Tihosi ta wumbiri 5:1-27
5 Namani, a murangeli wa butho ga hosi ya Siriya, i wa hi wanuna wa nduma, loyi a nga randziwa nguvhu hi hosi yakwe, hakuva Jehovha i wa va nyikile kuhlula* a vaSiriya hi ku tirisa yena. I wa hi musochwa wa nhenha hambu lezvi a nga hi ni hlokonho.*
2 Ka gin’we ga makhati va nga ya dhumela, a vaSiriya va no khoma cinhanyetana tikweni ga Izrayeli va famba naco ci ya maha nandza ga sati wa Namani.
3 Ci no byela a n’winyi wa cona, ciku: “Loku a hosi ya mina yi woya ka muphrofeti+ le Samariya, i wa ta mu hanyisa a hlokonho yakwe.”+
4 Hikwalaho, i* noya ka hosi yakwe a ya yi byela lezvi a nhanyana wa le Izrayeli a nga wula.
5 A hosi ya Siriya yi te ngalo: “Famba zvezvi! Ndzi ta rumela papilo ka hosi ya Izrayeli.” Hikwalaho, i no suka a famba na a hi ni 10 wa titalenta* ta prata ni 6000 wa zvingerengere zva ouro ni 10 wa zvipani zva tinguwo.
6 I no famba ni papilo ka hosi ya Izrayeli, gi nga tsalilwe lezvi: “Ndzi rumela papilo legi zvin’we na Namani, a nandza ga mina, kasi u mu hanyisa ka hlokonho yakwe.”
7 Zvalezvi a hosi ya Izrayeli yi nga lera papilo, yi no handzula tinguwo ta yona, yiku: “Ndzova Nungungulu mina, loyi a zvi kotako ku daya ni ku hanyisa ke?+ I ndzi rumelele a munhu loyi aku ngha ndzi mu hanyisa ka hlokonho yakwe! Zvi woneni ha n’wece lezvaku inaloyi i lava ku holova na mina.”
8 Kanilezvi a cikhati leci Elixa, a munhu wa Nungungulu wa lisine, a ngazwa lezvaku a hosi ya Izrayeli yi handzulile a tinguwo ta yona, i no tekela ku rumela a gezu ka hosi, aku: “U ti handzulela yini a tinguwo ta wena? Mu tsike ata seno ka mina kasi a zvi tiva lezvaku ku na ni muphrofeti lomu Izrayeli.”+
9 Namani i no famba ni mahaxi yakwe ni tikareta takwe ta yimpi a ya yima laha nyangweni ya muti wa Elixa.
10 Kanilezvi Elixa i no rumela a cirun’wa ci ya mu byela, ciku: “Famba u ya hlamba 7 wa makhati+ lomu Jordhani,+ a nyama ya wena yi ta hanya, u basa.”
11 Laha Namani a ngazwa lezvo, i no zangara a lava ku tlhela, aku: “Ndzi wa ti byela ku: ‘I ta huma a ta yima mahlweni ka mina a khongela vitweni ga Jehovha, a Nungungulu wakwe, a hundzisa woko gakwe giya seno ni seno hehla ka hlokonho a ndzi hanyisa.’
12 Abhana na Farpara, a micongo ya Dhamasku,+ a hi yinene nguvhu a ku hundza a mati wontlhe ya Izrayeli ke? A ndzi nge hlambi ka yona ndzi basa ke?” Hikwalaho, i no fularela a famba na a zangarile.
13 A malandza yakwe ma no mu tshinelela, maku: “Papayi, loku a muphrofeti i wa no ku byela ku maha nchumu wo karata, na u nga mahangi ke? A ha ha wuli hi lezvi a nga ku byela basi ku: ‘Hlamba, u basa.’”
14 Makunu i no relela a ya bhun’wala* 7 wa makhati lomu Jordhani, a ku khwatsi hi lezvi a munhu wa Nungungulu wa lisine a nga wulile.+ Makunu a nyama yakwe yi no hanya yi fana ni nyama ya cifanyana,+ a basa.+
15 Andzhako ka lezvo, yena ni vanhu vakwe vontlhe va no tlhela ka munhu wa Nungungulu wa lisine,+ a ya yima mahlweni kakwe, aku: “Makunu ndza zvi tiva lezvaku misaveni yontlhe ku hava kun’wani ku nga ni Nungungulu, saseka lomu Izrayeli.+ Ndzi kombela u amukela a cinyikiwo* ca nandza ga wena.”
