Tihosi ta wumbiri 9:1-37
9 Muphrofeti Elixa i no vitana a mun’we wa vana va vaphrofeti, aku kakwe: “Boha tinguwo ta wena laha ciwunwini ca wena, u teka a botori legi ga mafura u hatlisa uya Ramote-Gileyadhe.+
2 Loku u chikela seyo, lavetela Jehu,+ a n’wana wa Jehoxafati, a n’wana wa Nimxi; nghena u mu sukisa cikari ka vamakabye vakwe u mu teka uya naye kwartwini ya lomu cikari.
3 Hi kulandzela, u ta teka a botori legi ga mafura u ma chulula hlokweni yakwe, uku: ‘Jehovha i ngalo: “Ndza ku tota lezvaku uva hosi ya Izrayeli.”’+ U gumesa u vhulula livati u tekela ku tsutsuma.”
4 Makunu a nandza ga muphrofeti gi no khoma ndlela giya Ramote-Gileyadhe.
5 A cikhati leci gi nga chikela, gi no kuma a varangeli va butho na va tshamile, giku: “N’wahosi, ndzi na ni mahungu ndzi ku nehelako.” Jehu aku: “U wula mani cikari ka hina?” Giku: “Ndzi wula wena, n’wahosi.”
6 Hikwalaho, Jehu i no suka a nghena lomu ndlwini; a nandza gi no chulula mafura hlokweni yakwe, giku: “Jehovha, a Nungungulu wa Izrayeli, i ngalo: ‘Ndza ku tota lezvaku uva hosi hehla ka vanhu va Jehovha, hehla ka Izrayeli.+
7 Hihirita a yindlu ya Ahabhi, a hosi ya wena. Mina ndzi ta photela a nkhata wa malandza ya mina, a vaphrofeti, ni wa malandza wontlhe ya Jehovha lawa ma fileko mandleni ya Jezebheli.+
8 Yontlhe a yindlu ya Ahabhi yi ta lova. Ndzi ta hihirita a vavanuna vontlhe* va Ahabhi a ku patsa ni lava va vhumalako muvhuni ni lava va rerekileko lomu Izrayeli.+
9 Ndzi ta maha a yindlu ya Ahabhi yi fana ni yindlu ya Jerobhowamu,+ a n’wana wa Nebhate, ni yindlu ya Bhaaxa,+ a n’wana wa Ahija.
10 Xungetano hi Jezebheli: I ta giwa hi timbyana tikweni ga Jezreeli+ niku a nga ta lahliwa hi munhu.’” Andzhako ka lezvo, i no vhula livati a tsutsuma.+
11 A cikhati leci Jehu a nga tlhela ka malandza ya hosi yakwe, wona ma no mu wutisa, maku: “Zvini? A munhu loyi wo hlanya i wa tela yini ka wena?” Jehu i no ma hlamula, aku: “N’wina ma va tiva khwatsi a vanhu vo khwatsi hi loyi ni lezvi va wulawulako.”
12 Kanilezvi ma te ngalo: “Wa hemba! Hi byele.” Jehu aku: “I ndzi byelile lezvi ni lezvi, a tlhela aku: ‘Jehovha i ngalo: “Ndza ku tota lezvaku uva hosi ya Izrayeli.”’”+
13 Zvalezvo, a mun’we ni mun’wani wabye i no hatlisa a teka a nguwo yakwe a yi andlala hehla ka cikadha ci nga hi mahlweni kakwe,+ vaba linanga,* vaku: “Jehu i hosi!”+
14 Makunu Jehu,+ a n’wana wa Jehoxafati, a n’wana wa Nimxi, i no mu xuxela cikungo Jehoramu.
Jehoramu ni vaIzrayeli vontlhe va wa vile Ramote-Gileyadhe+ va vhikela Izrayeli ka tiyimpi ta Hazayeli,+ a hosi ya Siriya.
15 Hi ndzhako ka cikhati, hosi Jehoramu i no tlhela Jezreeli+ kasi a ya hanya a zvilondza lezvi a nga bayisiwa hi vaSiriya a cikhati leci a ngalwa na Hazayeli, a hosi ya Siriya.+
Jehu i te ngalo: “Loku mu* vhumela, mu nga tsiki munhu a huma lomu dhoropeni a famba a ya tivisa a mahungu lawa le Jezreeli.”
16 Jehu i no khilela a kareta yakwe aya Jezreeli, hakuva Jehoramu i wa etlele seyo na a bayisilwe niku Ahaziya, a hosi ya Judha, i wa relele seyo a ya vhuxela Jehoramu.
17 A murindzeli loyi a nga yimile laha likhokholeni* la Jezreeli i no wona a citshungu ca vavanuna va Jehu na ci tshinela. Zvalezvo i te ngalo: “Ndzi wona citshungu ca vavanuna.” Jehoramu aku: “Ruma a mukhileli wa haxi a va khinga, a ya va wutisa ku: ‘Muta hi kurula ke?’”
18 Hikwalaho, a mukhileli wa haxi i no huma a mu khinga, aku: “A hosi yi ngalo: ‘Muta hi kurula ke?’” Kanilezvi Jehu i te ngalo: “U nghena kwihi ka mhaka ya ‘kurula’? Hundza uya le ndzhako ka mina!”
A murindzeli i no tivisa, aku: “A cirun’wa ci chikele kabye, kanilezvi a ci wuyangi.”
19 Hikwalaho, a hosi yi no rumela mun’wani a mukhileli wa haxi. A cikhati leci a nga chikela kabye, i te ngalo: “A hosi yi ngalo: ‘Muta hi kurula ke?’” Kanilezvi Jehu i te ngalo: “U nghena kwihi ka mhaka ya ‘kurula’? Hundza uya le ndzhako ka mina!”
