Papilo ga wunharu ga Johani 1:1-14
1 A wanuna a kulileko,* ka Gayusi, a randzekako, loyi ndzi mu randzako nguvhu.
2 Makabye wa mina a randzekako, ndzi khongelela lezvaku a zvilo zvontlhe zvi simama ku ku fambela khwatsi, uva ni lihanyo li nene, a ku khwatsi hi lezvi zvi ku* fambelako khwatsi ni zvalezvi.
3 Hakuva ndzi tsakile nguvhu a cikhati leci a vamakabye va ngata va ta kustumunya lezvaku u khomelele lisineni, laha u simamako ku famba lisineni.+
4 A ndzi na litsako* la hombe lo hundza leli: la kuzwa lezvaku a vana va mina va simama ku famba lisineni.+
5 Makabye wa mina a randzekako, wa kombisa kutsumbeka ka lezvi u mahelako vamakabye, hambu lezvi u kalako u nga va tivi.+
6 Va nyikile wukustumunyu hi lirandzo la wena mahlweni ka bandla. Ndzi kombela lezvaku u va longisa liendzweni labye hi ndlela yi tsakisako Nungungulu.+
7 Hakuva va fambile hi kota ya vito gakwe, na va nga teki nchumu+ ka vamatiko.
8 Hikwalaho, hi kurumeteka ku va amukela khwatsi a vanhu vo kota lavo,+ kasi hiva vatiri-kulori lisineni.+
9 Ndzi tsalele bandla a timhaka to kari, kanilezvi Dhiyotrefesi, loyi a randzako ku ti maha wo sangula cikari kabye,+ a nga vhumeli ne cin’we ci tako hi ka hina hi cichavo.+
10 Hi cigelo leco, loku ndzita, ndzi ta khatalela a mitiro leyi a yi mahako ya ku hangalasa mahlevo hi hina.*+ Na a nga eneliswi hi lezvo, i ala ku amukela vamakabye+ hi cichavo; niku lava va zvi lavako ku va amukela, i zama ku va betela ni ku va hlongola lomu bandleni.
11 Makabye wa mina a randzekako, u nga pimanyisi lezvi zvakubiha, kanilezvi pimanyisa lezvi zva zvinene.+ Loyi a mahako zvazvinene ita hi ka Nungungulu.+ Loyi a mahako zvakubiha a nga mu wonangi Nungungulu.+
12 Vontlhe va wulawula zvazvinene hi Dhemetriyusi, a ku patsa ni lisine lonawu. Kunene, hinawu ha nyika wukustumunyu ha yena, niku ma zvi tiva lezvaku a wukustumunyu legi hi nyikako lisine.
13 Ndzi wa hi ni timhaka to tala ta ku ku tsalela, kanilezvi a ndzi lavi ku simama ndzi ku tsalela hi limbave ni tinta.
14 Hambulezvo, ndza tsumba ku ndzi ta ku wona zvezvanyana kasi hi fela ku wulawula nghohe ni nghohe.
A kurula a kuve na wena.
A vanghana va ku rungula. Rungula a vanghana hi mavito.
Mitlhamuselo ya lahasi
^ Kutani: “A dhota”.
^ Kutani: “a muhefemulo wa wena zvi wu”.
^ Zvi nga maha na zvi wula ku: “cigelo ca kubonga”.
^ Hi kukongoma: “ya ku hi hleva hi timhaka ta kubiha”.
