Tihosi ta wumbiri 25:1-30
25 Hi lembe ga wu 9 ga kufuma ka Zedhekiya, hi hweti ya wu 10, hi siku ga wu 10 ga hweti, Nebhukadnezare,+ a hosi ya Bhabhuloni, i nota ni butho gakwe gontlhe a ta vhukela Jerusalema.+ I no gi govela, a gi dhumela, a aka muro wu gi randzela matlhelo wontlhe,+
2 niku a dhoropa gi no randzelwa kala ka lembe ga wu 11 ga hosi Zedhekiya.
3 Hi siku ga wu 9 ka hweti ya wumune, a ndlala yi wa tshingile nguvhu+ lomu dhoropeni niku a vanhu va tiko va wa nga hi na zvakuga.+
4 A muro wa dhoropa wu no bhoxiwa,+ niku a masochwa wontlhe ma no tsutsuma ni wusiku hi nyangwa yi nga cikari ka makhurisi mambiri kusuhani ni jardhim ya hosi, a vaKaldheya na va randzela dhoropa; a hosi yi no famba hi ndlela ya Arabha.+
5 Kanilezvi a butho ga vaKaldheya gi no hlongolisela hosi, va ya yi kuma tivaleni ta Jeriko niku wontlhe a mabutho yakwe ma no yi tsika ma hangalaka.
6 Makunu va no khoma hosi+ va yi yisa ka hosi ya Bhabhuloni le Ribla, niku va no yi nyika a tsayiselelo wa yona.
7 Va no daya a vana va Zedhekiya na a zvi wona; Nebhukadnezare i no bhoxa a matihlo ya Zedhekiya, a mu boha hi machini ya kobre a mu yisa Bhabhuloni.+
8 Hi hweti ya wutlhanu, hi siku ga wu 7 ga hweti, ku nga lembe ga wu 19 ga hosi Nebhukadnezare, a hosi ya Bhabhuloni, Nebhuzaradhani,+ a hosana ya vagadhi, loyi a nga hi nandza ga hosi ya Bhabhuloni i noya Jerusalema.+
9 I no hisa a yindlu ya Jehovha,+ ni yindlu* ya hosi,+ ni tontlhe a tiyindlu ta Jerusalema+ a tlhela a hisa a tiyindlu ta vontlhe a vahombe.+
10 A mimuro leyi yi nga randzele Jerusalema yi no khungumulwa hi butho gontlhe ga vaKaldheya legi gi nga hi ni hosana ya vagadhi.+
11 Nebhuzaradhani, a hosana ya vagadhi, i no khoma a vanhu lava va nga sele lomu dhoropeni a va yisa wukhumbini zvin’we ni lava va nga ti nyikele ka hosi ya Bhabhuloni ni citshungu leci cin’wani.+
12 Kanilezvi a hosana ya vagadhi yi no siya vokari va nga hi zvisiwana nguvhu lomu tikweni kasi va rima zvivhina* ni ku maha mitiro ya cikurumeta.+
13 A vaKaldheya va no fayetela a mapilari ya kobre+ ya yindlu ya Jehovha, ni zvikarinyana,+ ni Bimbi ga kobre,+ lezvi zvi nga hi lomu ndlwini ya Jehovha, va rwala a kobre va famba nayo Bhabhuloni.+
14 Va no tlhela va teka mabhaketi, ni mafoxola, ni zvigere zva ku tsema hi zvona titirisido, ni tikopo, ni zvontlhe a zvibya zva kobre zvi nga tirisiwa ntirweni wa tempeli.
15 A hosana ya vagadhi yi no teka a zvibya zva ku woka hi zvona ndzilo ni mingelo. Zvontlhe zvi wa hi zva ouro+ ni prata ya yinene.+
16 Xungetano hi mapilari lawa ya mambiri, ni Bimbi, ni zvikarinyana lezvi Solomoni a nga zvi mahele a yindlu ya Jehovha, zvi wa nga koteki ku peza a kobre ya zvibya zvontlhe lezvi hi kutala.+
17 A pilari gin’we ni gin’wani gi wa hi ni 18 wa mikono* a kuleha.+ A hloko ya pilari yi wa hi ya kobre niku yi wa hi ni mikono yinharu a kutlakuka; a tiredhi ni maromã ma nga randzele a hloko ya pilari, zvontlhe zvi wa hi zva kobre.+ A pilari legi ga wumbiri ni tiredhi ta kona zvonawu zvi wa tshamisile zvalezvo.