20 A murindzeli i no tivisa, aku: “I chikele kabye, kanilezvi a nga wuyangi, niku lezvi yi fambisako zvona a kareta ya yimpi zvo khwatsi hi Jehu, a zukulu* wa Nimxi, hakuva i fambisisa ku khwatsi munhu wo hlanya.”
21 Jehoramu aku: “Longiselani a kareta ya mina!” Hikwalaho, va no longisela a kareta yakwe ya yimpi. Jehoramu, a hosi ya Izrayeli, na Ahaziya,+ a hosi ya Judha, a mun’we ni mun’wani wabye i no nghena kareteni yakwe va khinga Jehu. Va no kumana naye petsweni wa Nabhote,+ a muJezreeli.
22 Zvalezvi Jehoramu a nga wona Jehu, i te ngalo: “Jehu, uta hi kurula ke?” Kanilezvi Jehu i te ngalo: “Ku ngava ni kurula na ka ha hi ni wubhayi ni wuloyi+ go tala ga mamani wa wena Jezebheli ke?”+
23 Jehoramu i no tekela ku jikisa a kareta yakwe kasi a tsutsuma, a byela Ahaziya, aku: “Ahaziya, hi xuxelwe cikungo!”
24 Jehu i no koka a wura gakwe a fula Jehoramu hi laha cikari ka makatla, a paxa wu tlhava mbilu yakwe, a gumesa awa lomu kareteni yakwe ya yimpi.
25 Jehu i no byela Bhidkare, a nandza gakwe, aku: “Mu tlakule u mu hoxela lomu sin’wini ga Nabhote, a muJezreeli.+ Alakanya lezvaku mina na wena hi wa fambisa zvin’we tikareta* lendzhako ka Ahabhi, a papayi wakwe, a cikhati leci Jehovha a nga wula a magezu lawa xungetano hi yena,+ aku:
26 ‘“A ku khwatsi hi lezvi ndzi wonileko a nkhata wa Nabhote+ ni nkhata wa vana vakwe a tolo”, ku wula Jehovha, “ndzi ta ku tlhelisela+ lezvi u mahileko kwalomu ka petso lowu”, ku wula Jehovha.’ Hikwalaho, mu tlakule u mu hoxa lomu petsweni lowu kota lezvi Jehovha a wulileko.”+
27 Laha Ahaziya,+ a hosi ya Judha, a nga wona lezvi zvi nga maheka, i no tsutsuma hi ndlela ya yindlu ya jardhim. (Hi kulandzela, Jehu i no mu hlongolisela, aku: “Mu dayeni yenawu!” Hikwalaho, va no mu fula lomu kareteni yakwe na a kandziha aya Gura kusuhani ni Ibleyama.+ Kanilezvi i no simama ku tsutsuma aya Megidho a ya fela seyo.
28 A malandza yakwe ma no mu rwala lomu kareteni aya Jerusalema ma ya mu lahla cilahleni cakwe ni vakokwani vakwe, Dhoropeni ga Dhavhidha.+
29 Ahaziya+ i mahile hosi ya Judha hi lembe ga wu 11 ga Jehoramu, a n’wana wa Ahabhi.)
30 A cikhati leci Jehu a nga chikela Jezreeli,+ Jezebheli+ i no zvizwa. Hikwalaho, i no ti penda matihlo hi muvala wa tima a sasekisa a misisi yakwe a hlomela hi laha janeleni.
31 Zvalezvi Jehu a nga nghena laha nyangweni, Jezebheli i te ngalo: “Zimri, loyi a nga daya a hosi yakwe, zvi mu fambele khwatsi ke?”+
32 Laha Jehu a nga tlakusa matihlo a cuwuka laha janeleni, i no wutisa, aku: “Himani a nga tlhelweni ga mina? Himani?”+ Zvalezvo, a vatiri vambiri kutani vanharu va laha wuhosini va no cuwuka Jehu le hasi.
33 Yena aku kabye: “Mu hoxeni lahasi!” Hikwalaho, va no mu hoxa lahasi, a nkhata wokari wakwe wu tlhambuketela khurisi ni mahaxi, Jehu a hundza a mu kandzihela.
34 Andzhako ka lezvo, i no nghena aga ni kunwa, a gumesa aku: “Tekani a wasati loye a rukatelweko mu ya mu lahla, hakuva i n’wana wa hosi.”+
35 Kanilezvi a cikhati leci va nga famba kasi ku ya mu lahla, a va kumangi nchumu. Va no kuma a cirwarwa cakwe basi, ni mikondzo yakwe ni mandla yakwe.+
36 A cikhati va nga tlhela va ya mu byela, i te: “Lezvi zvi tatisa a mhaka ya Jehovha+ leyi a yi wulileko hi nomu wa nandza gakwe Elija, a muTixebheti, aku: ‘A timbyana ti taga a nyama ya Jezebheli lomu tikweni ga Jezreeli.+
37 Niku a cirumbi ca Jezebheli ci ta maha citromu lomu masin’wini ya petso wa Jezreeli kasi va nga wuli, vaku: “Loyi hi Jezebheli.”’”
Mitlhamuselo ya lahasi
^ Hi kukongoma: “ni wihi munhu a xixitelako a khurisi”. Lawa magezu ya ciHebheru ya ku chepeta, ma wulako vavanuna.
^ Kutani: “khombela”.
^ Kutani: “a muhefemulo wa n’wina wu”.
^ Kutani: “torre”.
^ Hi kukongoma: “n’wana”.
^ Hi kukongoma: “hi wa fambisa a zvipani”.