16 Hambulezvo, Elixa i te ngalo: “A ku khwatsi hi lezvi Jehovha, loyi ndzi mu tirelako,* a hanyako, ndzi nga ta ci amukela.”+ I no mu kurumeta ku ci amukela, kanilezvi Elixa a nga vhumelangi.
17 Hi kugumesa, Namani i te ngalo: “Lezvi u alako, ndzi kombela ku u nyika a nandza ga wena a misava ya tiko legi yi ringanako ku rwaliwa hi mamula mambiri, hakuva a nandza ga wena gi nga ta ha maha munyikelo wa kuhiswa kutani muphahlo ka mun’wani nungungulu, saseka ka Jehovha.
18 Kanilezvi Jehovha i wa tsetselele a nandza ga wena ka nchumu lowu wa wun’we: A cikhati leci a hosi ya mina yi nghenako lomu ndlwini* ya Rimoni kasi yi khizama, yi ti seketela laha ka woko ga mina, hikwalaho zvi lava ku minawu ndzi khizama lomu ndlwini ya Rimoni. Laha ndzi to khizama lomu ndlwini ya Rimoni, Jehovha i wa tsetselele a nandza ga wena ka lezvo.”
19 Elixa i te ngalo kakwe: “Famba hi kurula.” Laha a nga sukile kakwe a famba pfhukanyana,
20 Gehazi,+ a nandza ga Elixa, a munhu wa Nungungulu wa lisine,+ i no ti byela lezvi mbilwini yakwe: ‘A n’winyi wa mina i tsikile Namani, a muSiriya,+ a famba, a nga amukeli lezvi a tileko nazvo. A ku khwatsi hi lezvi Jehovha a hanyako, ndzi ta tsutsuma ndzi mu landza ndzi ya teka nchumu ka yena.’
21 Hikwalaho, Gehazi i no landza Namani. A cikhati leci Namani a nga wona munhu na a mu landza hi kutsutsuma, i no chika lomu kareteni yakwe a mu khinga, aku: “Zva zvinene ke?”
22 Gehazi aku: “Ina. A n’winyi wa mina i no ndzi ruma ku ta ku byela ku: ‘Ka ha hi ku chikela a vafana vambiri va vana va vaphrofeti va tako hi tikweni ga zvitsunga ga Efrayime. Va nyike talenta yin’we ya prata ni zvipani zvimbiri zva tinguwo.’”+
23 Namani aku: “Teka hi titalenta timbiri.” I no mu kurumeta,+ a chela titalenta timbiri ta prata ni zvipani zvimbiri zva tinguwo lomu ka zvikhwama zvimbiri, a zvi nyikela ka malandza yakwe ya mambiri, ma rwala mahlweni ka Gehazi.
24 A cikhati leci a nga chikela Ofeli,* i no zvi teka mandleni yabye a zvi veka lomu ndlwini, a tlhelisa vavanuna lavo. Loku va fambile,
25 i noya a ya yima mahlweni ka n’winyi wakwe. Elixa aku kakwe: “Gehazi, uta hi kwihi?” Yena aku: “A nandza ga wena gi wa nga yangi ka kuya.”+
26 Elixa aku kakwe: “Kasi a mbilu ya mina yi wa nga hi zvin’we na wena seyo laha a munhu a nga chika kareteni yakwe a ku khinga ke? A ku leci cikhati ca ku amukela prata, ni tinguwo, ni miolivha, ni zvivhina,* ni tiyivhu, ni tihomu ni malandza ya cinuna kutani ya cisati ke?+
27 A hlokonho ya Namani+ yi ta namarela ka wena ni ka pswalo wa wena kala kupindzuka.” Zvalezvo Gehazi i no suka mahlweni ka Elixa na a hi ni hlokonho yo basa a ku khwatsi i gapongo.+
Mitlhamuselo ya lahasi
^ Kutani: “kuhanyisa”.
^ Kutani: “a nga bilwe hi mababyi ya hlonge”.
^ Kuzvilava ku wuliwa Namani.
^ Kutani: “a ya ti nyupeta”.
^ Hi kukongoma: “cikatekiso”.
^ Hi kukongoma: “ndzi yimako mahlweni kakwe”.
^ Kutani: “tempeleni”.
^ Wutshamu go kari le Samariya, kuzvilava citsungana kutani khokhola.
^ A zvivhina masimu ya tisinya leti ti pswalako mauvha.