18 A hosana ya vagadhi yi no khoma kambe na Seraya,+ a hosana ya vapristi, na Zefaniya,+ a mupristi wa wumbiri, ni vagadhi vanharu va tinyangwa.+
19 Lomu dhoropeni, yi no khoma a mun’we wa vatiri va laha wuhosini, loyi a nga hi komandante wa masochwa, ni ntlhanu wa vanghana va hombe va hosi lava va nga kumiwa lomu dhoropeni, zvin’we ni matsalani wa murangeli wa butho, loyi a nga khomela vanhu lomu tikweni kasi vaya yimpini, ni 60 wa vanhu va lomu tikweni lava va nga ha hi kona lomu dhoropeni.
20 Nebhuzaradhani,+ a hosana ya vagadhi, i no va khoma a va yisa ka hosi ya Bhabhuloni, le Ribla.+
21 A hosi ya Bhabhuloni yi no va daya le Ribla, tikweni ga Hamate.+ Hizvalezvo, Judha i no khomiwa tikweni gakwe a yisiwa wukhumbini.+
22 Nebhukadnezare, a hosi ya Bhabhuloni, i no yimisa Gedhaliya,+ a n’wana wa Ahikamu,+ a n’wana wa Xafani,+ kasi a rangela vanhu lava a nga va siyile lomu tikweni ga Judha.+
23 A cikhati leci a varangeli vontlhe va butho ni vavanuna va vona va ngazwa lezvaku a hosi ya Bhabhuloni yi yimisile Gedhaliya, va no tekela kuya ka Gedhaliya le Mizpa. Ku wa hi Ixmayeli, a n’wana wa Netaniya, na Johanani, a n’wana wa Kareya, na Seraya, a n’wana wa Tanhumete, a muNetofate, na Jaazaniya, a n’wana wa muMaakate, zvin’we ni vavanuna vabye.+
24 Gedhaliya i no hlambanya ka vona ni ka vavanuna vabye, aku: “Mu nga chavi a ku maha malandza ya vaKaldheya. Hanyani lomu tikweni mu tirela hosi ya Bhabhuloni, zvi ta mu fambela khwatsi.”+
25 Hi hweti ya wu 7, Ixmayeli,+ a n’wana wa Netaniya, a n’wana wa Elixama, loyi a nga hi wa laha lixakeni la wuhosi,* i nota ni 10 wa vavanuna va ta dhumela Gedhaliya va mu daya. A vaJudha ni vaKaldheya lava va nga hi zvin’we naye le Mizpa vonawu va nofa.+
26 Andzhako ka lezvo, a vanhu vontlhe, kusukela ka wa mutsongwani kala ka wahombe, a ku patsa ni varangeli va butho va no suka vaya Gibhite,+ hakuva va wa chava vaKaldheya.+
27 Hi lembe ga wu 37 ga wukhumbi ga Jehoyakina,+ a hosi ya Judha, hi hweti ya wu 12, hi siku ga wu 27 ga hweti, hi lembe legi Evhil-Merodhake a nga maha hosi ya Bhabhuloni, i no humesa* Jehoyakina, a hosi ya Judha, lomu paxweni.+
28 I no mu mahela wunene, a tlakusa a citshamu cakwe ca wuhosi ci hundza a zvitshamu zva wuhosi zva tihosi leti tin’wani ti nga hi zvin’we naye le Bhabhuloni.
29 Hikwalaho, Jehoyakina, i no tlhatlha tinguwo takwe ta wubochwa niku contlhe cikhati i waga mahlweni ka hosi, wontlhe a masiku ya kuhanya kakwe.
30 Siku ni siku i waga zvakuga zvi ngata hi ka hosi, wontlhe a masiku ya kuhanya kakwe.
Mitlhamuselo ya lahasi
^ Kutani: “palácio”.
^ A zvivhina masimu ya tisinya leti ti pswalako mauvha.
^ Hi kukongoma: “a nga hi mbewu ya mufumo”.
^ Hi kukongoma: “i no tlakusa hloko ya”.
