Tihosi ta wumbiri 7:1-20
7 Elixa i te ngalo: “Zwanani a mhaka ya Jehovha. Jehovha i ngalo: ‘A mandziko, hi cikhati caleci, nyangweni* ya Samariya, a lipimo* lin’we la mapa ma sililweko khwatsi li ta xaviwa hi xekeli,* ni tipimo timbiri ta sevhadha ti ta xaviwa hi xekeli.’”+
2 A hosana leyi yi nga tsumbiwa hi hosi yi no byela a munhu wa Nungungulu wa lisine, yiku: “Hambu loku Jehovha o vhulula a tinyangwa ta matilo, ina zvi nga maheka zvalezvo ke?”+ Elixa aku: “U ta zvi wona hi matihlo ya wena,+ kanilezvi u nga ta zviga.”+
3 Ku wa hi ni mune wa vanhu va hlokonho nyangweni ya dhoropa.+ Va no wutisana, vaku: “Hi lava ku tshama kwalaha kala hifa ke?
4 Loku hiku: ‘A hi ngheneni lomu dhoropeni’, kuveni lomu dhoropeni ku na ni ndlala,+ hi ta fela lomo. Kanilezvi loku hi tshama laha, hi tafa kambe. Hikwalaho, a hi yeni wugovelweni ga vaSiriya. Loku va hi tsika hi hanya, hi ta hanya, kanilezvi loku va hi daya, o, hi tafa.”
5 Va no suka na gi ku phum va ya nghena wugovelweni ga vaSiriya. Laha va nga chikela timbhirini ta wugovelo ga vaSiriya, va no kuma lezvaku ku wa nga hi na munhu.
6 Hakuva Jehovha i wa mahile ku a wugovelo ga vaSiriya gizwa a guwa ga tikareta ta yimpi ni mahaxi, a guwa ga butho ga hombe.+ Hikwalaho, va no byelana, vaku: “A hosi ya Izrayeli yi xavile a tihosi ta vaHiti ni tihosi ta Gibhite kasi ti ta hi dhumela!”
7 Va no tekela ku suka va tsutsuma na gi ku phum, va siya matenda yabye, ni mahaxi yabye, ni timbongola tabye, ni wugovelo gontlhe na gi tshamisile zvalezvo. Va no tsutsuma kasi va ponisa wutomi* gabye.
8 A cikhati leci a vanhu lavo va hlokonho va nga chikela timbhirini ta wugovelo, va no nghena ka tenda go kari va sangula kuga ni kunwa. Va no teka prata, ni ouro, ni tinguwo va famba va ya zvi fihla. Va no wuya va ta nghena ka gin’wani tenda va teka zvilo va famba va ya zvi fihla.
9 Hi kugumesa, va no byelana, vaku: “Lezvi hi mahako a hi zvona. Legi i siku ga mahungu ya manene! Loku hi miyela hi rindzela kala gica hi ta tsayisiwa. A hi fambeni zvezvi hi ya tivisa a muti wa hosi.”
10 Hikwalaho, va no suka va ya vitana a vagadhi va tinyangwa ta dhoropa, vaku kabye: “Hi nghenile wugovelweni ga vaSiriya, kanilezvi a hi kumangi munhu ne a hi zwangi gezu ga munhu. Ku wova ni mahaxi basi, ni timbongola ti nga bohilwe, niku a matenda ma wa siyisilwe zvalezvo.”
11 Zvalezvo, a vagadhi va tinyangwa va noba hungu zviya zvi ya tivisiwa lomu ndlwini ya hosi.
12 A hosi yi no tekela ku vhuka ni wusiku yi byela malandza ya yona, yiku: “Khwatsi ndzi mu byela lezvi a vaSiriya va nga maha: Va zvi tiva ku hi na ni ndlala,+ hikwalaho, va sukile lomu wugovelweni va ya fihlala lomu khwatini, vaku: ‘Loku va huma hi lomu dhoropeni, hi ta va khoma na va ha hanya hi nghena lomu dhoropeni.’”+
13 A gin’we ga malandza yakwe gi te ngalo: “Hlawula a vavanuna vo kari va teka ntlhanu wa mahaxi ma seleko lomu dhoropeni. Lezvi zvi to va humelela hi zvalezvi zvi to humelela a citshungu contlhe ca Izrayeli leci ci to sala lomu. Va ta lovawo a ku fana ni citshungu contlhe ca Izrayeli leci ci lovileko. A hi va rumeni va huma va ya wona lezvi zvi nga maheka.”
14 Hikwalaho, va no teka a tikareta timbiri ni mahaxi. A hosi yi no va ruma vaya wugovelweni ga vaSiriya, yiku: “Fambani mu ya zvi wona.”
15 Va no va landza kala Jordhani. A ndlela yontlhe yi wa tele hi tinguwo ni zvibya lezvi zvi nga hoxetelwe hi vaSiriya a cikhati leci va nga tsutsuma hi kuchava. A zvirun’wa zvi no wuya zvi ta tivisa hosi.
16 A vanhu va no suka va ya phanga a wugovelo ga vaSiriya laha ka kuza a lipimo lin’we la mapa ma sililweko khwatsi li xaviwa hi xekeli, ni tipimo timbiri ta sevhadha ti xaviwa hi xekeli, kota kuwula ka Jehovha.+
17 A hosi yi wa yimisile a hosana leyi yi nga yi tsumba kasi yi wonelela nyangwa, kanilezvi a vanhu va no yi kandzihetela laha nyangweni yifa, a ku khwatsi hi lezvi a munhu wa Nungungulu wa lisine a nga byelile hosi a cikhati leci yi nga relela yiya kakwe.
18 Zvi mahisile zvalezvi a munhu wa Nungungulu wa lisine a nga yi byelisile zvona a hosi, aku: “A mandziko, hi cikhati caleci, a tipimo timbiri ta sevhadha ti ta xaviwa hi xekeli, ni lipimo lin’we la mapa ma sililweko khwatsi li ta xaviwa hi xekeli laha nyangweni ya Samariya.”+
19 Kanilezvi a hosana yi wa byelile a munhu wa Nungungulu wa lisine, yiku: “Hambu loku Jehovha o vhulula a tinyangwa ta matilo, ina zvi nga maheka zvalezvo ke?” Elixa aku: “U ta zvi wona hi matihlo ya wena, kanilezvi u nga ta zviga.”
20 Zvi mahisile zvalezvo, hakuva yi no kandzihetelwa hi vanhu laha nyangweni, yifa.
