Tihosi ta wumbiri 2:1-25
2 A cikhati leci Jehovha a nga lava ku teka Elija+ aya matilweni* hi lomu ka moya wa hombe,+ Elija na Elixa+ va no suka Gilgali.+
2 Elija i no byela Elixa, aku: “Tshama laha, hakuva Jehovha i ndzi rumile kuya Bheteli.” Kanilezvi Elixa i te: “A ku khwatsi hi lezvi Jehovha a hanyako ni lezvi wena u* hanyako, ndzi nga ta ku tsika.” Hikwalaho, va no relela vaya Bheteli.+
3 A vana va vaphrofeti* le Bheteli va noya ka Elixa, va yaku: “Wa zvi tiva ku nyamutlha Jehovha i ta teka a hosi ya wena, yi nga havi hloko ya wena ke?”+ Elixa aku: “Ndza zvi tiva. Miyelani.”
4 Elija i te ngalo kakwe: “Elixa, tshama laha, hakuva Jehovha i ndzi rumile kuya Jeriko.”+ Kanilezvi Elixa i te ngalo: “A ku khwatsi hi lezvi Jehovha a hanyako ni lezvi wena u* hanyako, ndzi nga ta ku tsika.” Hikwalaho, va noya Jeriko.
5 A vana va vaphrofeti lava va nga hi Jeriko va no tshinela ka Elixa, vaku kakwe: “Wa zvi tiva ku nyamutlha Jehovha i ta teka a hosi ya wena, yi nga havi hloko ya wena ke?” Elixa aku: “Ndza zvi tiva. Miyelani.”
6 Elija i te ngalo kakwe: “Tshama laha, hakuva Jehovha i ndzi rumile kuya Jordhani.” Kanilezvi Elixa i te ngalo: “A ku khwatsi hi lezvi Jehovha a hanyako ni lezvi wena u* hanyako, ndzi nga ta ku tsika.” Hikwalaho, hi wumbiri gabye va no famba.
7 A 50 wa vana va vaphrofeti vonawu va no famba va ya yima hi le kule va cuwukela, lava va vambiri na va yimile mbhirini ya Jordhani.
8 Makunu Elija i no teka nguwo yakwe+ a yi tsondzela aba mati. A mati ma no avanyeka maya cibhabheni ni cineneni, hi wumbiri gabye va tsemakanya hi laha ka misava yo woma.+
9 Zvalezvi va nga tsemakanya, Elija i no byela Elixa, aku: “Kombela lezvi u lavako ku ndzi ku mahela na ndzi nga se tekiwa mahlweni ka wena.” Hikwalaho, Elixa i te ngalo: “Ndzi kombela ku amukela ciavelo ci wuyetilweko kumbiri ca*+ moya wa wena.”+
10 Elija a mu hlamula, aku: “U kombele zvilo zvo karata. Loku u ndzi wona ni ku tekiwa, zvi maheka lezvi u nga kombela; kanilezvi loku u nga ndzi woni, zvi nga ta maheka.”
11 Laha va nga kari va famba na va bhula, hi citshuketi ku no humelela a kareta ya ndzilo ni mahaxi ya ndzilo+ yi ta va hambanisa. Elija i no tlakukela matilweni* hi lomu ka cipupuri.+
12 Laha a nga kari a cuwukela, Elixa i no banguleka, aku: “Papayi wa mina, papayi wa mina! A kareta ya Izrayeli ni vakhileli va yona va mahaxi!”+ Laha a nga kala a nga ha mu woni, i no khoma tinguwo takwe a ti handzula hi laha cikari.+
13 Andzhako ka lezvo, i no rola a nguwo+ ya Elija leyi yi nga wile a tlhela a ya yima laha mbhirini ya Jordhani.
14 I no teka a nguwo ya Elija leyi yi nga wile, aba hi yona mati, aku: “I kwihi Jehovha, a Nungungulu wa Elija?” A cikhati leci a ngaba mati, ma no avanyeka maya cibhabheni ni cineneni, Elixa a tsemakanya.+
15 Laha a vana va vaphrofeti le Jeriko va nga mu wona hi le kule, va te ngalo: “A moya wa Elija wu relele ka Elixa.”+ Hikwalaho, va no mu khinga va ya khizama lahasi mahlweni kakwe,
16 vaku ngalo ka Elixa: “A malandza ya wena ma na ni 50 wa vavanuna va zvona. Va tsike va famba va ya lavetela a n’winyi wa wena. Kuzvilava a moya* wa Jehovha wu mu tlakulile wu gumesa wu mu hoxa ka cin’we ca zvitsunga kutani ka wun’we wa mikova.”+ Kanilezvi Elixa i te ngalo: “Mu nga va rumi.”
17 Hambulezvo, va no simama ku mu kurumeta laha ka kuza a dhana,* aku: “Va rumeni.” Va no rumela 50 wa vavanuna va ya mu lavetela masiku manharu kanilezvi a va mu kumangi.
18 A cikhati leci va nga wuya kakwe, Elixa i wa hi Jeriko.+ Makunu i te ngalo kabye: “A ndzi mu byelangi ndziku mu nga fambi ke?”
19 Hi ndzhako ka cikhati, a vavanuna va dhoropa va no byela Elixa, vaku: “A hosi ya hina ya zvi wona lezvaku a dhoropa gi laha ka kunene,+ kanilezvi a mati a hi manene niku a misava a yi humesi nchumu.”*
20 Elixa i te ngalo: “Chelani munyu lomu ka cingelwana ca ciswa muta nawo.” Hikwalaho, va no mu nehela.
21 Makunu i no huma aya cibukeni ca mati a ya ci xwanyela munyu,+ aku: “Jehovha i ngalo: ‘Ndzi ma hanyisile a mati lawa. Ma nga ta ha daya hambu ku vanga wungon’wa.’”*
22 A mati lawo ma ha hi manene kala ni nyamutlha, kota lezvi Elixa a wulileko.
23 Elixa i no suka hi laho a kandziha aya Bheteli. Na a famba hi ndlela, ku no huma a zvifanyana zvo kari hi lomu dhoropeni zvi sangula ku mu swiretela;+ zvi no simama ku mu byela ku: “Kandziha, nyapandla ndziwena! Kandziha, nyapandla ndziwena!”
24 Hi kugumesa, i no hundzuluka a zvi cuwuka a zvi ruka hi vito ga Jehovha. Makunu ku no huma maurso mambiri ya mikati+ hi lomu khwatini ma ta pfhemulela 42 wa zvifanyana cikari ka zvona.+
25 Hi laho, i no simama ku famba aya Citsungeni ca Karmeli.+ Loku a sukile hi seyo, i no tlhela Samariya.
Mitlhamuselo ya lahasi
^ Kutani: “ndengelengeni”.
^ Kutani: “a muhefemulo wa wena wu”.
^ “A vana va vaphrofeti” zvi nga maha na ku wuliwa a cikola ca ku gondzisa a vaphrofeti kutani ntlawa wa vaphrofeti.
^ Kutani: “a muhefemulo wa wena wu”.
^ Kutani: “a muhefemulo wa wena wu”.
^ Kutani: “zvipandze zvimbiri zva”.
^ Kutani: “ndengelengeni”.
^ Kutani: “mheho”.
^ Kutani: “karateka”.
^ Zvi nga maha na zvi wula ku: “yi maha tinyimba ti huma”.
^ Zvi nga maha na zvi wula ku: “ku humesa tinyimba”.
