya Lebhanoni.
Ndzi ta tsema a misedhare yakwe yo leha, ni mijunipero yakwe yo saseka.
Ndzi ta nghena makhokholeni yakwe ya le kule nguvhu, ni lomu ka makhwati yakwe yo tlhuma.
24 Ndzi ta kela tihlowo ndzi tlhela ndzinwa mati ya matiko;Ndzi ta womisa a zvicongwana* zvontlhe zva Gibhite hi zvipama zva mikondzo ya mina.’
25 A wu zvi zwangi ke? Zvi yimisilwe* kaleloko.+
Ndzi zvi longisele* kusukela kaleloko.+
Makunu ndzi ta zvi maha.+
U ta cica a madhoropa ma vhikelweko khwatsi ma maha ciwula ca tinhulu ta maribye.+
26 A vaaki vabye va ta mbhela ntamu;Va ta chavisiwa vawa tingana.
Va ta fana ni tisinya lomu masin’wini ni byanyi go nyuka,+Va ku khwatsi i byanyi gi milako le hehla ka tiyindlu legi gi swako hi moya wa cikobani.*
27 Kanilezvi ndza zvi tiva khwatsi loku u tshama, ni loku u huma, ni loku u nghena,+Ni loku u ndzi vhindlukela hi zanga,+
28 Hakuva a zanga ya wena+ ni kubhonga ka wena zvi chikele tindleveni ta mina.+
Hikwalaho, ndzi ta ku boha a mukhalo wa mina nhovhini ya wena ni matomu ya mina+ non’wini wa wena,Ndzi ku tlhelisa hi ndlela leyi u ngata hi yona.”+
29 “‘A cikombiso ca kona ka wena* ci tava leci: A lembe legi mu taga lezvi zvi to kula ha zvoce;* a lembe gi tako mu taga lezvi zvi to mila hi ka timbewu leto;+ kanilezvi ka lembe ga wunharu mu ta byala timbewu mu tshovela mu tlhela mu rima zvivhina,* muga a mihandzu ya kona.+
30 Lava va yindlu ya ka Judha va ponileko, lava va seleko,+ va ta zima timitsu va pswala mihandzu lomu ka madhavi.
31 Hakuva a misalela yi ta huma hi Jerusalema, ni lava va ponileko va ta huma hi le Citsungeni ca Ziyoni. A kutitsitsirita ka Jehovha wa mabutho ku ta maha lezvo.+
32 “‘Hikwalaho, xungetano hi hosi ya Asiriya, Jehovha i ngalo:+
“A nga ta nghena lomu dhoropeni legi+Hambu ku gi phandela paxa,Ne a nga ta gi dhumela hi citlhanguHambu ku maha rampa ya ku gi dhumela hi yona.”’+
33 I ta tlhela hi ndlela leyi a tileko hi yona;A nga ta nghena lomu dhoropeni legi”, ku wula Jehovha.
34 “Ndzi ta vhikela dhoropa legi+ ndzi gi ponisa hi kota ya mina+Ni hi kota ya nandza ga mina Dhavhidha.”’”+
35 Ka wusiku galego, a ngilozi ya Jehovha yi no huma yi ya daya a 185 000 wa vanhu lomu wugovelweni ga vaAsiriya.+ A cikhati leci a vanhu va nga vhuka ni mixo, va no kuma zvirumbi basi.+
36 Hikwalaho, Senakeribhe, a hosi ya Asiriya, i no suka a tlhela Ninivha+ a ya tshama kona.+
37 Laha a nga kari a khizama ndlwini* ya nungungulu wakwe Nisroko, a vana vakwe Adrameleki na Xarezera va no mu daya hi cipadha,+ va gumesa va tsutsuma vaya tikweni ga Ararate.+ A n’wana wakwe, Esar-Hadhoni,+ i no maha hosi cikhundleni cakwe.
Mitlhamuselo ya lahasi
^ Kutani: “palácio”.
^ Kutani: “ku rukatelwa”.
^ Hi kukongoma: “Ndzi ta nghenisa moya kakwe”.
^ Hi kukongoma: “gi”.
^ Zvi nga maha na zvi wula ku: “cikari”.
^ Kutani: “virgem”.
^ Kutani: “minonga ya Nilo”.
^ Hi kukongoma: “mahilwe”.
^ Kutani: “vangile”.
^ Kutani: “moya wa mutsuwuka-gambo”.
^ A zvivhina masimu ya tisinya leti ti pswalako mauvha.
^ Kutani: “zvi to mila hi ka timbewu leti ti wileko”.
^ Ku nga Hezekiya.
^ Kutani: “tempeleni”.
