Tihosi ta wumbiri 8:1-29
8 Elixa i no byela a wasati loyi a nga mu vhuxela a n’wana wakwe hi kufeni,+ aku: “Suka u famba, wena ni va ngango wa wena, u ya luvela ni kwihi u to ku kuma, hakuva Jehovha i tivisile lezvaku ku tava ni ndlala+ niku yi taba tiko a 7 wa malembe.”
2 Hikwalaho, a wasati i no suka a maha lezvi a munhu wa Nungungulu wa lisine a nga wula. I no famba ni va ngango wakwe a ya tshama 7 wa malembe tikweni ga vaFilistiya.+
3 Kumbheleni ka 7 wa malembe, a wasati i no wuya hi tikweni ga vaFilistiya, niku i noya a ya khongotela hosi lezvaku a tlheliselwa a yindlu yakwe ni simu gakwe.
4 A hosi yi wa kari yi wulawula na Gehazi, a nandza ga munhu wa Nungungulu wa lisine, yiku: “Hi nga ndzi hlawutela a mitiro yontlhe ya hombe leyi Elixa a nga maha.”+
5 Na a ha hlawutela hosi lezvi Elixa a nga vhuxisa zvona a munhu a nga file,+ a wasati loyi a nga vhuxelwa a n’wana wakwe hi Elixa i no chikela ka hosi a ta yi khongotela lezvaku a tlheliselwa a yindlu yakwe ni simu gakwe.+ Zvalezvo, Gehazi i te ngalo: “Hosi yanga, a wasati wa kona hi yaloyi. Loyi i n’wana wakwe, loyi a nga vhuxiwa hi Elixa.”
6 A hosi yi no wutisa a wasati loye, a wasati a yi hlawutela lezvi zvi nga mahisa zvona. Makunu a hosi yi no mu nyika a mutiri wa laha wuhosini a famba naye, yiku kakwe: “Mu tlhelisele zvontlhe lezvi zvi mu lumbako ni mihandzu yontlhe leyi yi humileko lomu sin’wini kusukela siku legi a nga suka hi gona lomu tikweni kala nyamutlha.”
7 Elixa i noya Dhamasku+ ka cikhati leci Bhen-Hadhadhe,+ a hosi ya Siriya, a nga kari a babya. Hikwalaho, va no mu byela, vaku: “A munhu wa Nungungulu wa lisine+ i chikele lomu.”
8 Zvalezvo, a hosi yi no byela Hazayeli,+ yiku: “Teka cinyikiwo u famba u ya tlhangana ni munhu wa Nungungulu wa lisine,+ u wutisa Jehovha ha yena, uku: ‘Ndzi ta kalamuka ka mababyi lawa ke?’”
9 Hazayeli i noya ka Elixa na a hi ni cinyikiwo ca zvilo zvontlhe zva zvinene zva Dhamasku, a ndzhwalo wu ringanako ku rwaliwa hi 40 wa makameli. Hazayeli i no ta yima mahlweni ka Elixa, aku: “A n’wana wa wena, Bhen-Hadhadhe, a hosi ya Siriya, i ndzi rumile ka wena, a ku ta wutisa ku: ‘Ndzi ta kalamuka ka mababyi lawa ke?’”
10 Elixa i no mu hlamula, aku: “Famba u ya mu byela ku: ‘U ta kalamuka’, hambulezvo Jehovha i ndzi kombile lezvaku i tafa.”+
