Tihosi ta wumbiri 21:1-26
21 Manase+ i wa hi ni 12 wa malembe a cikhati leci a nga maha hosi, niku i no fuma a 55 wa malembe Jerusalema.+ A vito ga mamani wakwe ku wa hi Hefzibha.
2 I no maha zvakubiha mahlweni ka Jehovha, a landzela mitiro yo nyenyeza ya matiko+ lawa Jehovha a nga ma hlongolile mahlweni ka vaIzrayeli.+
3 I no aketa matshamu yo tlakuka lawa a papayi wakwe Hezekiya a nga ma khungumulele,+ a yimisa maalati ya Bhaali a tlhela a maha a sinya yo basa,*+ a ku khwatsi hi lezvi Ahabhi, a hosi ya Izrayeli, a nga mahile.+ I no khizamela a butho gontlhe ga matilo, a gi tirela.+
4 I no aka ni maalati lomu ndlwini ya Jehovha,+ leyi Jehovha a nga wulile xungetano hi yona, aku: “Ndzi ta veka vito ga mina Jerusalema.”+
5 I no gi akela maalati a butho gontlhe ga matilo+ lomu ka mitsendzele* yimbiri ya yindlu ya Jehovha.+
6 I no hundzisa mufana wakwe hi lomu ndzilweni, a maha masalamuso, a hlahluva+ a tlhela a yimisa tin’anga ni vavhumbi.+ I no maha zvakubiha mahlweni ka Jehovha hi mpimo wa hombe nguvhu kasi a mu zangarisa.
7 I no maha a cifananiso ci kehlilweko ca sinya yo basa*+ a ci veka lomu ndlwini leyi Jehovha a nga byelile Dhavhidha ni n’wana wakwe, Solomoni, xungetano hi yona, aku: “Lomu ka yindlu leyi ni Jerusalema, legi ndzi gi hlawulileko cikari ka tixaka tontlhe ta ka Izrayeli, ndzi ta veka kona a vito ga mina kala kupindzuka.+
8 Ndzi nga ta ha tshuka ndzi pepetsekisa a mikondzo ya vaIzrayeli tikweni legi ndzi nyikileko a vakokwani vabye,+ ntsena lezvaku va fanele ku hlayisa zvontlhe lezvi ndzi va layileko,+ a Nayo wontlhe lowu Mosi, a nandza ga mina, a va leleteleko ku wu landzela.”
9 Kanilezvi a va ingisangi, niku Manase i no simama ku va hambukisa, a va kucetela ku maha zvakubiha nguvhu a ku hundza a matiko lawa Jehovha a nga ma lovisile mahlweni ka vaIzrayeli.+
10 Jehovha i no simama ku wulawula hi nomu wa malandza yakwe, a vaphrofeti,+ aku:
11 “Manase, a hosi ya Judha, i mahile a zvilo zvontlhe lezvi zvo nyenyeza; i mahile kubiha ka hombe nguvhu a ku hundza vontlhe a vaAmori+ lava va hanyileko mahlweni kakwe+ a tlhela a wonhisa Judha hi zvifananiso zvakwe zvo nyenyeza.*
12 Hikwalaho, Jehovha, a Nungungulu wa Izrayeli, i ngalo: ‘Ndzi ta neha khombo Jerusalema+ ni Judha legi gi to tinga a tindleve ta ni wihi a to gizwa.+
13 Ndzi ta gwimba hehla ka Jerusalema a lingoti lo pima hi lona+ leli li gwimbelweko Samariya+ ndzi tlhela ndzi tirisa a lingoti la prumo* leli li tirisilweko ka yindlu ya Ahabhi.+ Ndzi ta basisa Jerusalema a ku khwatsi hi loku a munhu a basisa ngelo, a wu hlazva a wu jimisa.+
14 Ndzi ta fularela misalela ya tshomba ya mina+ ndzi yi nyikela canjeni ga valala vabye. Va ta maha muphango ni nhundzu ya vontlhe a valala vabye,+
15 hakuva va mahile lezvi zvi bihileko mahlweni ka mina, va simama ku ndzi zangarisa, kusukela siku legi a vakokwani vabye va nga huma hi gona tikweni ga Gibhite kala nyamutlha.’”+
16 A cin’wani kambe, Manase i halatile a nkhata wo tala nguvhu wo kala nandzu kala a tata Jerusalema hi wona, kusukela ka mbhiri yin’we kala ka yin’wani mbhiri.+ Ahandle ka lezvo, i no maha ciwonho ca ku wonhisa Judha hi ku maha zvakubiha mahlweni ka Jehovha.
17 A man’wani matimu ya Manase ni zvontlhe lezvi a nga maha, ni zviwonho lezvi a zvi mahileko, zvi tsalilwe bhukwini ga matimu ya zvikhati zva tihosi ta Judha.
18 Makunu Manase i no etlela a humula ni vakokwani vakwe a lahliwa lomu jardhim ya yindlu yakwe, a jardhim ya Uza;+ a n’wana wakwe Amoni i no maha hosi cikhundleni cakwe.
19 Amoni+ i wa hi ni 22 wa malembe a cikhati leci a nga maha hosi, niku i no fuma a malembe mambiri Jerusalema.+ A vito ga mamani wakwe ku wa hi Mexulemete, a n’wana wa Haruza wa le Jotbha.
20 I no simama ku maha zvakubiha mahlweni ka Jehovha, a ku khwatsi hi lezvi Manase, a papayi wakwe, a mahileko.+
21 I no famba tindleleni tontlhe leti a papayi wakwe a fambileko hi tona, a simama ku tirela ni ku khizamela a zvifananiso zvo nyenyeza lezvi a papayi wakwe a zvi tireleko.+
22 Hikwalaho, i no fularela Jehovha, a Nungungulu wa vakokwani vakwe, niku a nga fambangi ndleleni ya Jehovha.+
23 Hi kugumesa, a malandza ya Amoni ma no mu xuxela cikungo, ma daya hosi lomu ndlwini ya yona.
24 Kanilezvi a vanhu va lomu tikweni va no daya vontlhe lava va nga mu xuxela cikungo hosi Amoni, va yimisa Josiya, a n’wana wakwe, a kuva hosi cikhundleni cakwe.+
25 A man’wani matimu ya Amoni, lezvi a nga maha, ma tsalilwe bhukwini ga matimu ya zvikhati zva tihosi ta Judha.
26 Makunu va no mu lahla cilahleni cakwe lomu jardhim ya Uza,+ niku a n’wana wakwe, Josiya,+ i no maha hosi cikhundleni cakwe.
Mitlhamuselo ya lahasi
^ Kutani: “pátios”.
^ A gezu ga ciHebheru gi tirisilweko laha kuzvilava hi gona gin’we ni legi gi wulako a “macimba ya zvihari”. Gi tirisiwa kota gezu ga ku chepeta.
^ Kutani: “nível”.
