Tihosi ta wumbiri 24:1-20
24 Masikwini ya Jehoyakimu, Nebhukadnezare,+ a hosi ya Bhabhuloni, i nota a ta mu vhukela niku Jehoyakimu i nova nandza gakwe hi malembe manharu, kanilezvi i no gumesa a mu jikela, a tsika ku mu ingisa.
2 Makunu Jehovha i no sangula ku mu rumelela a mitlawa ya vaphangi ya vaKaldheya,+ ni vaSiriya, ni vaMowabhi, ni vaAmoni. I no simama ku yi rumela yi ta vhukela Judha kasi yi mu lovisa hi kuya hi gezu ga Jehovha+ legi a gi wulileko hi nomu wa malandza yakwe, a vaphrofeti.
3 Hakunene lezvo zvi mahekile ka Judha hi kulaya ka Jehovha, kasi a va susa mahlweni kakwe+ hi kota ya zviwonho zvontlhe lezvi Manase a nga zvi mahile,+
4 ni nkhata wo kala nandzu lowu a nga wu halata,+ hakuva i wa tatile Jerusalema hi nkhata wo kala nandzu, niku Jehovha a nga zvi lavangi ku tsetselela.+
5 A man’wani matimu ya Jehoyakimu, zvontlhe lezvi a nga maha, ma tsalilwe bhukwini ga matimu ya zvikhati zva tihosi ta Judha.+
6 Jehoyakimu i no etlela a humula zvin’we ni vakokwani vakwe;+ a n’wana wakwe, Jehoyakina, i no maha hosi cikhundleni cakwe.
7 A hosi ya Gibhite a ya ha tshukangi yi ti daxeka kambe yi huma tikweni ga yona, hakuva a hosi ya Bhabhuloni yi wa tekile a matiko wontlhe lawa ma nga lumba a hosi ya Gibhite,+ kusukela Nkoveni wa Gibhite+ kala Congweni wa Eufrate.+
8 Jehoyakina+ i wa hi ni 18 wa malembe a cikhati leci a nga maha hosi, niku i no fuma tihweti tinharu Jerusalema.+ A vito ga mamani wakwe ku wa hi Nehuxta, a n’wana wa Elnatani, wa le Jerusalema.
9 I no simama ku maha zvakubiha mahlweni ka Jehovha, a landzela zvontlhe lezvi a papayi wakwe a nga mahile.
10 Ka cikhati leco, a malandza ya Nebhukadnezare, a hosi ya Bhabhuloni, ma no kandziha mata Jerusalema, ma ta randzela a dhoropa.+
11 Nebhukadnezare, a hosi ya Bhabhuloni, i nota dhoropeni a malandza yakwe na ma kari ma randzela dhoropa.
12 Jehoyakina, a hosi ya Judha, i no ti nyikela ka hosi ya Bhabhuloni,+ zvin’we ni mamani wakwe, ni malandza yakwe, ni tihosana takwe, ni vatiri vakwe va laha wuhosini.+ A hosi ya Bhabhuloni yi no mu khoma yi mu yisa wukhumbini hi lembe ga wu 8 ga kufuma kakwe.+
13 Makunu a hosi ya Bhabhuloni yi no teka a titshomba tontlhe ta yindlu ya Jehovha, ni titshomba ta yindlu* ya hosi,+ yi tsemelela a zvibya zvontlhe zva ouro lezvi Solomoni, a hosi ya Izrayeli, a nga zvi mahile lomu tempeleni ya Jehovha.+ Lezvi zvi mahekisile zvalezvi Jehovha a nga phrofetisile zvona.
14 Yi no khomela a vanhu vontlhe va le Jerusalema vaya wukhumbini, zvin’we ni tihosana tontlhe,+ ni masochwa wontlhe ya tinhenha, ni vameseri vontlhe, ni vabethi va tisimbi.*+ Yi no khoma 10 000 wa vona vaya wukhumbini. A ku salangi munhu ahandle ka lava va nga hi zvisiwana nguvhu lomu tikweni.+
15 Hi ndlela leyo, yi no khoma Jehoyakina+ yi mu yisa wukhumbini le Bhabhuloni.+ Yi no khoma ni mamani wa hosi, ni vasati va hosi, ni vatiri vakwe va laha wuhosini, ni vahombe va tiko, yi va susa Jerusalema yi va yisa wukhumbini le Bhabhuloni.
16 A hosi ya Bhabhuloni yi no tlhela yi khoma a masochwa wontlhe, 7000 wa wona, zvin’we ni 1000 wa vameseri, ni vabethi va tisimbi,* vontlhe va nga hi vavanuna va tinhenha va gondzisilweko kulwa, yi va yisa wukhumbini le Bhabhuloni.
17 A hosi ya Bhabhuloni yi no teka Mataniya, a tio wa Jehoyakina,+ yi mu maha hosi cikhundleni cakwe yi tlhela yi cica a vito gakwe yiku hi Zedhekiya.+
18 Zedhekiya i wa hi ni 21 wa malembe a cikhati leci a nga maha hosi, niku i no fuma 11 wa malembe le Jerusalema. A vito ga mamani wakwe ku wa hi Hamutali,+ a n’wana wa Jeremiya, wa le Libna.
19 I no simama ku maha zvakubiha mahlweni ka Jehovha, a landzela zvontlhe lezvi Jehoyakimu a nga mahile.+
20 A zvilo lezvi zvi mahekile Jerusalema ni Judha hi kota ya zanga ya Jehovha, kala a va hlongola mahlweni kakwe.+ Zedhekiya i no tsika ku ingisa a hosi ya Bhabhuloni.+
Mitlhamuselo ya lahasi
^ Kutani: “palácio”.
^ Zvi nga maha na zvi wula ku: “vaaki va makhokhola”.
^ Zvi nga maha na zvi wula ku: “vaaki va makhokhola”.
