Cizimba ca Solomoni 8:1-14
-
Nhanyana (1-4)
-
“Loku ku wo khwatsi u makabye wa mina” (1)
-
-
A vamakabye va nhanyana (5a)
-
‘Himani loyi a khigeleko a murandziwa wakwe ke?’
-
-
Nhanyana (5b-7)
-
“A lirandzo li na ni ntamu wo fana ni kufa” (6)
-
-
Vamakabye va nhanyana (8, 9)
-
“Loku a hi muro, . . . kanilezvi loku a hi livati, . . .” (9)
-
-
Nhanyana (10-12)
-
“Mina ndzi muro” (10)
-
-
Murisi (13)
-
‘Ndzi tsike ndzizwa gezu ga wena’
-
-
Nhanyana (14)
-
“Tsutsuma a ku khwatsi u mhuti”
-
8 “O, loku ku wo khwatsi u makabye wa mina,Loyi a an’wileko a mavele ya mamani wa mina!
Loku ndzi ku kuma le handle ndzi wa ta ku pswopswa;+I hava a nga wa ta ndzi hleka.
2 Ndzi wa ta ku heleketa,Ndzi ku nghenisa lomu ndlwini ya mamani wa mina,+Loyi a nga ndzi gondzisa.
Ndzi wa ta ku nyika a vhinyo yo nuhela unwa,A dosi ga maromã.
3 A woko gakwe ga cibhabha gi wa tava lahasi ka hloko ya mina,Ni woko gakwe ga cinene gi wa ta ndzi bharasara.+
4 Ndza mu hlambanyisa, n’wina vanhanyana va Jerusalema, ndziku:
Mu nga zami ku ndzi khindlimuxela lirandzo hambu ku li vhuxa na li nga se zvi lava.”+
5 “Himani loyi a tako hi le ciwuleni,Na a khigele a murandziwa wakwe ke?”
“Ndzi ku vhuxile na u hi lahasi ka masiyeira,*
Laha a mamani wa wena a nga lun’wa kona hi nyimba ya wena,
Laha loyi a nga ku pswala a nga lun’wa kona.
6 Ndzi namekete mbilwini ya wena kota cifungo,Ndziva cifungo laha wokweni ga wena,Hakuva a lirandzo li na ni ntamu wo fana ni kufa,+Ni lirandzo lo tiya li na ni ntamu a ku fana ni Cilahla;*
A kuhisa ka lona i ndzilo wu vhurako, a langavi ga Jah.*+
7 A mati ma vhindlukileko a ma nge zvi koti ku tima a lirandzo,+Ne hambu a micongo a yi nge zvi koti a ku li kukuleta.+
Loku a munhu i wo nyikela tontlhe a titshomba ta yindlu yakwe hi kota ya lirandzo,Ti* wa ta chepetiwa nguvhu.”
8 “Hi na ni makabye wa cinhanyetana,+A kalako a nga se huma mavele.
Hi ta kuyini hi makabye wa hinaA siku legi a to tsumbisiwa ku chadha ke?”
9 “Loku a hi muro,Hi ta aka a libhiyo la prata hehla kakwe,Kanilezvi loku a hi livati,Hi ta mu vhala hi bakwa ya sedhare.”
10 “Mina ndzi muro,Ni mavele ya mina ma fana ni tikhokhola.*
Hikwalaho, matihlweni yakwe,Ndzi fana ni loyi a kumileko kurula.
11 Solomoni i wa hi ni civhina*+ le Bhaali-Hamoni.
I no ci nyikela mandleni ya vahlayisi.
A mun’we ni mun’wani wabye i wa mu nyika a 1000 wa zvingerengere zva prata hi mihandzu ya cona.
12 Ndzi na ni civhina ca mina n’winyi.
A 1000 wa zvingerengere zva prata zva wena Solomoni,Ni 200 zva lava va hlayisako a mihandzu ya cona.”
13 “Wena loyi u tshamako lomu tijardhim,+A vanghana va ingisela a gezu ga wena.
Ndzi tsike ndzi gi zwawo.”+
14 “Hatlisa, murandziwa wa mina,U tsutsuma a ku khwatsi u mhuti+Kutani cimbavalanaCi nga hehla ka zvitsunga zva tisinya to nuhela.”
Mitlhamuselo ya lahasi
^ A masiyeira i sinya leyi yi pswalako maçã.
^ Kutani: “Xeyole”, ku nga cilahla ca vanhu vontlhe. Wona Tlhamuselo wa magezu ya Bhibhiliya.
^ A ku “Jah” i vito gi komisilweko gaku Jehovha.
^ Zvi nga maha na zvi wula ku: “I”.
^ Kutani: “torres”.
^ A civhina i simu ga tisinya leti ti pswalako mauvha.