11 Elixa i no simama ku mu cuwuka laha ka kuza awa tingana. A munhu wa Nungungulu wa lisine i no sangula ku rila.
12 Hazayeli i no mu wutisa, aku: “Hosi yanga, u rilela yini?” Yena a hlamula, aku: “Hi ku ndza ku tiva a kubiha loku u to mahela a vanhu va ka Izrayeli.+ U ta hisa matshamu yabye ma vhikelweko khwatsi, u daya vavanuna vabye va milangelwa hi cipadha, u pswhandlasela vanana vabye, u tlhela u handzulela makhwiri ya vavasati lava va nga ni tinyimba.”+
13 Hazayeli aku: “Zvi nga mahisa kuyini ku a nandza ga wena, legi gi nga mbyana ya ku mbyana, gi maha zvo kota lezvo ke?” Kanilezvi Elixa i te ngalo: “Jehovha i ndzi kombile lezvaku u tava hosi ya Siriya.”+
14 Yena i no suka ka Elixa a tlhela ka hosi yakwe. A hosi yakwe yi no mu wutisa, yiku: “I te yini Elixa?” Yena a hlamula, aku: “I ndzi byelile lezvaku u ta kalamuka.”+
15 Kanilezvi hi siku gi nga landzela, Hazayeli i no teka kumba a wu peta lomu matini a gumesa a mu fenengeta nghohe* yakwe a wu khoma kala afa.+ Hazayeli i no maha hosi cikhundleni cakwe.+
16 Hi lembe ga wutlhanu ga Jehoramu,+ a n’wana wa Ahabhi, a hosi ya Izrayeli, a cikhati leci Jehoxafati a nga hi hosi ya Judha, Jehoramu,+ a n’wana wa Jehoxafati, a hosi ya Judha, i no maha hosi.
17 I wa hi ni 32 wa malembe a cikhati leci a nga maha hosi niku i no fuma 8 wa malembe le Jerusalema.
18 I no famba ndleleni ya tihosi ta ka Izrayeli+ a ku fana ni lezvi zvi mahilweko hi va yindlu ya Ahabhi,+ hakuva i wa tekile a nhanyana wa Ahabhi ava sati wakwe.+ I no simama ku maha zvakubiha mahlweni ka Jehovha.+
19 Kanilezvi Jehovha a nga zvi lavangi ku lovisa Judha hi kota ya Dhavhidha, a nandza gakwe,+ hakuva i wa mu tsumbisile a ku mu nyika a kandiya contlhe cikhati, yena+ ni vana vakwe.
20 Masikwini ya Jehoramu, Edhomi i no hluwukela Judha,+ a ti yimisela a hosi yakwe.+
21 Hikwalaho, Jehoramu i noya Zayira ni tikareta takwe tontlhe. I no vhuka ni wusiku a hlasela vaEdhomi lava va nga mu randzele ni vakomandante va tikareta. A masochwa ma no tsutsuma maya matendeni ya wona.
22 Kanilezvi Edhomi wa ha simama ku hluwukela Judha kala ni nyamutlha lezvi. Libna+ yenawu i no hluwuka ka cikhati caleco.
23 A man’wani matimu ya Jehoramu, zvontlhe lezvi a nga maha, ma tsalilwe bhukwini ga matimu ya zvikhati zva tihosi ta Judha.
24 Makunu Jehoramu i no etlela, a humula ni vakokwani vakwe, a lahliwa ni vakokwani vakwe Dhoropeni ga Dhavhidha.+ A n’wana wakwe Ahaziya+ i nova hosi cikhundleni cakwe.
25 Hi lembe ga wu 12 ga Jehoramu, a n’wana wa Ahabhi, a hosi ya Izrayeli, Ahaziya, a n’wana wa Jehoramu, a hosi ya Judha, i nova hosi.+
26 Ahaziya i wa hi ni 22 wa malembe a cikhati leci a nga maha hosi, niku i no fuma lembe gin’we Jerusalema. A vito ga mamani wakwe ku wa hi Ataliya,+ a zukulu* wa Omri,+ a hosi ya Izrayeli.
27 I no famba ndleleni ya yindlu ya Ahabhi,+ a simama ku maha zvakubiha mahlweni ka Jehovha, a ku khwatsi hi yindlu ya Ahabhi, hakuva a papayi wakwe i wa chadhile ni wasati wa yindlu ya Ahabhi.+
28 Hikwalaho, i no famba na Jehoramu, a n’wana wa Ahabhi, va yalwa yimpi na Hazayeli, a hosi ya Siriya, le Ramote-Gileyadhe,+ kanilezvi a vaSiriya va no bayisa Jehoramu.+
29 Hikwalaho, hosi Jehoramu i no tlhela Jezreeli+ kasi a ya hanya a zvilondza lezvi a nga bayisilwe hi vaSiriya le Rama a cikhati leci a ngalwa na Hazayeli, a hosi ya Siriya.+ Ahaziya, a n’wana wa Jehoramu, a hosi ya Judha, i no relela aya Jezreeli kasi a ya vhuxela Jehoramu, a n’wana wa Ahabhi, hakuva i wa bayisilwe.*
Mitlhamuselo ya lahasi
^ Kutani: “a wu vekela nghoheni”.
^ Hi kukongoma: “nhanyana”.
^ Kutani: “i wa babya”.
