Tihosi ta wumbiri 22:1-20
22 Josiya+ i wa hi ni 8 wa malembe a cikhati leci a nga maha hosi, niku i no fuma 31 wa malembe Jerusalema.+ A vito ga mamani wakwe ku wa hi Jedhidha, a n’wana wa Adhaya, wa le Bhozkate.+
2 I no maha zvakululama mahlweni ka Jehovha a tlhela a famba tindleleni tontlhe ta Dhavhidha, a kokwani wakwe;+ a nga hambukangi aya cineneni kutani cibhabheni.
3 Hi lembe ga wu 18 ga hosi Josiya, a hosi yi no ruma Xafani, a matsalani, a n’wana wa Azaliya, a n’wana wa Mexulamu, aya ndlwini ya Jehovha,+ yiku:
4 “Kandziha uya ka Hilkiya,+ a mupristi wa hombe, u ya mu byela a hlengeleta mali yontlhe leyi yi nehiwako ndlwini ya Jehovha,+ leyi a vagadhi va tinyangwa va hlengisileko vanhu.+
5 Va wa yi nyikele ka lava va rangelako ntiro ndlwini ya Jehovha. Lavo vonawu va ta yi nyikela ka lava va tirako ndlwini ya Jehovha, lava va to lungisa* yindlu,+
6 ku nga vavatli, ni vaaki, ni vameseri; a mali leyo va ta xava hi yona a mapulango ni maribye ma tsemilweko kasi ku lungisa yindlu.+
7 Kanilezvi a va faneli ku londziwa tikonta ta mali leyi va nyikilweko, hakuva vanhu vo tsumbeka.”+
8 Hi ndzhako ka cikhati, Hilkiya, a mupristi wa hombe, i no byela Xafani, a matsalani,+ aku: “Ndzi thumbile a bhuku ga Nayo+ lomu ndlwini ya Jehovha.” Hikwalaho, Hilkiya i no teka bhuku lego a nyika Xafani, Xafani a sangula ku gi lera.+
9 Makunu Xafani, a matsalani, i noya ka hosi a ya yi byela, aku: “A malandza ya wena ma chululile a mali leyi yi nga hi lomu ndlwini, niku ma yi nyikele ka lava va yimisilweko a ku rangela a ntiro wa yindlu ya Jehovha.”+
10 Xafani, a matsalani, i no engeta a byela hosi, aku: “Ndzi nyikilwe bhuku+ hi mupristi Hilkiya.” Xafani i no sangula ku gi lera mahlweni ka hosi.
11 Zvalezvi a hosi yi ngazwa a timhaka ta bhuku ga Nayo, yi no handzula tinguwo ta yona.+
12 Andzhako ka lezvo, a hosi yi no leletela mupristi Hilkiya, na Ahikamu,+ a n’wana wa Xafani, na Akbhori, a n’wana wa Mikaya, na Xafani, a matsalani, na Asaya, a nandza ga hosi, yiku:
13 “Fambani mu ya ndzi wutisela ka Jehovha, mu tlhela mu wutisela ni vanhu lava, ni tiko gontlhe ga Judha hi timhaka ta bhuku legi gi thumbilweko, hakuva a zanga ya Jehovha leyi yi hi vhurelako ya hombe+ hi kota ya lezvi a vakokwani va hina va nga kala ku ingisa a timhaka ta bhuku legi, va nga hlayisi zvontlhe lezvi zvi tsalilweko xungetano hi hina.”
14 Hikwalaho, mupristi Hilkiya, na Ahikamu, na Akbhori, na Xafani, na Asaya va noya ka Huldha, a muphrofeti wa cisati.+ I wa hi sati wa Xaluma, a n’wana wa Tikvha, a n’wana wa Harhasa, a muhlayisi wa yindlu ya tinguwo, a nga hanya Dhoropeni Giswa* ga Jerusalema; va no wulawula naye kwaseyo.+
15 I te ngalo kabye: “Jehovha, a Nungungulu wa Izrayeli, i ngalo: ‘Byelani a wanuna loyi a nga mu ruma a kuta ka mina, muku:
16 “Jehovha i ngalo: ‘Ndzi ta neha a khombo wutshan’wini legi ni ka vahanyi va gona, ku nga timhaka tontlhe ta bhuku legi a hosi ya Judha yi lerileko.+
17 Kota lezvi va ndzi tsikileko va ya tuvikisa musi wa miphahlo ka van’wani vanungungulu+ hi ku fela ku ndzi zangarisa hi mitiro yontlhe ya mandla yabye,+ a zanga ya mina yi ta vhurela a wutshamu legi niku yi nga ta timelwa.’”+
18 Kanilezvi ka hosi ya ka Judha, leyi yi nga mu ruma a ku ta wutisa Jehovha, mu ta yi byela lezvi: “Jehovha, a Nungungulu wa Izrayeli, i ngalo: ‘Xungetano hi magezu lawa u nga mazwa,
19 kota lezvi u olovisileko a mbilu ya wena u tlhela u ti koramisa+ mahlweni ka Jehovha laha u ngazwa a magezu lawa ndzi ma wulileko xungetano hi wutshamu legi ni vahanyi va gona — lezvaku va ta maha nchumu wo tshisa ni ciruko — u handzula tinguwo ta wena+ u tlhela u rila mahlweni ka mina, minawu ndzi ku zwile, ku wula Jehovha.
20 Hi kota ya lezvo, ndzi ta ku hlengeleta ka vakokwani va wena,* u lahliwa cilahleni ca wena hi kurula; a mahlo ya wena ma nga ta wona a khombo gontlhe legi ndzi to gi neha ka wutshamu legi.’”’” Andzhako ka lezvo, va no tlhelisa hlamulo ka hosi.
Mitlhamuselo ya lahasi
^ Kutani: “lungisa a tifa ta”.
^ Kutani: “ka Bhairo ya Wumbiri”.
^ Magezu yo sasekiselwa ma wulako kufa.
