Amosi 7:1-17
7 Lezvi hi lezvi Jehovha, a Hosi ya Hombe, a nga ndzi komba: I rumele a ntlawa wa humbi* a cikhati leci a timbewu ta mela wo gumesa* ti nga kari ti sangula ku kula. A timbewu leti hi leti ti byalilweko andzhako ka loku ku tsemilwe byanyi ga hosi.
2 Laha a humbi yi nga mbhetile kuga a tisinya ta tiko, ndzi te: “O Jehovha, Hosi ya Hombe, tsetselela!+ Jakobe a nga ponisa kuyini?* Hakuva a nga na ntamu!”+
3 Hikwalaho, Jehovha i no hlolisisa mhaka leyi.+ “Zvi nga ta maheka”, ku wulile Jehovha.
4 Lezvi hi lezvi Jehovha, a Hosi ya Hombe, a nga ndzi komba: Jehovha, a Hosi ya Hombe, i no laya lezvaku kuta ndzilo wu ta tsayisa. Wu no hisa a mati yo tala yo eta wu tlhela wu hisa ni cipandze co kari ca tiko.
5 Andzhako ka lezvo, ndzi te: “O Jehovha, Hosi ya Hombe, u nga mahi lezvo.+ Jakobe a nga ponisa kuyini?* Hakuva a nga na ntamu!”+
6 Hikwalaho, Jehovha i no hlolisisa mhaka leyi.+ “Lezvo zvonawu zvi nga ta maheka”, ku wulile Jehovha, a Hosi ya Hombe.
7 Lezvi hi lezvi a nga ndzi komba: Ndzi no wona Jehovha na a yimile hehla ka muro wu mahilweko hi lingoti la prumo, na a welele a lingoti la prumo canjeni gakwe.
8 Andzhako ka lezvo, Jehovha i te ngalo ka mina: “Amosi, cini u ci wonako?” Mina ndziku: “Lingoti la prumo.” Jehovha aku: “Ndza vekela a lingoti la prumo cikari ka vanhu va mina va ka Izrayeli. Ndzi nga ta ha va tsetselela.+
9 A matshamu yo tlakuka ya Isaka+ ma ta mahiwa ciwula, ni matshamu yo basa ya va ka Izrayeli ma ta hahlulwa;+ niku ndzi tata ni cipadha ndzi ta vhukela a yindlu ya ka Jerobhowamu.”+
10 Amaziya, a mupristi wa le Bheteli,+ i no rumela a mahungu ka Jerobhowamu,+ a hosi ya ka Izrayeli, aku: “Amosi wa ku vhukela cikari ka yindlu ya ka Izrayeli.+ A tiko a gi nge zvi koti ku timisela magezu yakwe wontlhe.+
11 Hakuva lezvi hi lezvi Amosi a wulako: ‘Jerobhowamu i ta dawa hi cipadha, niku Izrayeli hakunene i ta susiwa tikweni gakwe a yisiwa wukhumbini.’”+
12 Andzhako ka lezvo, Amaziya i no byela Amosi, aku: “Wena muwoni, hatla u suka laha uya tikweni ga Judha, hi kwaseyo u to ya tirela kona kasi u kuma zvo hanya hi zvona* niku u nga phrofeta kwaseyo.+
13 Kanilezvi u nga ha phrofeti kambe lomu Bheteli,+ hakuva wutshamu go basa ga hosi+ ni yindlu ya mufumo.”
14 Makunu Amosi i no hlamula Amaziya, aku: “Ndzi wa nga hi muphrofeti ne ndzi wa nga hi n’wana wa muphrofeti; ndzi wa hi murisi+ niku ndzi wa hlayisa mikuwu.*
15 Kanilezvi Jehovha i no ndzi susa ka ku landzelela ntlhambi, niku Jehovha i te ngalo ka mina: ‘Famba u ya phrofetela a vanhu va mina va ka Izrayeli.’+
16 Makunu zwana a mhaka ya Jehovha: ‘Wena u ngalo: “U nga phrofeti zvahava hi Izrayeli+ ne u nga kaneli+ zvo vhukela a yindlu ya ka Isaka.”
17 Hikwalaho, Jehovha i ngalo: “A sati wa wena i ta maha cibhayi lomu dhoropeni, ni vafana va wena ni vanhanyana va wena va ta dawa hi cipadha. A tiko ga wena gi ta avanyiselwa hi lingoti la ku pima hi lona; wena u ta fela ka tiko gi nga hlazvekangiko, niku hakunene Izrayeli i ta susiwa tikweni gakwe a yisiwa wukhumbini.”’”+
Mitlhamuselo ya lahasi
^ A humbi zviharana zvo fana ni bhandzala.
^ Ku nga ndzeni ka Janeiro ni Fevereiro.
^ Hi kukongoma: “a nga sukisa kuyini a yima”.
^ Hi kukongoma: “a nga sukisa kuyini a yima”.
^ Hi kukongoma: “u to yaga kona pawa”.
^ Kutani: “ndzi wa hi muhandzuleli wa makuwu”. A mikuwu leyi yi wa hi ya lixaka lo kari le Izrayeli yi nga vitaniwa ku i sicómoros.
