Amosi 6:1-14
6 “Khombo ka lava va ku ti tsumba va le Ziyoni,Ka lava va ti byelako ku va tshamisekile citsungeni ca Samariya,+A vavanuna va dhumileko va tiko go chaviseka cikari ka matiko,Lava a yindlu ya ka Izrayeli yi tsutsumelako kabye!
2 Fambani Kalne mu ya zvi wona.
Sukani hi leyo muya Hamate wa Hombe,+Niku relelani muya Gati wa vaFilistiya.
Vova chukwana a ku hundza mifumo leyi,*Kutani a tiko gabye gova ga hombe a ku hundza legi ga n’wina ke?
3 Mo rivala a siku ga khombo+Mu tsika tihanyi ti fuma cikari ka n’wina ke?+
4 Va etlela mibhedhini yi mahilweko hi matino ya tindlovhu+ va tlhela va ku gaa lomu masofeni;+Vaga tiyivhana ta ntlhambi ni marole yo nona;+
5 Va tsamba tisimu hi ku landza muzka wa citende,*+Va tlhela va maha zvilo zva ku chaya hi zvona muzka a ku fana na Dhavhidha;+
6 Vanwa vhinyo hi tikopo ta hombe,+Va tola mafura ya manene nguvhu.
Kanilezvi a va khatali* hi khombo ga Josefa.+
7 Hikwalaho, hi vona va to ranga a kuya wukhumbini,+Ni mibuzo ya vhilinganya ya lava va nge gaa lomu masofeni yi ta mbhela.
8 ‘Jehovha, a Hosi ya Hombe, i hlambanyile hi yena n’winyi’,*+ ku wula Jehovha, a Nungungulu wa mabutho, ‘aku:“Ndza nyenya a matshandza ya Jakobe,+Ndzi venga ni tikhokhola* takwe ti tiyisilweko khwatsi,+Hikwalaho, ndzi ta nyikela a dhoropa ni zvontlhe zvi nga ka gona.+
9 “‘“Loku ku sala a 10 wa vavanuna ka muti wo kari, vonawu va tafa.
10 Ku tata a xaka* gabye gi ta va teka gi huma navo gi ya va hisa hi mun’we mun’we. I ta huma ni marambu yabye hi lomu ndlwini. Andzhako ka lezvo, i ta wutisa ni wihi a nga lomu tikwartwini ta yindlu, aku: ‘Ka ha hi ni mun’wani lomo na wena ke?’ Yena i taku: ‘I hava!’ Hi kulandzela, a xaka gabye gi taku: ‘Miyela uku hwi! Hakuva leci a hi cikhati ca ku kumbuka a vito ga Jehovha.’”
11 Hakuva hi Jehovha a nyikako cileletelo;+I ta khungumula a yindlu ya hombe yiva nhulu ya maribye,Ni ciyindlwana civa marukwani.+
12 Xana a mahaxi ma tsutsuma hehla ka ribye ga hombe,Kutani a munhu wa rima hi tihomu hehla ka ribye lego ke?
Hakuva mu cicile nongameto wuva sinya ya vhenene,Ni handzu wa kululama wuva kubava.*+
13 Mu tsakisiwa hi zvilo zvi nga vhuniko nchumu,Niku mu ngalo: “A hi hlulangi* hi ntamu wa hina venyi ke?”+
14 Hikwalaho, ndzi ta ku tisela tiko, wena yindlu ya ka Izrayeli’,+ ku wula Jehovha, a Nungungulu wa mabutho,‘Niku va ta mu xanisa kusukela Lebho-Hamate*+ kala Nkoveni wa Arabha.’”
Mitlhamuselo ya lahasi
^ Zvi wonekisa ku khwatsi ku wuliwa a mufumo wa Judha ni wa Izrayeli.
^ Kutani: “cichaya-chaya ca tingoti”.
^ Hi kukongoma: “babyangi”.
^ Kutani: “torres”.
^ Kutani: “hi muhefemulo wakwe”.
^ Hi kukongoma: “a makabye wa papayi wakwe wa cinuna”.
^ Kutani: “sinya yo bava”. Ku wuliwa a sinya yo kari yo bava nguvhu, ya vhenene.
^ Hi kukongoma: “A hi milangi tinanga”.
^ Kutani: “nyangweni ya Hamate”.
